گه‌ڕان

Shadow Shadow
سیاسه‌تی

’لەدۆلاری ئەمریكی هەرزانترە’

بانكی ناوەندی عێراق لەبارەی بوونی دۆلاری لیبیەوە ڕاگەیەنراوێكی بڵاوكردەوە

2020.07.26 - 17:54
بانكی ناوەندی عێراق لەبارەی بوونی دۆلاری لیبیەوە ڕاگەیەنراوێكی بڵاوكردەوە

ناس کورد- 

بانكی ناوەندی عێراق هۆشداریدایە هاووڵاتیان کە نەکەونە ناو فیڵ و تەڵەکەبازى کەسانێک کە لە تۆڕە کۆمەڵایەتییەکان بانگەشە بۆ فڕۆشتنی جۆرە دۆلارێك دەکەن و ناویانناوە دۆلاری لیبی و نرخەكەی لەدۆلاری ئەمریكی هەرزانترە.

 

بەگوێرەى راگەیەندراوەکەى بانکى ناوەندى عێراق ئەو کەسانە بانگەشەى ئەوە دەکەن کە دۆلارە ئەمریکییەکان هەڵگیراوى بانکى ناوەندى لیبیان و لە بازاڕەکانى دراوى عێراقیدا بەنرخێکى کەمتر لە نرخى دۆلاری ئەمریكی، دەیفڕۆشنەوە. 

 

بەگوێرەى ئەو ڕیکلامانەى كە لەلایەن كەسانی نەناسراوەوە لەتۆڕە كۆمەڵایەتیەكانەوە بڵاوكراونەتەوە، ئەو دۆلارانە بلۆككراون و لەلایەن زۆر بانكەوە مامەڵەیان پێوە ناكرێت.

 

بانکى ناوەندى عێراق لە راگەیەندراوەکەیدا ئاماژەى بەوە کردووە بەشێک لە فڕۆشیارانى ئەو جۆرە پارەیە ژمارەى تەلەفۆنى تورکیا بڵاودەکەنەوە و وا رێکدەکەوون لەگەڵ مشتەرییەکەدا کە لە تورکیا پارەکەى ڕادەست دەکەن، بەڵام لەگەڵ وەرگرتنى پێشەکى پارەى ڕێککەوتنەکەیان خۆیان ون دەکەن. 



بانكی ناوەندی عێراق ئاماژە بەوە دەکات کە ئەو جۆرە دراوە بوونی نیە و جەختیش لەسەر ئەوە دەکاتەوە لەو بارەیەوە و بۆ بەدواداچوونى ئەو بابەتە ئاڵۆگۆڕی زانیاری لەنێوان دەزگا پەیوەندیدارەكانەوە ئەنجامدراوە لەناو خۆ و دەرەوەی عێراقدا. 



ئاماژەی بۆ ئەوەش كردووە، هەر لایەن و كۆمپانیایەك بانگەشەی فڕۆشتنی ئەو جۆرە دراوە بكات لەڕێگای تۆڕە كۆمەڵایەتیەكانەوە و خەڵكی چەواشە بكات بەبوونی دۆلارێك كە بۆ بانكێكی لیبی دەگەڕێتەوە ئەوا ئەو بانكە لەلایەن بانکى ناوەندى عێراقەوە ڕێگا پێدراو نیە و ئەو كارەش دەچێتە خانەی فیڵ و تەڵەكەوە بۆ چەواشەكردنی خەڵكە.