گه‌ڕان

Shadow Shadow
سیاسه‌تی

ئەمریكا: هێزەکانمان ئامادەکردووە بۆ ڕوبەڕوبوونەوەى چین لە سەرتاسەری ئاسیا

2020.07.22 - 15:22
ئەمریكا: هێزەکانمان ئامادەکردووە بۆ ڕوبەڕوبوونەوەى چین لە سەرتاسەری ئاسیا

ناس کورد-

وەزیری بەرگریی ئەمریكا دەڵێت، وڵاتەكەی دەستی كردووە بە ئامادەباشی سەربازیی بۆ هەر ئەگەرێكی ڕووبەڕوبونەوەی لەگەڵ چیندا و بۆ ئەو مەبەستەش بەردەوامن لە ڕەوانەكردنی هێز بۆ دەریای باشوری چین.

 

ڕۆژنامەی وۆڵ ستریت جورناڵ لەسەر زاری مارك ئەسپەر، وەزیری بەرگریی ئەمریکا دەڵێت، ولایەتە یەكگرتووەكانی ئەمریكا لەسەرتاسەری ئاسیادا هێزەكانی دەیانگەڕێتەوە بۆ ناوەندەكانیان بۆ ئامادەكردنیان بۆ هەر ئەگەرێكی ڕوبەڕووبونەوە لەگەڵ چیندا.

 

ئاماژەی بۆ ئەوەشكردووە، هەڵوێستی سەربازیی ئیدارەكەی ترەمپ بەرانبەر پەكین توندە و بەردەوامیش دەبێت لە ڕەوانەكردنی كەشتی سەربازیی بۆ ناوچەكە بۆ بەرەنگاری "سیاسەتە فراوانخوازییەكانی چین" و چەكفرۆشتنی بە تایوان كە پەكین دەیەوێت دەستبەسەر سەروەریەكەیدا بگرێت.

 

ئەسپەر جەختی کردووەتەوە کە مانۆڕە سەربازییەكانیان لە دەریای چینی باشور و ڕەوانەكردنی فڕۆكەهەڵگری زیاتر بە مەبەستی مەشق و راهێنان بەردەوام دەبێت و كەس ناتوانێت ڕایانبگرێت.

 

وەزیری بەرگریی ئەمریكا ئەوەشی خستووەتەڕوو، وڵاتەكەی دەیەوێت بەرەنگاری كردەوە زۆرە ملێكانی چین ببێتەوە لە دەریای چینی باشور كە چەند ساڵێكە لەسەری بەردەوامە و دەیانەوێت ئازادی گەشتی دەریای لەو ناوچەیە فەراهەم بكەن.

 

وتووشیەتی، ئەوە دەزانرێت كە 80% بازرگانی جیهانی بە ناوچەی زەریای هێمن و هیندیدا تێپەڕدەبێت بەتایبەتی لەڕێگەی دەریای چینی باشوورەوە بۆیە هەمویان دەیانەوێت ئازادی هاتوچۆی دەریاوانی لەو ناوچەیەدا فەراهەم بێت چونكە گەر وانەبێت ئەوا بەسەختی كاریگەری بۆ سەر بازرگانی نێودەوڵەتی دەبێت.

 

ئەسپەر بە پێویستی دەزانێت بەرگری لە هاوپەیمانەكانیان لە باشوری ئاسیا بكەن و چینیش ڕێز لە سەروەری وڵاتانی ناوچەكە بگرێت.

 

لەبارەی بوونی فڕۆكەهەڵگرە ئەمریكییەكانەوە لە ناوچەكە، ئەسپەر ڕایگەیاند، لەكاتی جەنگی جیهانی دووەمەوە فڕۆكەهەڵگرەكان ڕەوانە كراون و بەردەوامیش دەبن لەسەری و كەسیش ناتوانێت ڕایانبگرێت.