گه‌ڕان

Shadow Shadow
سیاسه‌تی

’پارتی هەژموونی خۆی لەشەنگال لەدەستداوە’

ئەندامێكی لیژنەی كەوتنی موسڵ: تەنها گەریلا بەرگرى لە ئێزیدییەکان کرد 

2020.08.05 - 19:56
ئەندامێكی لیژنەی كەوتنی موسڵ: تەنها گەریلا بەرگرى لە ئێزیدییەکان کرد 

ناس کورد- 

ئەندامێكی لیژنەی لێكۆڵینەوە لەكەوتنی موسڵ ڕایگەیاند، لەكاتی داگیرکردنى شەنگال لەلایەن داعشەوە تەنها هێز لەسەر زەوی گەریلاكانی پەكەكە بوون بەفریای ئێزدییەكان كەوتن و پێشمەرگەش كشانەوە و ئەوانیان ڕادەستی ئەو چارەنوسە ڕەشە كرد. 

 

عەبدولڕەحمان لوێزی، نوێنەری پێشووی شاری نەینەوا لەپەرلەمانی عێراق و ئەندامی لیژنەی لێكۆڵینەوە لەكەوتنی موسڵ ئاماژەى بەوە کرد، دوای داگیرکردنى نەینەوا لەلایەن داعشەوە هێزەكانی پێشمەرگە چوونە ناو بارەگای فەرماندەی فیرقەی سێی سوپای عێراقەوە لەتەمارات و دەستیانگرت بەسەر سەرجەمى كەلوپەلە سەربازییەكانى سوپاى عێراق و لەسیناریۆیەكی هاوشێوەشدا لەفیرقەی 12ى كەركوك بازگەی پێشمەرگە بەدووری تەنها 50 مەتر لەداعشەوە دوور بوون و هەقیان بەسەر یەكترەوە نەبوو.

 

ئاماژەی بۆ ئەوەش كرد، قەبارەی هێزەكانی پێشمەرگە لەپارێزگای نەینەوا بەپێی فیرقە بوو كە لەلیوا گەورەترە بەچەندین بار، لیوا لەهەریەك لەشارۆچكەكانی مەخمور و حەمدانیە و تەكلكێف و شێخان و شەنگال بوو، لیوایەك لەسەر دەشتایەكانی نەینەوا بوو لیوای سەرۆكایەتی بوو پێیدەوترا زێرەڤانیی و لە6 ساڵ پێش ئێستادا  پێشمەرگە پاشەكشەی كرد لەشەنگال بێ ئەوەی فیشەكێك بتەقێنن و ئێزدییەكانیان ڕادەستی ئەو چارەنوسە شومە كرد.

 

ئەوەشی ڕوونكردوەتەوە، ئەوەی لەشەنگالدا مایەوە یەكینەیەكی بچوكی گەریلاكانی پەكەكە بوو كە لەسەرچیاكەی شەنگال مانەوە و خەڵكی مەدەنیش بەرەو لای ئەوان بۆ سەر چیاكە دەڕۆشتن و لەوێ گەریلاكان خەڵكیان لە پەلامارەكانی داعش دەپاراست بۆیە حكومەتی عێراق ناچاربوو مامەڵەیان لەگەڵ بكات بەهۆی ئەوەی تەنها هێزبوون لەسەر زەوی دەستگیرۆی ئێزدییەكانیان كرد.

 

لوێزی باسی لەوەش كردووە، پەكەكە و ژمارەیەك لەئێزدییەكان لەچیاكەوە بەرەو خاڵی سنوری فیشاخبور بۆ دهۆك پەڕینەوە و بەوەش ئێزدییەكان قەرزاری پەكەكە بوون و ژمارەیەكیشیان لەژێر ناوی یەكینەكانی پاراستنی شەنگال چوونە ڕیزەكانیانەوە بەڵام پارتی دیموكراتی كورستانیش حكومەتی فیدراڵ بەوە تۆمەتبار دەكات كە مامەڵە لەگەڵ پەكەكەدا دەكات.



پەرلەمانتارەكەی پێشووی شاری نەینەوا ئەوەشی خستووەتە ڕوو، درێژكردنی دەستی تۆمەت لەلایەن پارتیەوە بۆ حكومەتی فیدراڵ بەمامەڵەكردنی لەگەڵ پەكەكەدا لەسەر ئەرزی واقیع بەهۆی ئەوەیە كە پارتی هەژموونی خۆی لەشەنگال لەدەستداوە لەبەرژەوەندی یەكینەكانی پاراستنی شەنگالدا و ئەوانییش پەنایان بردە بەر ئەردۆگان بۆ ئەوەی فریایان كەوێت ئەوەش ئەو سیناریۆیەی بیر خەڵكی هێنایەوە كە پارتی بۆ لێدان لەنەیارە كوردەكانی پەنای بردە بەر سوپای سەدام.

 

ئەوەش لەكاتێكدایە، چەند میدیایەك ئەوەیان بڵاوكردەوە، مەسعود بارزانی سەرۆكی پارتی دیموكراتی كوردستان لەوتەیەكیدا لەسەر جینۆسایدى شەنگال پەنجەی تۆمەتی بۆ كابینەی پێشووی حكومەتی عێراق درێژ كردووە و باسی لەوە كردووە شەنگال ڕادەستی خەڵكی دیكە كراوە نەك ئەوان.