بەهۆی سوتاندنی وێنەی قاسم سولەیمانی سێ گەنجی كورد بە کۆی زیاتر لە 16 ساڵ زیندانی سزادران

ناس کورد-

بەهۆی سوتاندنی وێنەی قاسم سولەیمانییەوە، دادگای سەقز سزای زیاتر لە 16 ساڵ زیندانی بەسەر سێ گەنجی کورد دا سەپاند و یەکێکی دیکەش چاوەڕوانی سزادانە.

کەناڵی ناس کورد لە تێلیگرام جۆین بکە   

 

ڕێکخراوی مافی مرۆڤی هەنگاو ڕایگەیاند: " لە خۆپیشاندانەکانی ساڵی ڕابردووی ئێراندا چوار گەنجی کوردی شاری بانە بەتۆمەتی بەشداریکردن لە خۆپیشاندانەکان و سوتاندنی وێنەی قاسم سولەیمانی دەستگیرکران."

 

ئاماژەی بەوەشکردووە، بەوهۆیەوە دادگای شاری سەقز بەکۆی گشتیی سزای زیاتر لە 16 ساڵ زیندانی بەسەر سێ لەو گەنجانەدا سەپاند و یەکێکیشیان چاوەڕوانی سزادانە، سزاکانیش بەمشێوەیەیە:

 

• ئارمین حسێن زادە، تەمەن 20 ساڵ، سزای زیندانی شەش ساڵ و حەوت مانگ.
• میلاد حسێنی، تەمەن 19 ساڵ، سزای زیندانی شەش ساڵ و شەش مانگ.
• بەهمەن ڕەحیمی، تەمەن 19 ساڵ، سزای زیندانی سێ ساڵ و شەش مانگ.
• سینا عەبدوڵاهی تەمەن 17 ساڵ، تاوەکو ئێستا حوکمەکەی ڕانەگەیەندراوە.