گه‌ڕان

Shadow Shadow
سیاسه‌تی

چۆمان؛ فڕۆکەیەکی بێ فڕۆکەوان خانویەکی بۆردومان کرد

2020.08.03 - 15:06
چۆمان؛ فڕۆکەیەکی بێ فڕۆکەوان خانویەکی بۆردومان کرد

ناس کورد- ئاکۆ حەمەد رابی

ئەمڕۆ (دووشەممە) فڕۆکەیەکی بێ فڕۆکەوان خانویەکى لە گوندی دێگەی ناحیەی سمیلانی قەزای‌ چۆمان بۆردومان کرد، بەڕێوەبەری ناحیەکەش دەڵێت، نازانین زیانی گیانی هەبوە، یاخود نا چونکە ناتوانین نزیکی شوێنەکە بکەوین.

 

شاخەوان حسێن، بەڕێوەبەری ناحیەی سمیلان بە ناس‌ کوردی ڕاگەیاند، فڕۆکەیەکی بێ فڕۆکەوان خانویەکی لە گوندی دێگەی ناحیەی سمیلان بۆردومانکرد و  بەشێکی زۆری خانوەکە ڕوخاوە و ئاسەواری‌ بۆردومانەکەشی پێوە دیارە.

 

لەبارەی زیانەکانیشەوە ئاماژەی بەوەکرد ، جارێ نازانن کە ئایا بۆردومانی فڕۆکە بێ فڕۆکەوانەکە زیانی گیانی هەبوە یاخود نا، چونکە لەبەر مەترسی و سەلامەتی ناهێڵن هیچ کەسێک بە هێزە ئەمنیەکانیشەوە نزیکی شوێنەکە بکەونەوە.

 

بەڕێوەبەری ناحیەی سمیلان باسی لەوەشکرد کە ئێستا دۆخی ناوچەکە ئارامەو هیچ جموجۆڵێکی نائاسایی بەدیناکرێت.

 

بە پێی وتەی سەرچاوەیەک پێدەچێت پێشمەرگەکانی یەکێک لە هێزە ئۆپزسیۆنە کوردیەکان لەنێو خانوەکە یاخود لەدەوروبەری خانوەکە بووبن، بەڵام تائێستا ئەمە بەفەرمی پشتڕاست نەکراوەتەوە.

 

ناحیەی سمیلان سەر بەقەزای چۆمانە لەدەڤەری باڵەکایەتی، ناوچەکە شوێنێکی سنوریەو نزیکە لە لوتکە چیای هەڵگورد کە بەرزترین لوتکە چیایە لە عێراق و هەرێمی کوردستان. لوتکەکە دەڕوانێت بەسەر چەند شارێکی ڕۆژهەڵاتی کوردستان.