گه‌ڕان

Shadow Shadow
سیاسه‌تی

خوشكێكی زارا محمەدی چەند نهێنینەك لەسەر ’’ئەو پلانانەی بۆ خوشكەكەی دانراون’’ ئاشكرا دەكات

2020.07.18 - 16:55
خوشكێكی زارا محمەدی چەند نهێنینەك لەسەر ’’ئەو پلانانەی بۆ خوشكەكەی دانراون’’ ئاشكرا دەكات

ناس كورد-

خوشكێكی زارا محەمەدی، مامۆستا گەنجەكەی ڕۆژهەڵاتی كوردستان كە بەهۆی وتنەوەی وانەی كوردی بە منداڵان سزای 10 ساڵ زیندانی بەسەردا سەپێنرا چەند نهێنینەك لەسەر ئەو "پلانانەی كە بۆی دانرابوو" ئاشكرا دەكات.

 

كانی محەمەدی، خوشكی زارا دەڵێت، سزادانی خوشكەكەی بە 10 ساڵ زیندانیكردن نادادپەروەرییە و چاوەڕواننەكراو بووە، دادگایکردنەکەشی لەسەر بنەمای تۆمەتی دەزگا ئەمنیەكان بووە.

 

ئاماژەی بۆ ئەوەشكردووە، لە وردەكاری دۆسییەی خوشكەكەیدا باس لەوە كراوە ئەو سزایە لە ئاكامی ناكۆكی نێوان دەزگای ئیتڵاعات و سوپای پاسداران بووە لەسەر پرسەكەی، بەوتەی كانی، زارا قوربانی ململانێكانی نێوان ئەو دوو دەزگایەیە.

ڕۆژی سێ شەممەی ڕابردوو لەلایەن دادگای ئینقلابی شاری سنەی ڕۆژهەڵاتی كوردستانەوە سزاكەی كە 10 ساڵ زیندانیكردن بەسەر زارا محمەدی بە پارێزەرەكەی ڕاگەیەنرا، ساڵی پار دوای ئەوەی لەسەر ئەو تۆمەتانەی كە درابویە پاڵی كە فێركردنی خوێندنی كوردییە بە منداڵان دەستگیركرا و پاش ماوەیەك بەكەفالەتی 700 ملیۆن تمەن تا یەكلاییكردنەوەی كەیسەكەی ئازاد كرا.

 

كانی دەشڵێت، دوو ڕۆژ پێش دەرچوونی سزاكە بۆ خوشكەكەی لەلایەن دادگاوە نامەیەكی بۆ هاتووە كە دەبێت لە دادگا ئامادە بێت دواتر پارێزەرەكەی چووە دادگا بۆ ئەوەی پەیامەكەی دادگا وەربگرێت.

 

كانی بە نیگەرانیەوە باس لەو سزایە دەكات و ئەوەشی خستووەتە ڕوو، خوشكەکەى هیچ تاوانێكی نەكردووە و ئەو كاری بۆ ئەوە نەكردووە ئەو سزایەی بەسەردا بسەپێنن و ئەوان ناتوانن لەبەرامبەر ئەو سزا نادادپەروەر و ستەمكارەدا بێدەنگی هەڵبژێرن.

 

دەشڵێت، "خوشكەکەی من تەنها چالاكیەكەی ئەوەبوو لە كۆمەڵەی نەوژین كاری دەكرد و وانەی كوردی دەوتەوە، لەكاتێكدا خوشكەکەم بەوە تۆمەتباركراوە كە لەدژی ئاسایشی وڵات كاری كردووە، پرسیارەكەی ئێمە ئەوەیە، خوشكەم جگە لە ئەنجومەنی نەوژین كاری لەهیچ شوێنێك کردووە؟" 



كانی باسی لەوەش كردووە، فێركردنی زمانی دایك چ مەترسیەكە بۆ سەر وڵات..؟ ئەوەش لەكاتێكدا كۆمەڵەی نەوژینیش لەهەموو تۆمەتێك بێ بەرییە و هیچی نەكردووە.

 

كانی پێی وایە كە وەزارەتی ئیتڵاعات دۆسیەكەی زارای بۆ سوپای پاسداران گواستووەتەوە، بەوتەی زارا لەسەر ئەو دۆسییە ئەو دوو دەزگایە ناكۆك بوون، لەبەر ئەوەی سوپا هیچ بەڵگەیەكی تاوانباری ئەوی دەستنەكەوتووە بۆ درێژكردنەوەی ماوەی دەستگیركردنەكەی لەدوای مانگ و نیوێك، بەڵام وەزارەتی ئیتلاعات دووبارە دەستوەردان دەكات و دۆسییەكە دەباتەوە ژێر دەستی خۆی، ماوەی دەستگیركردنەكە درێژ دەكاتەوە و بۆ ئەوەی ناچاری بكەن بەزۆر دانپێدانان بكات و دوای فشارێكی زۆریش هیچ جۆرە دانپێدانانێكی نەبووە بۆ ئەو تۆمەتەشی كەدراوەتە پاڵی گوایە هاوكاری حزبە ئۆپۆزسیۆنەكانی كردووە.



بە وتەى کانی، دوای ئەوە دەزگا ئەمنییەكان بێ ئومێد دەبن لەوەی زارا هیچ دانپێدانانێكی نییە، بەتۆمەتی هاریكاری حزبە ئۆپۆزسیۆنەكان ناچار دەبن لەژێر ناوی دروستكردنی گروپ كۆمەڵە بە ئامانجی تێكدانی ئاسایشی وڵات تۆمەتبار دەكەن و سزای بەسەردا دەسەپێنن.

 

كانی خوشكی سەرجەم ئەو تۆمەتانە ڕەتدەكاتەوە و بەبێ بنەما دەیانزانێت، جەخت لەسەر ئەوەش دەكاتەوە كە زارا جگە لە چالاكیەكانی لە چوارچێوەی كۆمەڵەی نەوژیندا هیچ كارێكی دیكەی نەكردووە.

 

زارا محمەدی تەمەنی 29 ساڵە و خەڵكی گوندێكی سەر بەپارێزگای سنەیە و نزیكەی 10 ساڵە سەرقاڵی وانەوتنەوە و چالاكییە بۆ خزمەتی زمانی كوردی لەڕێگەی كۆمەڵەی نەوژینەوە.