گه‌ڕان

Shadow Shadow
سیاسه‌تی

نيشتنەوەى سێ فڕۆكەى ئێرانى دواى تەقينەوەكەى بەيروت لەو شارە دەبێتە جێى پرسيار

2020.08.06 - 22:34
نيشتنەوەى سێ فڕۆكەى ئێرانى دواى تەقينەوەكەى بەيروت لەو شارە دەبێتە جێى پرسيار

ناس کورد- 

دواى چەند كاتژمێرێك لە تەقينەوەكەى بەيروتى پايتەختى لوبنان سێ فڕۆكەى ئێرانى سەربە كۆمپانياكانى سەربە سوپاى پاسدارانى ئێران لە بەيروت نيشتونەتەوە، ئەوەش بووەتە جێى پرسيار بەتايبەتى كە بە ماوەيەكى كەم دواى تەقينەوەكان بووە.

 

ڕۆژنامەى "جيروزاليم پۆست"ى ئيسرائيلى بڵاويكردوەتەوە، ڕۆژانى چوارشەممە و پێنجشەممە، سێ فڕۆكەى ئێرانى لە بەيروتى پايتەختى لوبنان نيشتوونەتەوە، ئەوەش هاوكات بوو لەگەڵ ناردنى هاوكارى مرۆيى بۆ ئەو شارە لەلايەن دەوڵەتانى جيهانەوە.

 

ڕونيشكراوەتەوە، ئەوەى سەيرە ئەوەيە دەزگاكانى ڕاگەياندنى ئێرانى هيچ شتێكيان لەو بارەيەوە باس نەكردوە، كە بەشێوەيەكى سروشتى ئەو دەزگايانە زۆر خێران لە بڵاوكردنەوەى پڕوپاگەندە بۆ هەر دەستكەوتێكى وڵاتەكەيان، بەڵام سەبارەت بەو فڕۆكانە بێدەنگ بوون.

 

ڕۆژنامەكە باسى لەوەشكردوە، كاتى گەيشتنى فڕۆكە ئێرانيەكان بەشێوەيەكى كتوپڕ جێى پرسيارە، لەوانەيە ئێرانيەكان ڕووداوەكە بقۆزنەوە بۆ گواستنەوەى چەك بۆ هاوپەيمانەكانيان لە لوبنان لەسەروو هەمووشيانەوە حزبوڵڵا.

 

تەئكيديشى كردووەتەوە، زۆرێك لە سەركردەكانى ئێران هاوخەمى خۆيان بۆ لوبنانيەكان ڕاگەياندووە، بەڵام هيچ ئاماژەيەكيان بە گەياندنى هاوكارى مرۆيى و تيمى گەڕان و ڕزگاركردن نەكردوە.

 

بەهۆى تەقينەوەكەى بەيروتەوە كە بەگوێرەی زۆرينەى ئەگەرەكان بەهۆى بوونى بڕێكى زۆر مادەى نيترانى ئامۆنيۆمەوە بووە لە يەكێك لە كۆگاكانى بەندەرى بەيروت، تائێستا گيانلەدەستدانى 137 كەس و برينداربوونى زياتر لە پێنج هەزار كەس ڕاگەيەنراوە، هەروەها نزيكەى 300 هەزار كەسيش بێ ماڵ و حاڵ بوون.

 

پێشتريش چەندين زانيارى هەبوون لەسەر ئەوەى كە ئەندامانى حزبوڵڵاى لوبنان ئەو مادەيە دەگوازنەوە و چەندين كەسيشيان لە ناوچە جياوازەكانى جيهان لێ دەستگير كراوە.

 

پێشتر ڕۆژنامەى "تايمز ئۆف ئيسرائيل" بڵاويكردوەتەوە، دەزگاى هەواڵگرى مۆسادى ئيسرائيلى دەسەڵاتدارانى ئەڵمانيايان لەوە ئاگادار كردوەتەوە كە ئەندامانى سەربە حزبوڵڵا سەدان كيلۆ نيتراتى ئامۆنيۆميان لە كۆگايەك لە باشورى ئەڵمانيا هەڵگرتوە، بەهۆى ئەوەشەوە هێزە ئەمنيەكانى ئەو وڵاتە هەڵيانكوتايە سەر كۆگاكە و دەستيان بەسەر ئەو مادەدا گرت.

 

لەلايەكى ترەوە هێزە ئەمنيەكانى بەريتانيا لەساڵى 2019 هەڵيانكوتاوەتە سەر چوار شوێنى حزبوڵڵا لەو وڵاتە و چەند كەسێكيان دەستگير كردوە، ئەوەش دواى ئەوەى ئاشكرا بوون كە بەشێوەيەكى نهێنى مادەى نيتراتى ئامۆنيۆم كۆگا دەكەن لە دەوروبەرى لەندەنى پايتەختدا.

 

سەرەڕاى ئەوەش لە هەمان وڵات و لەساڵى 2015 ژمارەيەك ئەندامى حزبوڵڵا سێ تۆن لەو مادەيەيان لە كيسى سەهۆڵدا هەڵگرتبوو، بەڵام لەلايەن دەسەڵاتدارانەوە ئاشكرا كراوە و دەستى بەسەردا گيرا.

 

هەروەها لە مانگى 8ى ساڵى 2015 دا دەسەڵاتدارانى كوێت سێ كەسيان بە تۆمەتى بوونى پەيوەندى لەگەڵ حزبوڵڵاى لوبنان دەستگر كرد كە چەندين تۆن نيترانى ئامۆنيۆم و چەند كيلۆيەك تەقينەوە و ژمارەيەك چەك و بۆمبيان هەڵگرتبوو و بەنيازبوون بۆ هێرشكردن بەكارى بهێنن.

 

هەر لەو ساڵەدا هێزە ئەمنيەكانى قوبرس دەستيان بەسەر 420 سندوق لە هەمان مادە گرتبوو كە خاوەنەكەى ئەندامێكى حزبوڵڵا بوو، دەسەڵاتدرانى تايلەنديش لەساڵى 2012 دەستيان بەسەر 290 ليتر لە هەمان مادە گرتبوو وە چەند كەسێكيش بەو هۆيەوە دەستگير كران كە ئەندامى حزبوڵڵا بوون.

 

هەر لەساڵى 1994 دەسەڵاتدرانى تايلەند مامەڵەيان لەگەڵ هێرشێكى شكستخواردوو بۆ سەر باڵيۆزخانەى ئيسرائيل لەو وڵاتە كرد، ئەويش لەڕێگەى بارهەڵگرێكەوە كە چەند تۆنێك مادەى نيتراتى ئامۆنيۆم و ديزڵى تێدا بووە.