گه‌ڕان

Shadow Shadow
سیاسه‌تی

لە بۆردومانێكى هاوپەيمانان لە چياى حەمرين چوار چەكدارى داعش كوژران

2020.08.05 - 23:21
لە بۆردومانێكى هاوپەيمانان لە چياى حەمرين چوار چەكدارى داعش كوژران

ناس کورد-

شانەى ڕاگەياندنى ئەمنى عێراق بڵاويكردەوە، فڕۆكەكانى هاوپەيمانى نێودەوڵەتى بۆردومانى چياى حەمرينيان كردوە و لە بۆردومانەكەدا چوار چەكدارى ڕێكخراوى داعش، كوژراون.

 

شانەى ڕاگەياندنى ئەمنى لە ڕاگەیەندراوێکدا ئاماژەى بەوەداوە، بە فەرمانى سەركردايەتى پڕۆسە هاوبەشەكان فڕۆكەكانى هاوپەيمانان بۆردومانى زنجيرە چياى حەمرينيان لە چوارچيێوەى كەرتى كەركوك كردوە.

 

ڕونيشكراوەتەوە، بەهۆى بۆردومانەكەوە چوار چەكدارى ڕێكخراوى داعش كوژراون و دواى بۆردومانەكەش هێزێكى فيرقەى پێنجى پۆليسى فيدراڵى كێوماڵى ناوچەكەيان كردوە و مۆڵگەيەكيان دۆزيوەتەوە كە 20 بۆمبى چێنراوى تێدا بووە كە ئامادەبوون بۆ تەقاندنەوە.

 

شانەكە ئەوەشى ئاشكرا كردوە، بەپێى زانياريەكان ئەو چەكدارانە ئەو بۆمبانەيان ئامادەكردوە تا دژى هێزە ئەمنيەكان و هاووڵاتيانى مەدەنى بەكاريان بهێنن.

 

ماوەى چەند مانگێكە چەكدارانى رێكخراوى داعش لە چەندين ناوچەى عێراق كردەوەكانيان زياد كردووە و چەندين هاووڵاتى مەدەنى و ئەندامى هێزە ئەمنيەكان و سەركردەى سەربازى كوژراون، هێزە ئەمنيەكانيش پرۆسەكانيان دژى ئەو چەكدارانە چڕ كردوەتەوە و دەيانيان لێ كوژراوە و دەيانيشيان لێ دەستگيركراوە.