گه‌ڕان

Shadow Shadow
سیاسه‌تی

’’خامنەیی بە ناڕاستەوخۆ هێرشی کردووەتە سەر کازمی’’

’’کۆنتڕۆڵکردنی گروپە چەکدارەکان و پسوڵەى کارەبا’’.. چەند لایەنێکی شاراوەى سەردانەکەى کازمی بۆ تاران

2020.07.22 - 13:53
’’کۆنتڕۆڵکردنی گروپە چەکدارەکان و پسوڵەى کارەبا’’.. چەند لایەنێکی شاراوەى سەردانەکەى کازمی بۆ تاران

ناس کورد-

ڕۆژنامەی ئەخباری نزیك لە حزبوڵای لوبنانی لە ڕاپۆرتێكیدا ئاشكرایكردووە، لە سەردانەكەی مستەفا كازمی، سەرۆکوەزیرانی عێراق بۆ تاران، خامنەی بە ناڕاستەوخۆیی هێرشی کردووەتەسەر و داوای لێکردووە لە دەركردنی هێزەكانی ئەمریكا لە عێراق پەلە بكرێت و هەڕەشەی تۆڵەكردنەوەشی لە ئەمریكییەكان كردووە.

 

ڕۆژنامەکە دەڵێت، زۆرێک لە چاودێران لەگەڵ ئەوەدان کە هەڵوێستی لایەنی عێراقی لە کۆبوونەوەیدا لەگەڵ خامنەیی ڕاشكاوانەتر بووە، و قسەكانی ڕاستوڕەوان بوون، باس لە دۆسییە هەستیارە عێراقییەكان لەڕووی ناوخۆییەوە كراوە و دەستكەوتەكانی ئەو سەردانەش لەچەند ڕۆژی داهاتودا بەفەرمی و نافەرمی لەلایەن هەردوو وڵاتەوە دەبنە كردار.

 

لە خشتەی سەردانەكانی سەرۆكوەزیرانی عێراق بۆ چەند وڵاتیك سعودیە لە پێش ئێران بوو، بەڵام بەهۆی خراپبوونی دۆخی تەندروستی شانشینی سعودیە چەند كاتژمێرێك پێش ئەنجامدانی هەڵوەشایەوە و سەردانەكە بەرەو تاران ئەنجامدرا.

 

ڕۆژنامەكە دەشڵێت، بەڵام ئەو سەردانە لەڕووی شێوە و ناوەڕۆكەوە جێی هەڵوێستەیە و پڕە لە واتا، بە تایبەت ڕابەری باڵای ئێران سوور بوو لەسەر دیدارەكە و پێشوازیكردنی میوانەکەی کە یەکەمین میوانی دەرەکییە بینیبێتی لەدوای بڵابوونەوەى ڤایرۆسی کۆرۆنا.

 

بەپێی ڕۆژنامەكە، خامنەی بە میوانەكەی وتووە، وڵاتەكەی دەستوەردان لە پەیوەندییەكانی نێوان بەغدا و واشنتۆن ناكات و لە هەمان كاتیشدا هۆشداری لە بوونی چەند سەربازێكی ئەمریكی داوە لە ناوچە سنورییەكانی عێراق-ئێران كە دەبنە هۆی پشێوی ئەمنیی لە ناوچەكە.

 

خامنەی وتووشیەتی، ئێران دەستوەردان لە كاروبار و پەیوەندییەكانی عێراق لەگەڵ ئەمریكادا ناكات، بەڵام چاوەڕێ ئەوەش دەكەن "هاوڕێ عێراقییەكانیان باش ئەمریكا بناسن و هەست بەوەش بكەن بوونی ئەمریكا لەهەر وڵاتێك هۆكارە بۆ گەندەڵی و ماڵوێران و شێوان."

 

دەشڵێتن تاران چاوەڕێی ئەوە دەكات حکومەتى عێراق پابەند بێت بە بڕیاری پەرلەمانەکەى بۆ دەركردنی هێزەكانی ئەمریكا و هەروەها باسی لە كوشتنی قاسمی سولەیمانی و ئەبو مەهدی موهەندیس كردووە و جەختیشی لەسەر ئەوە كردووەتەوە کە "تاران هەرگیز ئەوەی لەبیرناچێت و تۆڵەی هاوشێوە لە ئەمریكا دەكاتەوە."

 

هەر بەپێی شیکردنەوەى ئەخباری لوبنانی، لە بەرامبەریشدا مستەفا كازمی باسی لە قوربانیەكانی ئێران کردووە لە شەڕی داعشدا بەڵام باسی لەوەش کردووە کە عێراقیش هاوکاری و هەماهەنگی ئێرانی کردووە لە ڕووی ئابورییەوە بەتایبەت لەدوای توندبوونی سزا ئابورییەکانی سەری.

 

وەک ڕۆژنامەکە دەڵێت، دور لە چاوی میدیاکان کازمی چاوی بە ئیسماعیل قائانی، فەرماندەی فەیلەقی قودسی ئێران کەوتووە کە پێشتر قاسم سولەیمانی فەرماندەیی دەکرد، قائانی هۆشداری داوەتە ئەمریکییەکان لە "ڕۆژانی زۆر ڕەش" چاوەڕێیان دەکات.

 

هەر لەو کۆبوونەوەدا، بەپێی زانیارییەکانی ڕۆژنامەکە، کازمی داوای لە لایەنی ئێران کردووە کە کۆنتڕۆڵی هێزە چەکدارەکانی دڵسۆز بۆ تاران بکەن و ئاسانکاری بکەن بۆ بەڕێوەچوونی دانوستانە ستراتیژییەکانی نێوان ئەمریکا و عێراق بە تایبەت کە بریارە ناوەڕاستی مانگی داهاتوو قۆناغی دووەمی لە واشنتۆن بەڕێوەبچێت.

 

ئەوەى پەیوەندی بە لایەنەکانی ترەوە هەیە وەک بازرگانی و ئابوری، هەردوو جەختیان لەسەر بەرزکردنەوەى ئاستی ئاڵوگۆڕی بازرگانی کردووەتەوە بۆ 20 ملیار دۆلار و هەماهەنگی زیاتر بۆ ڕوبەڕوبوونەوەى قەیرانی کۆرۆنا، ئێرانیش بەڵێنی داوە هەموو هاوکارییەکی پزیشکی عێراق بکات بۆ ڕوبەڕوبوونەوەى پەتای کۆرۆنا.

 

لەبارەى وزەى کارەباوە، ئێرانییەکانی جەختیان کردووەتەوە کە پێویستە عێراق پارەى ئەو کارەبایە بدات کە ئێران بۆ عێراقی دابین کردووە و بە سێ ملیار دۆلار مەزەندە دەکرێت.