ناس کورد-
سەرۆككۆمار و سەرۆكوەزیرانی عێراق دیدارێکی تایبەتیان ئەنجامدا و جەختیانکردەوە لەگرنگی چارەسەركردنی كێشە داراییەكانی حکومەتی عێراق و حکومەتی ھەرێم و پاراستنی مافە دەستورییەكانی هاووڵاتیان و مووچەخۆران.
کەناڵی ناس کورد لە تێلیگرام جۆین بکە
ئەمڕۆ پێنجشەممە 6ی ئابی 2020، د. بەرهەم ساڵح، سەرۆککۆماری عێراق و مستەفا كازمی، سەرۆكوەزیران کۆبوونەوە.
بەگوێرەی ڕاگەیەندراوێکی سەرۆکایەتیی کۆماری عێراق، لە کۆبوونەوەکەدا گفتوگۆكرا دەربارەی كۆی بارودۆخی سیاسی و ئەمنی و تەندروستی و ئابووریی وڵات و جەختكرایەوە لەپێویستی ئەنجامدانی هەڵبژاردنی پێشوەختەی پاك و بێگەرد وەك پابەندبوونێک بەکارنامەی حكومەت.
لە تەوەرێکی دیکەدا، هەردوولا جەختیانکردەوە لەگرنگی بەھێزکردنی پەیوەندییەكانی نێوان حكومەتی فیدراڵ و حكومەتی هەرێمی كوردستان و پێویستی چارەسەركردنی كێشە داراییەكان، بەجۆرێک مافە دەستورییەكانی سەرجەم هاووڵاتیان و مووچەخۆرانی عێراق و ھەرێمی کوردستان بپارێزێت.
لە ڕاگەیەندراوەکەدا ئاماژە بەوەشكراوە، سەرۆککۆمار و سەرۆکوەزیران، دووپاتیانکردەوە لە پێویستی راوەدونانی پاشماوەکانی تیرۆر و بەردەوامیدان بە سەرکەوتنەکانی هێزە ئەمنییەکان و پارێزگاریکردن لە دەستکەوتەکان و چەسپاندنی ئاسایش و ئارامی لە تەواوی شارەکانی عێراقدا.
ئەوەشخراوەتەڕوو، ھاوکات گفتوگۆیشکرا لەبارەی چۆنیەتی بەرەنگاربوونەوەی پەتای کۆرۆنا و پشتیوانیکردنی لەلایەنە تەندروستییەکان و زامنکردنی سەلامەتی و تەندروستی هاووڵاتیان، هەروەها خستنەرووی چارەسەر و ڕێوشوێنی پێویست بۆ دەربازبوون لە قەیرانی ئابووری و كەمكردنەوەی خەرجی حكومەت و زیادكردنی سەرچاوەی داھاتی دەوڵەت و چەسپاندنی بنەمای چاكسازی لە وڵاتدا.
بەگوێرەی ڕاگەیەندراوەکەدا، لە کۆتایی گفتوگۆکەدا، پەرەسندنە نێودەوڵەتی و هەرێمایەتییەكان و رۆڵی جەمسەری عێراق لە چەسپاندنی ئاشتی و سەقامگیری لە ناوچەكەدا گفتوگۆی لە بارەوە كرا.
