گه‌ڕان

Shadow Shadow
سیاسه‌تی

وەزارەتی ناوخۆ: هێڵێکى ’گەرم’ بۆ تۆمارکردنى سکاڵا دژى پۆلیس و هێزە ئەمنییەکان

2020.08.03 - 11:50
وەزارەتی ناوخۆ: هێڵێکى ’گەرم’ بۆ تۆمارکردنى سکاڵا دژى پۆلیس و هێزە ئەمنییەکان

ناس کورد-

بەڕێوەبەرایەتی ئاسایشى تاک، سەر بە وەزارەتی ناوخۆی عێراق هێڵێکی تەلەفونی گەرمی تەرخانکرد بۆ ئاگادارکردنەوەی وەزارەت لەهەر پێشێلکارییەکی کارمەندانی سەربە وەزارەتەکە بەرانبەر بە هاووڵاتیان، هاوکات هێڵەکەش 24 کاتژمێر بەردەست دەبێت و بەردەوام کراوەیە.

 

ئەمڕۆ (دووشەممە، 3ى ئابی 2020)، وەزارەتی ناوخۆی عێراق لە ڕاگەیاندراوێکدا ئاماژەی بەوەکرد، "وەزارەتی ناوخۆیی عێراق هێڵێکی تەلەفونی گەرمی تەرخانکردوە بۆ ئاگادارکردنەوەی وەزارەت لەو پێشێلکاریانەی کە لەڵایەن هێزەکانی سەر بەوەزارەتەکە ئەنجامدەرێن دژ بە هاووڵاتیان".

 

 ئاماژە بەوەشکراوە، "وەزارەتی ناوخۆی عێراق هێڵی گەرمی ژمارە (477) ی تەرخانکردووە بۆ پێشوازیکردن لە پەیوەندییەکانی هاووڵاتیان و تۆمارکردنی سکاڵا لە حاڵەتی بوونی هەر تێبینییەک دژ بە ئەندامانی سەر بە وەزارەتەکە، و هێڵکەش 24 کاتژمێر بەردەستە و بەردەوام کراوەیە".

 

ئەوەشخراوەتە ڕوو، "تەرخانکردنی ئەو هێڵە مەبەست لێی هەڵسەنگاندن و پێشخستنی کاری هێزە ئەمنییەکانە و بنبڕکردنی ئەو سەرپێچییانەیە کە دژ بە هاووڵاتیان لەلایەن هەندێک لە کارمەندانی وەزارەتەکەوە ئەنجامدەدرێن".

 

تەرخانکردنی ئەو هێڵە گەرمە لە کاتێکدایە کە دوێنێ (یەکشەممە) میدیاکانی عێراق گرتەیەکی ڤیدیۆییان بڵاوکردەوە کە تیایدا دەردەکەوێت هێزە ئەمنییەکان بەدڕندەترین شێوە سوکایەتی بە منداڵێک دەکەن و بەزۆر ناچاری دەکەن قسەی نەشیاو بەرامبەر بە دایکی بکات. 

 

بەپێی تۆمارە ڤیدیۆییەکە، منداڵەکە ناوی محەمەدە و هەمو جلەکانی لەبەردا داکەنراوە و لەلایەن ژمارەیەک چەکداری هێزی ئەمنییەوە سوکایەتی پێدەکرێت و لە هەمانکاتدا گرتەی ڤیدیۆیی تۆمار دەکەن.

 

هاوکات وەزارەتی ناوخۆی عێراق دوێنێ (یەکشەممە، 2ی ئاب)  لە ڕاگەیەندراوێکدا بڵاویکردەوە، ئەو منداڵە بەپێی ماددەی 446 لەلایەن بەڕێوەبەرایەتی بەرەنگاربونەوەی تاوان لە بەغدا، لە (15ى ئایاری2020) بەتاوانی دزینی ماتۆڕسکیلێک ڕاگیراوە، ڕووداوەکەش 20 ڕۆژ پێش دەستگیرکردنی ڕوویداوە.

 

ئاماژەی بەوەشکردوە، وتە لە کەسوکاری ئەو منداڵە وەرگیراوە و داوایان لەسەر ئەو کەسانە تۆمارکردوە کە ئەو کارەیان بەرامبەر بە منداڵەکەیان ئەنجامداوە.

 

 وەزارەتی ناوخۆی عێراق رونیکردەوە "بەهۆی کەمتەرخەمییەوە، مستەفا کازمی، فەرماندەی گشتی هێزە چەکدارەکانی عێراق بڕیاریدا فەرماندەی هێزەکانی پاراستنی یاسا بگوازرێتەوە بۆ ئیمرە و چاو بە هێزەکانی پاراستنی یاسا بخشێندرێتەوە".