گه‌ڕان

Shadow Shadow
سیاسه‌تی

هاووڵاتى عێراقيشى تێدايە

لە تەقينەوەكەى بەيروتدا هاووڵاتيانى چەندين وڵاتى تر برینداربوون و گیانیانلەدەستداوە

2020.08.05 - 20:20
لە تەقينەوەكەى بەيروتدا هاووڵاتيانى چەندين وڵاتى تر برینداربوون و گیانیانلەدەستداوە

ناس کورد- 

قوربانيانى تەقينەوەكەى شارى بەيروت تەنها لوبنانيەكان نەبوون، هاووڵاتيانى چەندين وڵاتى تريشى تێدايە ئەوەش بەهۆى ئەوەى ئەو شارە پێشوازى لە هەموو ڕەگەزە جياوازەكان دەكات كە ئارەزوو دەكەن سەردانى بكەن.

 

چەندين ڕێكخراو و دەوڵەتى جيهان ئەوەيان ئاشكرا كردوە كە هاووڵاتيانيان لە تەقينەوەكەدا گيانيان لەدەستداوە ياخود بريندار بوون، لەوانەش "عێراق، ميسر، مەغريب، سوريا، توركيا، هۆڵەندا، كەنەدا، ئوستراليا، قوبرس، يەمەن، ڕوسيا، بەلجيكا، ئيتاڵيا و كازاخستان، هەروەها ژمارەيەك كارمەندى رێكخراوى نەتەوە يەكگرتوەكان و نێردە دبلۆماسيەكانيش لەناو قوربانيان و بريندارەكاندان.

 

لاى خۆيەوە باڵيۆزخانەى ميسر لە بەيروت بڵاويكردوەتەوە، دوو هاووڵاتى وڵاتەكەى بەهۆى تەقينەوەكەوە گيانيان لەدەستداوە و هەروەها هاووڵاتيەكى تريش تائێستا بێسەروشوێنە كە لە نزيك شوێنى تەقينەوەكەوە بووە.

 

هەروەها كۆمەڵگەى مانگى سورى عێراقى ئاشكرايكردوە، لە تەقينەوەكەدا 10 هاووڵاتى عێراقى بريندار بوون بەڵام بارودۆخى تەندروستيان جێگيرە و لەئێستادا چارەسەر وەردەگرن.

 

باڵيۆزخانەى يەمەنيش لە لوبنان باسى لەوەكردوە، دوو هاووڵاتى وڵاتەكەى بەسوكى بريندار بوون، وەزارەتى كاروبارى دەرەوەى ئەردەنيش جەختى كردوەتەوە كە دوو هاووڵاتى ئەوانيش بريندار بوون و بەردەوام ئاگادارى بارودۆخى ئەردەنيەكانن لە لوبنان.

 

باڵيۆزخانەى مەغريب لە بەيروت دەڵێت، هاووڵاتيەكى كە ڕەگەزى مێيە و لەڕێكخراوى نەتەوە يەكگرتوەكان لە بەيروت كار دەكات چەند شوێنێكى قاچى تووشى شكان بووە و لەئێستادا لەژێر وەرگرتنى چارەسەردايە.

 

باڵيۆزخانەى توركياش ئەوەى نەشاردوەتەوە كە، دوو هاووڵاتى توركى بەهۆى تەقينەوەكەوە بريندار بوون و لە نزيكەوە ئاگادارى بارودۆخيانن، كەنەداش ئاشكرايكردوە كە "نزار نەجاريان" ئەميندارى گشتى كەتيبەكانى لوبنان كە لە تەقينەوەكەدا گيانى لەدەستداوە ڕەگەزنامەى وڵاتەكەيانى هەبووە ئەوەش سەرەڕاى ڕەگەزنامەى لوبنانى.

 

سكۆت مۆريسۆن سەرۆكوەزيرانى ئوستراليا ئاماژەى بەوەداوە، باڵيۆزخانەى وڵاتەكەى لە بەيروت زيانى زۆرى بەركەوتوە بەهۆى تەقينەوەكەوە بەڵام كارمەندانى باڵيۆزخانەكە سەلامەتن و ناوچەكەيان جێهێشتوە، بەڵام هاووڵاتيەكى ئوسترالى لە تەقينەوەكەدا گيانى لەدەستداوە.

 

ئاژانسى هەواڵى قوبرسيش باسى لەوە كردوە، دبلۆماسيەكى باڵاى وڵاتەكەى لە تەقينەوەكەدا بريندار بووە، هەروەها "فەرحان حەق" جێگرى وتەبێژى ئەمنيدارى گشتى ڕێكخراوى نەتەوە يەكگرتوەكان لە لێدوانێكى تەلەفزيۆنيدا ئاشكراى كردوە، 48 كارمەندى رێكخراوەكەيان و 27 ئەندامى خێزانەكانيان و 3 سەردانيكەريشيان بريندار بوون.

 

باڵيۆزخانەى ڕوسياش لە بەيروت لەبەياننامەيەكدا دەڵێت، بارەگاى باڵيۆزخانەكە زيانى زۆرى بەركەوتوە و كارمەندێكيان بەسوكى بريندار بووە، ئەوەش بەهۆى پارچەى شوشەوە.

 

باڵيۆزخانەى كازاخستانيش جەختى كردوەتەوە كە باڵيۆزى ئەو وڵاتە بريندار بووە و زيانى زۆريش بەر بارەگاى باڵيۆزخانەكە كەوتوە، باڵيۆزخانەى هۆڵەنداش برينداربونى 5 كارمەند و ئەندامانى خێزانەكانيانى ڕاگەياندووە.

 

بەلجيكاش ئاماژەى بەوە کردوە كە هاووڵاتيەكى بەهۆى تەقينەوەكەوە گيانى لەدەستداوە و بارەگاى باڵيۆزخانەكەشيان زيانى زۆرى بەركەوتوە و دوو هاووڵاتى تريشيان بريندار بوون بەهۆى پارچەى شوشەوە.

 

ئاژانسى هەواڵى "ئاكى" ئيتاڵيش بڵاويكردوەتەوە، كەسايەتيەكى سەربازى ئيتاڵى بە سوكى بريندار بووە لە قۆڵيدا، هەروەها بارەگايەك كە 12 سەربازى ئيتاڵى تێدابووە بەهۆى بەهێزى شەپۆلى تەقينەوەكەوە زيانى بەركەوتوە.

 

هەروەها هێزەكانى پاراستنى ئاشتى نێودەوڵەتى "يۆنيفێڵ" لە لوبنان ڕايگەياندووە، ژمارەيەك سەربازى بەهۆى تەقينەوەكەوە بريندار بوون هەروەها كەشتيەكيشيان كە سەر بە تيمى كارى دەرياييە زيانى بەركەوتوە و ئەو سەربازانەشى بريندار بوون لەسەر كەشتيەكە بوون.

 

ڕونيشكراوەتەوە، سەربازەكان گواستراونەتەوە بۆ نەخۆشخانە بۆ وەرگرتنى چارەسەر و لەئێستادا بارودۆخەكە هەڵدەسەنگێنن.