گه‌ڕان

Shadow Shadow
سیاسه‌تی

ئەمینداری وەزارەتی پێشمەرگە: هێزەکانی سوپای عێراق لە سنوری خانەقین کشانەوە

2020.07.19 - 16:30
ئەمینداری وەزارەتی پێشمەرگە: هێزەکانی سوپای عێراق لە سنوری خانەقین کشانەوە

ناس کورد-

پاش ئەوەی لە سنووری قەزای خانەقین گرژی لەنێوان ھێزەکانی پێشمەرگە و ھێزە عێراقییەکان دروست بوو، ئەمینداری وەزارەتی پێشمەرگە دەڵێت، هێزە عێراقییەکە کشاونەتەوە و هیچ هێزێک لەو سنورە نەماوە، دەشڵێت، پێش کۆتایی ئەم مانگە لەگەڵ بەغدا گفتوگۆ دەکەن بۆ پڕکردنەوەی بۆشاییە ئەمنییەکانی ئەو ناوچانە.

 

جەبار یاوەر، ئەمینداری وەزارەتی پێشمەرگەی حکومەتی هەرێمی کوردستان بە ناس کوردی ڕاگەیاند: "هیچ کێشەیەکی ئەوتۆ لەنێوان پێشمەرگە و سوپای عێراق لە هیچ ناوچەیەک ڕووینەداوە و تەنها ئەوە بووە کە بەبێ ئاگاداری ئێمە هێزێکی عێراقی ئۆپەراسیۆنێکیان لەو ناوچەیە ئەنجامداوە، ئێمەش هێزەکانمان خستە حاڵەتی ئامادەباشییەوە، چونکە ئاگادار نەکرابووینەوە."

 

وتیشی: "هێزەکە عێراقییەکە کشاونەتەوە و لەئێستادا هیچ هێزێکیان لەو ناوچەیە نەماوە و کارەکانیان کاتی بووە و تەواو بووە."

 

ئەمینداری وەزارەتی پێشمەرگە ئاماژەی بەوەشکرد:"بۆ پاراستنی ئەمنییەتی ئەو ناوچانە بە هاوبەشی گفتوگۆمان لەگەڵ وەزارەتی بەرگریی عێراق کردووە و پێش کۆتایی ئەم مانگەش دووبارە کۆدەبینەوە بۆ ئەوەی بگەینە ڕێککەوتنێک لەوبارەیەوە."

 

لەچەند ڕۆژی ڕابردوودا، جموجوڵی هێزە عێراقییەکان لەسنوری ناوچە کوردستانییەکانی دەرەوەی ئیدارەی هەرێم دەستیپێکرد و ئەوەش کاردانەوەی جیاوازی لێکەوتەوە.

 

بۆشاییە ئەمنییەکان لەو ناوچانە، کێشەی گەورەی بۆ هاووڵاتیان دروست کردووە و بەردەوام لە ترس و دڵەڕاوکێدان، ئەوەش بەهۆی جموجوڵەکانی پاشماوەکانی داعش و دروستکردنی مەترسی لەسەر ژیانی هاووڵاتیان.