گه‌ڕان

Shadow Shadow
سیاسه‌تی

ئەنجومەنى ئەوروپا داوا لەئەردۆگان دەكات كۆتایی بە ئەشكەنجەی ناو زیندانەكان بهێنێت

2020.08.05 - 22:56
ئەنجومەنى ئەوروپا داوا لەئەردۆگان دەكات كۆتایی بە ئەشكەنجەی ناو زیندانەكان بهێنێت

ناس کورد- 

شارەزایانی ئەنجومەنی ئەوروپا داوا لەسەرۆككۆماری توركیا دەكەن، لەوڵاتەكەیدا كۆتایی بەئازار و ئەشكەنجە و توندوتیژی لەدژی زیندانیەكان بهێنرێت.

 

ماڵپەرى ئەحوالی توركی بڵاوی كردەوە، لیژنەی قەدەغەكردنی ئازار و ئەشكەنجەی سەر بە ئەنجومەنی ئەوروپا لەمیانی سەردانێكیدا بۆ توركیا لەساڵی 2019 ژمارەیەك ڕاپۆرتی بەدەستگەیشتووە لەسەر ئەنجامدانی ئازار و ئەشكەنجە لەلایەن پۆلیسی ئەو وڵاتە لەدژی ژنان و پیاوان و تەنانەت منداڵانیش كە بەمدواییانە لەو وڵاتەدا دەستگیر كراون.

 

بەگوێرەى ئەو ڕاپۆرتانە ئەوانەی دوچاری دۆخەكە كراونەتەوە ئامانج لێی بۆ دانپێدانانی بەزۆرەملێی یاخود بۆ تۆڵەكردنەوە بووە.

 

لیژنەكە دەشڵێت، پێویستیان بەوەیە گوێیان لەپەیامێكی ڕوون و ڕاشكاو بێت لەلایەن بەرزترین بەرپرسی سیاسی ئەو وڵاتەوە بەتایبەتی سەرۆككۆمار كە ڕێگە نەدرێت بەخراپ مامەڵەكردن لەگەڵ زیندانیاندا.

 

لەكاردانەوەی بڵاوكردنەوەی ڕاپۆرتەكەی ئەنجومەنی ئەوروپاشدا بەرپرسانی توركیا ئەو كارەیان ڕەتكردەوە كە بۆ دانپێدانی زۆرەملێی توندوتیژی بەكارهاتبێت.

 

بەگوێرەى وتەی سێژین تانریكۆلۆ ئەندامی لیژنەی مافەكانی مرۆڤ لەپەرلەمانی توركیا ئازار و ئەشكەنجە لە زنیدانەكانی توركیا بەرنامە بۆ داڕێژراوە و لەساڵی 2018  زیاتر لە 3 هەزار حاڵەت ڕوویانداوە و ساڵی 2019 زیاتر لە هەزار حاڵەتی ئازار و ئەشكەنجە هەبووە ئەوەش نەك تەنها لەزیندانەكانی ئەستەنبۆل و ئەنكەرە  كەخراونەتە لیستی 10 خراپترین زیندانەكانی جیهانەوە، بەڵكو لەچەندین شوێنی دیكە ڕوویانداوە.