گه‌ڕان

Shadow Shadow
سیاسه‌تی

’’بۆچی لە عێراق سودی هەبووە و لە هەرێم نیەتی’’

نرخی پاکەتێک لە دەرمانەکەی ئاوامێدیکا بۆ کۆرۆنا 160 هەزار دینارە و ’’کاریگەریشی نییە’’

2020.07.26 - 14:11
نرخی پاکەتێک لە دەرمانەکەی ئاوامێدیکا بۆ کۆرۆنا 160 هەزار دینارە و ’’کاریگەریشی نییە’’

ناس کورد-

دوای بەرهەمهێنانی دەرمانێکی چارەسەری کۆرۆنا لە هەرێمی کوردستان، سەرباری گرانی نرخەکەی، بەڵام کاریگەری لەسەر توشبووان نەبووە، بەرپرسێکی کۆمپانیا بەرهەمێنەرەکەش دەڵێت، لەعێراق دەرمانەکە بەکاردەهێنرێت و ئەنجامی زۆر باشی هەبووە، "نازانن لە هەرێم بۆچی کاریگەری نییە."

 

نرخی یەک پاکەت لە دەرمانەکە 160 دۆلارە و تەنها تەندروستیی هەولێر،  1000 پاکەتی کڕیوە، ئەو بەرپرسەی کۆمپانیاکە باس لەوەدەکات بە تەندروستیی سلێمانیان وتووە کە بڕێک لە دەرمانەکەیان بۆ دابین دەکەن، بەڵام وەڵامیان نەداونەتەوە و نەیانویستووە.

 

شاخەوان زاهیر، بەڕێوەبەری مارکێتینگ و پەرەپێدان لە کۆمپانیای ئاوامێدیکا بە ناس کوردی ڕاگەیاند: " لەماوەی ڕابردوودا ئێمە گرێبەستمان لەگەڵ حکومەتی عێراق هەبووە و دەرمانی (Favipiravir)مان بەرهەمێناوە  کە تایبەتە بە چارەسەری کۆرۆنا و لە چەند وڵاتێک بەکاردەهێنرێت و لە دوو گرێبەستدا دەرمانمان بۆ ناردوون."

 

وتیشی: "ئێمە گرێبەستمان لەگەڵ حکومەتی هەرێم نییە، تەنها تەندروستیی هەولێر داوای دەرمانەکەیان کرد و بۆمان دابینکردن، تاوەکو لە عێراقەوە پشکی خۆیان پێدەگات."

 

ئەو بەرپرسەی کۆمپانیاکە ئاماژەی بەوەشكرد: "نرخی هەر پاکەتێک لە دەرمانەکە 160 دۆلارە، تەندروستیی هەولێر 1000 هەزار پاکەت لە دەرمانەکەیان لێکڕین."

 

سەرچاوەی زیاتر: دەرمانە ڕوسییەکە کاریگەری لەسەر توشبووانی کۆرۆنا لە هەرێم نەبووە

 

سەبارەت بە گرانی نرخی دەرمانەکە، شاخەوان زاهیر باسی لەوەکرد: "ڕاستە بەراورد بە هەندێک وڵات ڕەنگە دەرمانەکە لێرە گرانتر بێت، بەڵام بەراورد بە هەندێک وڵاتی دیکەش هەرزانترە، ئەوەش بەهۆی جیاوازی تێچووی بەرهەمهێنانەوەیە لە وڵاتێکەوە بۆ وڵاتێکی دیکە."

 

ڕونیشیکردەوە، لەعێراق نرخی یەک پاکەتی لە بازاڕدا گەیشتووەتە هەزار و 500 دۆلار و هێشتا دەستیشانکەوێت.

 

دەرمانەکە کاریگەری نییە؟

پاش 11 ڕۆژ لەبەکارهێنانی دەرمانەکە بۆ بەشێک لە توشبووانی هەولێر، دوێنێ شەممە 26ی تەموز، د. بژار موسا، وتەبێژی تەندروستیی هەولێر بە ناس کوردی ڕاگەیاند: "تائێستا دەرمانەکە نە بە باش و نە بە خراپ کاریگەری نەبووە."

  

شاخەوان زاهیر باسی لەوەکرد، لەلایەن بەرپرسانی تەندروستیی عێراقەوە پێیانوتراوە کە دەرمانەکە سودی هەبووە و نیشانەکانی ڤایرۆسەکەی کەمکردووەتەوە، بەڵام نازانن بۆچی لە هەرێم کاریگەری نەبووە و پێویستە لەوبارەیەوە لێکۆڵینەوە بکەن.

 

هۆشداری ئەوەشیدا، هیچ کەس هەوڵنەدات دەرمانەکە بەبێ ڕێنمایی پزیشک بەکاربهێنێت و زیان بە تەندروستیی دەگەیەنێت.

 

بۆچی لە سلێمانی بەکارناهێنرێت؟

دەرمانەکە لەئێستادا جگە لە هەولێر، لەهیچ جیگایەکی دیکە بەکارناهێنرێت و بەردەست نییە، ناشزانرێت کەی پارێزگاکانی دیکە بەکاریدەهێنن.

 

لەوبارەیەوە شاخەوان زاهیرئاماژەی بەوەکرد: "لەماوەی ڕابردوودا بە بەڕێوەبەری تەندروستیی سلێمانیمان وت کە بڕێک لە دەرمانەکەمان بۆ داناون، وتیان وەڵامتان دەدەینەوە، بەڵام وەڵامیان نەداینەوە و هۆکارەکەشی نازانین."