گه‌ڕان

Shadow Shadow
سیاسه‌تی

’’ئێمە هاوڵاتی عێراقیین’’

بەشێک لە مامۆستایانی کەرکوک داوا دەکەن ڕاژەکانیان بخرێتە سەر بەغدا

2020.07.26 - 11:09
بەشێک لە مامۆستایانی کەرکوک داوا دەکەن ڕاژەکانیان بخرێتە سەر بەغدا

ناس کورد-

بەشێک لە مامۆستایانی خوێندنی کوردی لە کەرکوک داوا دەکەن ڕاژە و موچەکانیان بگوێزرێتەوە سەر حکومەتی ناوەندی و دەڵێن، ئەوان خەڵکی شاری کەرکوکن، بەڵام موچەکانیان لەسەر هەرێمە.

 

ئەمڕۆ یەکشەممە، 26ی تەموزی 2020، بەشێک لە مامۆستایانی خوێندنی کوردی لەشاری کەرکوک لەژێر ناوی "دەستەی مامۆستایانی ناڕازی" لە کۆنفرانسێکی ڕۆژنامەوانیدا، یاداشتێکیان ئاڕاستەی حکومەت و پەرلەمانی عێراق کرد.

 

سارە جەوهەر محەمەد کە یەکێکە لە مامۆستایانی ناڕازی، یاداشتەکەی خوێندەوە و تێیدا هاتووە: "ئێمەی مامۆستایانی خوێندنی کوردی لە کەرکوک لەساڵی 2003وە خزمەت دەکەین و خەڵکی ئەم شارەین و بەپێی ئاماری ساڵی 1957 تۆمارکراوین و فۆڕمی خۆراکمان کەرکوکین، بەڵام لەسەر وەزارەتی پەروەردەی هەرێم دامەزراوین و موچەکانمان لەسەر حکومەتی هەرێمی کوردستانە."

 

ئاماژەی بەوەشکرد: "ئێمە داوا دەکەین میلاکمان بگوازرێتەوە بۆسەر شارەکەی خۆمان و وەک هاوڵاتییەکی عێراقی مامەڵەمان لەگەڵ بکرێت و تەماشا بکرێین و وەک عێراقییەک کێشەکانمان بۆ چارەسەر بکەن."

 

لە یاداشتەکەدا، ئەو مامۆستایانە داوایان لە حکومەتی عێراق کردووە:

 

1-  هەوڵی جدی بدرێت بۆ گواستنەوەی ڕاژە و موچەی مامۆستایانی خوێندنی کوردی لە کرکوک لە حکومەتی هەرێمەوە بۆ حکومەتی عێراق.

 

2-  تاوەکو خاڵی یەکەم جێبەجێدەکرێت، داواکارین موچەکانمان لە پشکی هەریمی کوردستان راستەوخۆ لە بەغداوە بۆ بنێردرێت، نەک دوابکەوێت و لێی ببڕدرێت.

 

3-  کردنەوەی پەروەردەیەکی سەربەخۆ بۆ خوێندنی کوردی لە کەرکوک.