گه‌ڕان

Shadow Shadow
سیاسه‌تی

’’حەوت ساڵ زیندانی’’ چاوەڕێی دەکات

’’لەسەر بەهەدەردانی شەش ترلیۆن دینار’’ لێپێچینەوە لە فواد حسێن دەکرێت

2020.08.10 - 21:01
’’لەسەر بەهەدەردانی شەش ترلیۆن دینار’’ لێپێچینەوە لە فواد حسێن دەکرێت

ناس کورد-  هەڤاڵ فەتاح

بەهۆی ناردنی پارە بۆ هەرێمی کوردستان بەبێ ئەوەی هەرێم نەوت ڕادەستی بەغدا بکات، ژمارەیەک پەرلەمانتاری عەرەب لەپەرلەمانی عێراق سکاڵایان لە دادگا دژ بە فواد حسێن، وەزیری پێشووی دارایی عێراق تۆمارکردووە و داوای لێپێچینەوەی لەگەڵدا دەکەن.

 

فواد حسێن، وەزیرى پێشووى دارایی عێراق کە ئێستا وەزیرى دەرەوەیە، لەلایەن 30 پەرلەمانتارەوە سکاڵاى لەسەر تۆمارکراوە، لەسەر دۆسیەى ناردنى پارە بۆ هەرێم لەوکاتەدا کەوەزیرى دارایی بووە لەسەردەمى کابینەکەى عادل عەبدولمەهدیدا. 

 

ئەو پەرلەمانتارانە لە نوسراوێکدا بۆ دەستەى نەزاهە کە وێنەیەکى دەست ناس کورد کەوتووە، فواد حسێنیان تۆمەتبارکردووە بەوەى "پۆستەکەى قۆستووەتەوە و بەئەنقەست سامانى گشتى بەهەدەرداوە و زیاتر لە شەش ترلیۆن دینارى رەوانەى هەرێمى کوردستان کردووە".

 

جەمال شکور، ئەندامی لیژنەی نەزاهەی پەرلەمانی عێراق لە فراکسیۆنی یەکێتی نیشتیمانی کوردستان بە ناس کوردی ڕاگەیاند "ئەوانەی سکاڵایان دژ بە فواد حسێن تۆمارکردووە ژمارەیان سی پەرلەمانتارە و هەموویان پەرلەمانتاری عەرەبن و کوردیان تێیدا نییە".

 

وتیشی، "ئەو پەرلەمانتارانە لە دادگا سکاڵایان دژبە وەزیری پێشووی دارایی عێراق تۆمارکردووە بەوە تۆمەتباریانکردووە کە زیاتر لەشەش ترلیۆن دیناری بەهەدرداوە کە ئەو کاتەی وەزیری دارایی بووە لە حکومەتەکەی عادل عەبدولمەهدی".

 

لەسەردەمى کابینەکەى عادل عەبدولەهدیدا، حکومەتى عێراق مانگانە 453 ملیار دینار بۆ موچەى فەرمانبەرانى هەرێم رەوانە دەکرد تا مانگى ئایارى ئەمساڵ کە بەبڕیارێک ناردنى پارەکە ڕاگیرا.

 

بەوتەى جەمال شکور، "ئەو پەرلەمانتارانە فواد حسێنیان بە پێشیلکردنی دەستوری عێراق تۆمەتبارکردووە بەوەی کە پابەندی ڕێککەوتنی نێوان حکومەتی ناوەند و هەرێمی کوردستان نەبووە و بەبێ ئەوەی هەرێم 250 هەزاربەرمیل نەوت ڕادەستی کۆمپانیای (سۆمۆ) ی بەبازارکردنی نەوتی عێراق بکات، بە گوژمەی شەش ترلیۆن دینار پارەی لە بودجەی گشتی ڕەوانەی هەرێمی کوردستان کردووە".

 

لەسەر بنەماى سکاڵاى ئەو پەرلەمانتارانە، دەستەى نەزاهە فەرمانى بانگهێشتکردنى فواد حسێنى دەرکردووە، بەپێی ماددەى 340 تایبەت بە بەهەدەردانى سامانى گشتى.

 

بەپێی ماددەى 340 لە یاساى سزادانى عێراقى، هەر فەرمانبەر یان کەسێک کە خزمەتى گشتى دەکات و بەئەنقەست زیان بە سامان و دارایی گشتى ئەو شوێنە بدات کە کارى تێدا دەکات سزا دەدرێت بە زیندانى کە لە حەوت ساڵ تێپەڕنەکات.



جەمال شکور وتى، "ئەو فەرمانەی کە لەئێستادا لە دادگا دەرچووە تەنها بۆئامادەبوونی فواد حسێنە بۆ بەردەم دادگا، نەک بۆ دەستگیرکردنی".



دەشڵێت، "پێناچێت فەرمانی دەستگیرکردن بۆ فواد حسێن دەربچێت، چونکە ناوبراو پارێزبەندی هەیە، ئەو پارێزبەندیەش دەبێت بە یاسا هەڵبگیرێت لەهەمانکاتیشدا ئەگەر بەویستی خۆی نەڕوات بۆ بەردەم دادگا ئەوا ناتوانرێت بەزۆر ڕاپێچی بکەن". 



ئەمە یەکەمجار نییە هەوڵى لێپێچنەوە لە فواد حسێن دەدرێت، ئەوکاتەى وەزیرى دارایی بوو 61 پەرلەمانتار واژۆیان بۆ بانگهێشتکردنى بۆ پەرلەمان کۆکردەوە، هەروەها لیژنەى دارایی پەرلەمانى عێراق لەسەر هەمان پرس لە ناوەڕاستى حوزەیرانى ساڵى ڕابردوودا لەگەڵ بەرێوەبەرى کۆمپانیاى سۆمۆ بانگهێشتى لیژنەى دارایی پەرلەمانى کرد.

 

فواد حسێن تا لەپۆستى وەزیرى داراییدا بوو زیاد لەجارێک جەختیکردووەتەوە کە بەغدا زیاتر لەو بڕە پارەیەى بڕیوە کە لەبەرانبەر رادەستنەکردنى نەوت وەک سزا بۆ هەرێم دیاریکراوە، هەروەها دژى بڕیارى ڕاگرتنى ناردنى پارە بوو بۆ هەرێم لەلایەن حکومەتەکەى عادل عەبدولمەهدییەوە.

 

بەوتەى ئینعام خوزاعى ئەندامى پەرلەمانى عێراق لەسەر بنەماى ئەو سکاڵایەى کە ئەو پەرلەمانتارانە دژى فواد حسێن تۆماریانکردووە، دەستەى نەزاهە بڕیارى بانگهێشتکردنى فواد حسێنى دەرکردووە بەتۆمەتى بەهەدەردانى سامانى گشتى بەپێی ماددەى 340.

 

ئەو پەرلەمانتارە لە بەیاننامەیەکدا ئاماژەى بەوەکردووە "بەپیی ماددەکە ئەگەر تۆمەتەکەى بەسەردا ساغبێتەوە بریارى زیندانیکردنى بۆ دەردەچێت بۆ ماوەیەک کە دەگاتە حەوت ساڵ".