گه‌ڕان

Shadow Shadow
سیاسه‌تی

عێراق و کوەیت رەتیانکردەوە هێرشکرابێتە سەر خاڵێکى سنورى نێوانیان

2020.08.11 - 11:09
عێراق و کوەیت رەتیانکردەوە هێرشکرابێتە سەر خاڵێکى سنورى نێوانیان

ناس کورد-

عێراق و کوەیت ئەو هەواڵانەیان رەتکردەوە کە باس لەوە دەکەن خاڵى سنورى جریشانى نێوان هەردوو وڵات روبەڕووى "هێرشى تێکدەرانە" بوبێتەوە.

 

فەرماندەیی پرۆسە هاوبەشەکانى عێراق لەبەیاننامەیەکدا ڕایگەیاند، ئەو هەواڵەى بڵاوکراوەتەوە لەبارەى هێرشى تێکدەرانە بۆ سەر خاڵى سنورى جریشان لەگەڵ کوەیت دوورە لە راستییەوە.

 

هاوکات، شانەى میدیاى ئەمنى عێراق لەڕاگەیەنراوێکدا جەختیکردەوە، ئەوەى لەو بارەیەوە بڵاوکراوەتەوە دروستکراو بووە و خاڵە سنورییەکە روبەڕووى هیچ هێرشێک نەبووەتەوە.

 

لاى خۆشیەوە، سەرۆکایەتى گشتى ئەرکانى سوپاى کوەیت بەهەمان شێوە رەتیکردەوە خاڵە سنورییەکە روبەڕووى هێرش بوبێتەوە و لەبەیاننامەیەکدا ڕایگەیاند، کە دۆخى خاڵە سنورییەکە ئارام و جێگیرە.

 

ئەوە لەکاتێکدایە، لە هەندێ پێگەى هەواڵى و تۆڕە کۆمەڵایەتییەکان هەواڵى ئەوە بڵاوبووەوە کە گروپێکى نەناسراو هێرشیان کردووەتە سەر خاڵە سنورییەکە لە خۆرئاواى پارێزگاى بەسرە.

 

دواتریش گروپێکى چەکدار کە ناویان لەخۆیان ناوە "یارانى ئەشکەوت" بەرپرسیارێتى ئەنجامدانى هێرشەکەیان گرتە ئەستۆ کە بەوتەى ئەوان ئێوارەى دووشەممە لەرێگەى بۆمبى چێنراوەوە ئەنجامیانداوە.

 

هەر لەو بارەیەوە ئاژانسى رۆیتەرز لەزارى سەرچاوەیەکى ئەمنى عێراقەوە بڵاویکردبووەوە کە تەقینەوەیەک لە نزیک خاڵێکى سنورى نێوان عێراق و کوەیت روویداوە.