گه‌ڕان

Shadow Shadow
سیاسه‌تی

بەتۆمەتى تێوەگلان لە کوشتنى خۆپیشاندەران

چەند سەرکردەیەکی دیاری حەشدی تێدایە.. لە دادگای لاهای سکاڵا لەسەر 41 بەرپرسی عێراق تۆمار دەکرێت

2020.08.10 - 23:14
چەند سەرکردەیەکی دیاری حەشدی تێدایە.. لە دادگای لاهای سکاڵا لەسەر 41 بەرپرسی عێراق تۆمار دەکرێت

ناس کورد-

ڕێکخراوێکى مەدەنى عێراقى کە بارەگاکەى لە ئەمریکایە ئامادەیی خۆى نیشاندا بۆ تۆمارکردنى سکاڵا لە دادگاى تاوانى نێودەوڵەتى لەلاهاى، دژى ژمارەیەک بەرپرسى عێراقى و سەرکردەى گروپە چەکدارەکانى سەر بە ئێران، بەتۆمەتى تێوەگلانیان لە کوشتنى خۆپیشاندەران.

 

عەلى فازڵ، سەرۆکى ڕێکخراوى ئەمریکى عێراقى بۆ بەرەنگاربوونەوەى گەندەڵى لە تویتێکدا ڕایگەیاند، ئەمڕۆ دووشەممە داواکە پێشکەشى دادگا دەکەن دژى بەرپرسانى سیاسی و ئەمنى و سەرکردەى میلیشیاکان.

تا ئێستا دیار نییە دادگاکە داواکە وەردەگرێت یان نا، کە بەوتەى عەلى فازڵ هەوڵى یەکەمیان بۆ بەرزکردنەوەى بۆ بەردەم دادگاى تاوانەکان مەرجە پێویستییەکانى تێدا نەبووە.

 

لاى خۆیەوە، فایەق شێخ عەلى ئەندامى پەرلەمانى عێراق ڕایگەیاند، سکاڵاکە 41  بەرپرسى عێراقى و فەرماندەى میلیشیاکانى سەر بە ئێران دەگرێتەوە، کە دیارترینیان فالح فەیاز سەرۆکى دەستەى حەشدى شەعبیە کە لەکاتى خۆپیشاندانەکاندا راوێژکارى ئاسایشى نیشتیمانى بوو.

 

ئەو پەرلەمانتارە لە تویتێکدا باسى لەوەکردووە لیستەکە بە فالح فەیاز دەستپێدەکات و بە حامد جەزائیرى کۆتایی دێت، هەورەها هادى عامرى لەلیستەکەدا ژمارە شەشە.

حامد جەزائیرى سەرۆکى میلیشیاى "سەرایا خوراسانى" و هادى عامریش سەرۆکى رێکخراوى بەدرە.

 

لە خۆپیشاندانەکانى عێراقدا کە لە ئۆکتۆبەرى رابردوودا سەریانهەڵدا 550 کەس کوژران و هەزارانى دیکەش برینداربوون، بەهۆى بەکارهێنانى هێز لەلایەن هێزە ئەمنییەکانەوە دژى خۆپیشاندەران.