گه‌ڕان

Shadow Shadow
سیاسه‌تی

عێراقيەكان لە دوبارەبونەوەى كارەساتەكەى بەيروت دەترسن

چالاکوانانى عێراق هەڵمەتێکیان دەستپێکرد ’چەکى میلیشیاکان لە ماڵەکانمان دووربخەنەوە’ 

2020.08.05 - 21:24
چالاکوانانى عێراق هەڵمەتێکیان دەستپێکرد ’چەکى میلیشیاکان لە ماڵەکانمان دووربخەنەوە’ 

ناس کورد- 

كارەساتەكەى بەندەرى بەيروت جارێكى تر تيشكى خستەوە سەر بوونى كۆگاى چەك و تەقەمەنى ميليشياكانى سەربە ئێران لە شارەكانى عێراق كە لە ناوچەكانى نيشتەجێبون هەڵگيراون لە بەغدا و شارەكانى تر.

 

عێراقيەكان لە ڕوودانى كارەساتێكى هاوشێوە دەترسن، ئەوەش بەهۆى گوێنەدانى گروپە چەكداريەكان بە ژيانى هاووڵاتيانى مەدەنى و بەكارهێنانى ناوچەكانى نيشتەجێبون بۆ ئەنجامدانى چالاكيەكانيان.

 

ڕاستەوخۆ دواى ڕوداوەكەى بەيروت چالاكوانانى عێراقى لە تۆڕە كۆمەڵايەتيەكان چەندين هاشتاگيان بڵاوكردوەتەوە وەك "#دورخستنەوەى_چەك_لە_شارەكان" و "#چۆڵكردنى_شارەكان_لە_كۆگاى_چەكەكان"، ئەوەش بە ئامانجى پەستان خستنە سەر دەسەڵاتداران بۆ ئەوەى جوڵەى خێرا بكەن پێش ڕودانى هەر كارەساتێك.

ئەو چالاكوانانە و عێراقيەكان بەردەوامن لە بڵاوكردنەوەى وێنەى تەقينەوەكەى بەيروت و هۆشدارى دەدەن لە دوبارە بونەوەى ئەو ديمەنانە، بەڵام ئەمجارەيان لە عێراق، ئەويش ئەگەر دەسەڵاتداران درەنگ بكەون لە گرتنەبەرى ڕێوشوێنى خۆپاراستن.

 

هەروەها وێنەى ئەو وێرانكاريانەش بڵاودەكرێنەوە كە بەر چەندين خانوو و تەلار كەوتن لەناوچەى سەدر ئەويش دوو ساڵ پێش ئێستا، كاتێك كۆگايەكى چەك و تەقەمەنى يەكێك لە ميليشياكانى نزيك لە ئێران تەقيەوە.

تەقينەوەكە لەناو حسێنيەيەكدا بوو لە كەرتى 10ى شارى سەدر و لەمانگى 6ى ساڵى 2018 ڕوويدا، بەهۆيەوە 18 كەس گيانيان لەدەستدا و دەيانى تريش بريندار بون.

 

هەر بەهۆى ڕووداوەكەوە خوێندنگەيەكى سەرەتايى و دەيان خانوى نزيكى كۆگاكەى چەك وێرانبون، ئەوەش سەرەڕاى دروستكردنى چاڵێك بە تيرەى 25 مەتر.

 

لەماوەى چەند مانگى ڕابردوشدا زنجيرەيەك تەقينەوە لە ژمارەيەك كۆگاى چەك و بنكە و بارەگاى گروپە چەكداريەكانى سەر بە حەشدى شەعبى كە زۆرينەيان سەربە كۆمارى ئيسلامى ئێرانن ڕوياندا.

هەر لەمانگى هەشتى ساڵى ڕابردوو تەقينەوەيەك لە كۆگايەكى چەكدارى كەتيبەكانى حزبوڵڵا لە باشورى شارى بەغدا ڕويدا و بەهۆى ئەوەشەوە چەند موشەكێك تەقينەوە و بوە هۆى كوشتنى كەسێك و برينداربونى 29 كەسى تر، بەپێى لێكۆڵينەوەكانى پۆليسى عێراقيش تەقينەوەكە بەهۆى خراپى كۆگاكردن و بەرزبونەوەى پلەكانى گەرماوە بوە.