گه‌ڕان

Shadow Shadow
سیاسه‌تی

بەیروت 2020- تەکساس 1947.. تەقینەوە دووبارەبووەکان 

2020.08.06 - 10:34
بەیروت 2020- تەکساس 1947.. تەقینەوە دووبارەبووەکان 

ناس کورد- 

70 ساڵ لەمەوبەر هاوشێوەى تەقینەوەکەى بەندەرى بەیروت كە بەهۆی نیتراتی ئەمۆنیۆمەوە ڕوویدا، لەولایەتی تەكساسی ئەمریكاش بەهەمان هۆکار تەقینەوەیەک ڕوویدا و زیانە مادی و گیانیەكانیشی لێكەوە زۆر نزیكن.

 

ساڵی 1947 دوای ئەوەی كەشتیەكی فەڕەنسی لەیەكێك لەبەندەرەكانی تەكساس لەنگەر دەگرێت، گڕ دەگرێت و 2 هەزار و 300 تۆن نیترانی ئەمۆنیۆمی تێدا دەبێت، ئەو مادەیەی كە بووە هۆی تەقینەوە گەورەكەی بەندەری بەیروت.

 

گڕگرتنى کەشتییەکە بەهۆى جگەرەوە بوو و دوکەڵێکى زۆر بەسەر کەشتییەکەدا بەرزبۆوە و بڵێسەى ئاگر گەیشتە كۆگای نیتراتی ئەمۆنیۆمەكە لەسەر كەشتیەكە و کۆگاکەش گڕى گرت و تەقییەوە و كەشتییەكی نەوتهەڵگری نزیکیشى بە بڵیسەى ئاگرەکەى دەسوتێت و ئەوەش دەبێتە هۆی برینداربوون و كوژران و ئاوارەبوونی هەزاران خەڵكی دانیشتوانی ناوچەكە.

 

ڕوداوەكەی تەكساس 581 كوژراو و 5 هەزار برینداری لێکەوتەوە و بەگەورەترین كارەساتی نا ئەتۆمی دادەنرێت لەو سەردەمەدا.

 

دەسەڵاتدارانی ئەمریكا زیانەكانیان بە 100 ملیۆن دۆلاری ئەو كاتە خەمڵاند ئەمە جگە لەوەی زیانی نەوتە سوتاوەكەش دەگەیشتە 500 ملیۆن دۆلار سەرباری وێرانبوونی چەندین كارگە و ماڵ و زیانگەیاندن بەهەزاران ئۆتۆمبێل.

 

لەنێوان تەقینەوەکەى بەیروت لەساڵی 2020 و تەقینەوەکەى تەكساس لەساڵی 1947 چەند دیمەنێكی دووبارە بووەوە هەیە، وەک دیمەنى سەرسوڕمانى خەڵک لەبەرامبەر رووداوەکە و ئاوارەبوونى خەڵک و هەڵهاتنى خەڵک لەنێو شەقامەکان و پڕبوونى نەخۆشخانەکان بە بریندار و دیمەنى وێرانبوون و خاپوربوونى ماڵ و باڵەخانەکان.

 

سەرباری لێكچوونەكانی ئەو دوو ڕوداوە، بەڵام هۆكارەكەی كەنیتراتی ئەمۆنیۆمە وەكو خۆی دەمێنێتەوە و زیاتر بەدەردەكەوێت كە ئەو مادەیە دوو كارەساتی دروستكردووە لەدوو كاتی جیاوازدا كە 7 دەیەی نێوانیانە بەڵام لەناوەڕۆكدا لێكدەچن.