گه‌ڕان

Shadow Shadow
سیاسه‌تی

فڕۆکەکانى تورکیا سنورى ماوەت بۆردومان دەکەن

2020.08.04 - 15:54
فڕۆکەکانى تورکیا سنورى ماوەت بۆردومان دەکەن

ناس کورد-

فڕۆکە جەنگییەکانى تورکیا پێش نیوەڕۆى ئەمڕۆ سنورى قەزاى ماوەتیان لە پارێزگاى سلێمانى بۆردومانکرد و زیانى ماددى لێکەوتەوە.

 

کامەران حەسەن، قایمقامى قەزاى ماوەت بە ناس کوردى ڕاگەیاند، فڕۆکە جەنگییەکانى تورکیا دووجار کاتژمێر 11ى سەرلەبەیانى بۆردومانى سنورى گوندى گەڵاڵەیان کردووە کە 25 کیلۆمەتر لە سەنتەرى قەزاى ماوەتەوە دوورە. 

 

وتیشى "بۆردومانەکە زیانى گیانى لێنەکەوتووەتەوە و تەنها زیانى ماددى هەبووە، روبەرێکى زۆرى دارستان و رەز و باخ سوتاون".

 

ئەمە یەکەمجار نییە سنورى ناحیەى ماوەت لەلایەن فڕۆکە جەنگییەکانى تورکیاوە بۆردومان دەکرێت، کە جگە لە زیانى ماددى هەندێکجار زیانى گیانیشیان لێکەوتوەتەوە.

 

بۆردومانەکان لەناوەڕاستى مانگى حوزەیرانەوە چڕبونەتەوە بۆ سەر ناوچە سنورییەکانى هەرێمى کوردستان، دواى ئەوەى سوپاى تورکیا بە پاساوى هێرشکردنە سەر پەکەکە لە ناوچەکانی قەندیل و دەوروبەری لەهەرێمی کوردستان دوو ئۆپڕاسیونی سەربازی بەناوەکانی ( چڕنووکی داڵ و چنگی پڵنگ)ى ڕاگەیاند.

 

لە 25ی مانگی ڕابردوودا بەهۆى بۆردومانێکى ئاسمانى تورکیاوە کەلەڕێگەی فڕۆکەیەکی بێ فڕۆکەوانەوە ئەەنجامدرا بۆ سەر ناوچەی گەشتیاری (کونەماسى) لە پارێزگای سلێمانی شەش هاوڵاتی مەدەنى کە لە شوێنی ڕووداوەکە بوون بە سەختی برینداربوون.

 

کۆتایی مانگى ڕابردوو ڕێکخراوی هیومان ڕایتس وۆچ، تورکیای بە "ملهوڕی و سەرکێشی و گوێنەدان بەژیانی هاووڵاتیانی سیڤیل" لەکاتی ئەنجامدانی کردە سەربازییەکانیدا تۆمەتبارکرد و ئاماژەی بەوەشکردبوو، هێرشەکەی بۆ سەر ناوچەی کونەماسی لە پارێزگای سلێمانی باشترین نمونەیە.  

  

بەلقیس والی، لێکۆڵەر لەبەشی قەیرانەکان و کێشەکانی سەر بە ڕێکخراوی هیومان ڕایتس وۆچ ڕایگەیاندبوو "هێرشە ئاسمانییەکەی تورکیا بۆ سەر ناوچەیەکی گەشتیاری پڕ لەخەڵکی سیڤیل لە پارێزگای سلێمانی سەرباری ئەوەی بوو بەهۆی کوشتنی چەکدارێک، بەڵام لە هەمانکاتدا ژمارەیەک هاووڵاتی سیڤیل کە لەو ناوچەیەدابوون دووچاری مەترسی بوونەوە و برینداربوون".  

  

والی ئاماژەی بەوە شکردبوو "ئەگەری هەبوو بەهۆی ئەو هێرشەی تورکیاوە بۆ سەر ئەو ناوچەیە ڕووداوێکی نەخوازراوی گەورەتری لێبکەوتایەتەوە، نەدەبو ئەو چەکدارانەش لەو شوێنەدا بوونایە و ژیانی هاووڵاتیان بخەنە مەترسییەوە".