گه‌ڕان

Shadow Shadow
سیاسه‌تی

هۆكاری سەرهەڵدانەوەی بۆ دۆخی كارەبا دەگەڕێتەوە

خۆپیشاندانەكانی باشووری عێراق بۆ دەستلەكاركێشانەوەی بەرپرسان دەستیانپێكردەوە

2020.07.23 - 15:36
خۆپیشاندانەكانی باشووری عێراق بۆ دەستلەكاركێشانەوەی بەرپرسان دەستیانپێكردەوە

ناس کورد-

بۆ دەربڕینی ناڕەزایەتی بەرامبەر خراپی دۆخی كارەبای شارەكەیان لەوەرزی گەرمادا خۆپیشاندانی جەماوەری لەپارێزگای زیقار دەستی پێكرد و خۆپیشاندەران  داوای دەستلەكاركێشانەوەی بەرپرسانی شارەكە دەکەن.

 

میدیاكانی عێراق بڵاویان كردەوە، ئەمڕۆ (پێنجشەممە، 23ی تەموزی 2020)، خۆپیشاندەرانى شارى زیقار چەندین شەقامی سەرەكیان داخستووە و چەند دەزگایەكی حكومیشیان ناچار كردووە دەرگاكانیان دابخەن.

 

بەگوێرەى ئەو  گرتە ڤیدیۆیانەش كە بڵاو كراونەتەوە، خۆپیشاندەران چونەتە سەر شەقامەكان و ئاگر لەپشتیانەوە دەبینرێت.

 

ئاماژە بۆ ئەوەش كراوە، خۆپیشاندەران داوای چاككردنی دۆخی كارەبا و دەستلەكاركێشانەوەى بەرپرسە ناوخۆییەكان دەكەن چونكە بەوە تۆمەتباریان دەكەن كەشكستیان هێناوە لەبەڕێوەبردنی شارەكەیاندا.

ساڵانێكە عێراق بەدەست قەیرانی كەمی كارەباوە دەناڵێنیت بەتایبەتی لەوەرزی گەرما و هاویناندا  دوای بەرزبونەوەی پلەكانی گەرما دووبارە دەبێتەوە.

 

مانگی ئۆكتۆبەری ساڵی پاریش خۆپیشاندان و ناڕەزایەتی بەرفراوان لەدژی نەبوونی خزمەتگوزاری و گەندەڵی لەزۆربەی شارەكانی عێراق دەستیانپێكرد و کابینەكەی عادل عەبدولمەهدییان ناچار بە دەستلەکارکێشانەوە کرد.