گه‌ڕان

Shadow Shadow
سیاسه‌تی

گروپەکان کامانەن و بانگەشەى چی دەکەن؟

لەمساڵدا چوار گروپى نوێی چەکداریى لە عێراق دەرکەوتوون

2020.08.09 - 20:49
لەمساڵدا چوار گروپى نوێی چەکداریى لە عێراق دەرکەوتوون

ناس کورد-

سەرباری زۆری گروپ و میلیشیا چەكدارە جیاجیاكانی عێراق، لەدوای كوژرانی قاسم سولەیمانی و ئەبو مەهدی موهەندیس چوار گروپی میلیشیای دیكە لەعێراقدا دەرکەوتوون و بەرپرسیارێتی زۆربەی هێرشەكانیان لەدژی هێزەكانی ئەمریكا خستووەتە ئەستۆی خۆیان.

 

ئەو گروپانە بانگەشەی تۆڵەكردنەوە لەئەمریكا دەكەن و خۆیان وا پیشاندەدەن سەر بەئێرانن، ئەوەش بەپێی راپۆرتێکى رۆژنامەى (العالم الجدید)ى عێراقى.

 

لەسەرەتای ساڵی 2020 ەوە تا ئەم مانگە، 4 گروپیكی میلیشای دیكە دروستبوون ئەوانیش "یارانی ئەشكەوت و كۆمەڵەی تۆڵەسێنان و تۆڵەی موهەندیس و سرییەكانی شۆڕشی تشرینی دووەم" ئەوانە خۆیان لەشێوەی ڕێكخستنی نوێدا ڕاگەیاندووە.

 

ئەو ڕێكخراوانە سەركردە و ئەندامەكانیان نادیارن بەڵام لەڕێگەی ڕاگەیەنراو و سایتی ئەلیكترۆنی تایبەت بەخۆیانەوە گرتەی ڤیدیۆی بڵاو دەكەنەوە كە هێزەكانی ئەمریكایان كردووەتە ئامانج سەرباری ئەوەی هەندێك لەو گروپانە هێرشی كاتیۆشكانی بۆ سەر ناوچەی سەوز و سەربازگەی تاجیان گرتووەتە ئەستۆی خۆیان.

 

مێژووی دروستبوونی ئەو گروپانەی كەبانگەشەی بەرەی بەرخۆدانكاری دەكەن بۆ ساڵی 2003 دوای ڕوخانی ڕەژیمی بەعس دەگەڕێتەوە، سەرەتا سوپای مەهدی سەر بەموقتەدا سەدر دامەزرا و دواتر گۆڕانكاری بەسەر دۆخەكەدا هات.

 

تا سەرەتای ساڵی 2020، 67 گروپ و میلیشیای چەكداری جیا دیا دروستبووە و لەدوای كوژرانی قاسم سولەیمانی و ئەبو مەهدی موهەندیس لەلایەن ئەمریكاوە چەند گروپێكی نوێتر دامەزراوە و خاوەن میدیا و ڕاگەیاندنی تایبەت بەخۆیانن جیاوازلەگروپەكانی پێشوو.

 

گروپە نوێیەكان رۆڵی گروپە گەورەكانی پێشوو كەچەند ساڵێكە دروسبتوون كەمكردووەتەوە و چاوی لەسەر لابردون بەتایبەت لەشەڕەكانی دژی داعشدا دیاربوون، لەوانە كەتیبەكانی حزبوڵا و عەسائیبی ئەهلی هەق و نوجەبا، گروپە نوێیەكان بونەتە ناونیشانی ڕوداوە ئەمنیەكانی عێراق.

 

18 ی مانگی كانوونی دووەمی ئەم ساڵ گروپی یارانی ئەشكەوت خۆیان ڕاگەیاند و جەختیان لەسەر تۆڵە كردنەوەی خوێنی ئەبو مەهدی موهەندیس و قاسمی سولەیمانی كردەوە و داوایان لەعێراقیەكان كرد نزیكی ئەمریكییەكان نەكەون چونكە دەیانكەنە ئامانج.

