گه‌ڕان

Shadow Shadow
سیاسه‌تی

باس لە پلانى جێگرەوە دەکرێت

خوێندنى ئەمساڵ لەوادەى خۆیدا دەستپێدەکات؟

2020.08.05 - 11:51
خوێندنى ئەمساڵ لەوادەى خۆیدا دەستپێدەکات؟

ناس کورد-

 

وەزارەتى پەروەردەى حکومەتى هەرێمى کوردستان چاوەڕوانى لیژنەى باڵاى بەرەنگاربوونەوەى کۆرۆنایە بۆ بڕیاردان لەبارەى خوێندنى ساڵى نوێوە، کە تائێستا دیار نییە لەوادەى خۆیدا دەستپێدەکات یاخود نا.

 

کەمتر لەدوو مانگى دیکە وادەى دەستپێکردنى ساڵى نوێی خوێندنە لە هەرێمى کوردستان، بەڵام بەهۆى بەردەوامى بڵاوبوونەوەى کۆرۆناوە دیارنییە کەى دەستپێدەکات.

 

رێکان کەمال جەرجیس وتەبێژى وەزارەتى پەروەردە بە ناس کوردى ڕاگەیاند "چاوەڕوانى هەڵسەنگاندنى دۆخى تەندروستین لەلایەن لیژنەى باڵاى روبەڕوونەوەى کۆرۆناوە بۆ بڕیاردان لەسەر خوێندنى ئەمساڵ".

 

وتیشى "دواى تەواوبوونى تاقیکردنەوە وەزارییەکان و دەرچوونى ئەنجامەکان، هەڵسەنگاندن بۆ دۆخەکە دەکرێت و بڕیارى پێویستى لەبارەوە دەدرێت".

 

پڕۆسەى خوێندنى ئەمساڵ لەهەرێمى کوردستان بەهۆى بڵاوبوونەوەى کۆرۆناوە بەشێکى پەکیکەوت و وەزارەت بڕیارى جیاجیایدا بۆ تەواوکردنى وەرزى خوێندن، لەرێگەى خوێندنى ئەلیکترۆنى و دەرچوونى خوێندکاران.

 

ئالان حەمە سەعید وەزیرى پەروەردە ئەمڕۆ لەکۆنفرانسێکى رۆژنامەنوسیدا ڕایگەیاند، سەرقاڵى ئامادەکردنى بەرنامەیەکن لەبارەى چۆنیەتى دەستپێکردنى خوێندن و پێشکەشى ئەنجومەنى وەزیرانى دەکەن.

 

جەختیشیکردەوە، خوێندنى ئەمساڵ هاوشێوەى ساڵى ڕابردوو رەهەندى تەندروستى هەیە، پێویستیان بەوەیە رەوشەکە هەڵسەنگێنرێت، تا لەکۆبوونەوەى ئەنجومەنى وەزیراندا بڕیارى لەسەر بدرێت. 

 

لە ئایارى ئەمساڵیشدا ئالان حەمە سەعید لە وتەیەکدا لە کۆبوونەوەى پەرلەمانى کوردستاندا ڕایگەیاندبوو، دەبێت پلانەکانیان بۆ گەرەنتیکردنى خوێندنى ساڵى داهاتووش بێت، چونکە ئەگەر شەپۆلى دووەمى کۆرۆنا لە پایزدا روو لە هەرێم بکات، ئەوا دەبێت پلان دابنێن بۆرزگارکردنى پڕۆسەى خوێندنى ساڵى داهاتوو.

 

لەئەگەرى دەستپێنەکردنەوەى پڕۆسەى خوێندن لەوادەى خۆیدا، پێدەچێت وەزارەت پەنا ببات بۆ خوێندنى ئەلیکترۆنى، کە بۆ تەواوکردنى پڕۆسەى خوێندنى ئەمساڵیش پشتى پێبەست.

 

گەلاوێژ عوبێد بڕیاردەرى لیژنەى پەروەردەو خوێندنی باڵاو توێژینەوەی زانستی لە پەرلەمانى کوردستان بە ناس کوردى ڕاگەیاند " ئامادەکاریی دەکرێت بۆ کردنەوەى قوتابخانەکان مەگەر دۆخەکە زۆر خراپ بێت ئەوکات پەنا بۆ رێگەى جێگرەوە دەبرێت".

 

وتیشى "هەر بڕیارێک لەبارەى دەستپێکردنى خوێندن پەیوەستە بە دۆخى کۆرۆناوە، هەندێ پێشبینى هەیە لەبارەى دابەزینى ئامارەکە لەم مانگەدا، کە ئەگەر راست دەربچن ئاماژەیەکى ئەرێنى دەبن بۆ ساڵى نوێی خوێندن".

 

گەلاوێژ عوبێد پێیوایە، لەئەگەرى دەستپێنەکردنى ساڵى نوێی خوێندن، رەنگە بژاردەى گونجاو خوێندنى ئەلیکترۆنى بێت، بۆ ئەوەى پڕۆسەکە رزگاربکرێت.