 

لەسایتە فەرمیەكەشیاندا وێنەی ڕابەری باڵای ئێران و خومەینیان وەكو باكگراوند بڵاو كردووەتەوە و ئایەتی ""انهم فتية آمنوا بربهم وزدناهم هدى" یان كردووەتە دروشمیان كە هەمان دروشمی عەسائیبی ئەهلی هەقە.

 

ئەو گروپە بەرپرسیارێتی چەند كردەوەیەكیان خستووەتە ئەستۆ خۆیان لەوانە هێرش كردنە سەر كاروانێكی سەربازی هێزەكانی ئەمریكا لەمەكیشیفەی سەر بەسەلاحەدین لە 16 ی مانگی تەمموزی ڕابردوو.

 

كۆمەڵەی تۆڵەسێنانیش لە مانگی ئاداری ئەم ساڵ خۆیان ڕاگەیاندووە، بەهەمان شێوە ئەمانیش سەركردە و ئەندامەكانیان دیارنیە و بانگەشەی بەرەنگاربوونەوەی هێزەكانی ئەمریكا دەكات، بەرپرسیارێتی زۆربەی ئەو هێرشانەی كە بەموشەكی كاتێۆشا كراونەتە سەر هێزەكانی ئەمریكا  لەناوچەی سەوز و سەرباگەی تاجی لەمانگی ئادارەوە تا مانگی حوزەیران گرتووەتە ئەستۆی خۆی.

 

لەمانگی ئایاری ئەم ساڵیشدا، گروپی سرییەكانی شۆڕشی تشرینی دووەم پەیدا بووە و لە 11 مانگی ڕابردووش هێرشێكی بۆ سەر كاروانێكی سەربازی ئەمریكی لەناوچەیەكی نێوان دێوانیە و سەماوە گرتە ئەستۆی خۆی.

 

هەر لەمانگی ئایاری ئەم ساڵدا، گروپێك بەناوی كۆمەڵەی تۆڵەی موهەندیس ڕاگەیەنرا كە بۆ یەكەمجار میدیایەكی سەر بەئێران بەیاننامەی دامەزراندنەكەی بڵاو كردەوە، ئەو گروپەش هێرشێك كە 6 مانگی ئایار كرایە سەر بنكەی فاكتۆری سەربازی لەبەغدا و چەند كردەیەكی دیكەی گرتە ئەستۆی خۆی كە لەدژی هێزەكانی ئەمریكا ئەنجامدرابوو.

 

دوای دەركەوتنی ئەو گروپە نوێیانە زۆربەی چالاكیەكانیان لەڕێگەی كەناڵی سابرین نیوز كە كەناڵێكی تیلیگرامە چالاكیەكانیان بڵاو دەكەنەوە.

 

بەپێی وتەی چەند سەرچاوەیەکى ئەمنی، ئەو گروپە نوێیانە پەیوەندیان بەمیلشیا و سەركردەكانی ئەوانەی پێشووەوە هەیە و ناوی گروپەكانیش تەنها بۆ "شاردنەوە و چەواشەكردنن"، چونكە ئەو گروپانە نایانەوێت بەئاشكرا بەردەوامی بەچالاكیەكانیان بدەن بەوپێەی لەسیستمی سیاسی و حكومەتدا بەشدارن.

 

هەندێ سەرچاوەی دیكە دەڵێن "ئەو گروپانە پەیوەندیان بەلایەنێكی دیاریكراوی سیاسیەوە هەیە دوای ئەوەی چەند گروپێكی لەدەستداوە و دووچاری ململانێی ناوخۆی بوون پەنای بردووەتە بەر ئەو كارە و پەیوەندی بەویلایەتی فەقیهى ئێرانیەوە نیە و بەڵكو عێراقییە و ئەو دروشم و ئامڕازە فارسیانەش بۆ تێکەڵکردنى کارتەکان بەكاردەهێنێت".

 

ئەو گروپانەی كە تا ئێستا شوناسیان دیارنییە و بانگەشەی ئەوە دەكەن لەبەرەی بەرخۆدانكاری ئیسلامیدان لەكاتی دەستگیركردنی ئەوس خەفاچی فەرماندەی لیوای ئەبو فەزڵ عەباسی سەر بەحەشدی شەعبی لەشوباتی ساڵی 2019 ەوە زیاتر دەركەوتوون.