گه‌ڕان

Shadow Shadow
سیاسه‌تی

گرژيەكانى ئەمريكا و چين تەشەنە دەكەن.. هەرەشەى سەپاندنى سزاى زياتر دەكرێت

2020.07.16 - 15:42
گرژيەكانى ئەمريكا و چين تەشەنە دەكەن.. هەرەشەى سەپاندنى سزاى زياتر دەكرێت

ناس کورد- 

گرژيەكانى نێوان ئەمريكا و چين زياتر تەشەنە دەكەن و "مايك پۆمپیۆ" وەزيرى دەرەوەى ئەمريكا لە كۆنگرەيەكى ڕۆژنامەوانيدا هەڕەشەى سەپاندنى سزاى زياتر بەسەر چيندا دەكات و دەشڵێت، ئەو وڵاتە هەڕەشەيە لەسەر ئاسايشى نيشتمانيان.

 

مايك پۆمپیۆلە كۆنگرەيەكى ڕۆژنامەوانيدا وتى، حزبى دەسەڵاتدارى چين ئازاديەكان كۆت و بەند دەكات و هەڵسوكەوتەكانى هەڕەشەن لەسەر ئاسايشى نيشتمانى ولايەتى يەكگرتوەكانى ئەمريكا.

 

وەزيرى دەرەوەى ئەمريكا هەڕەشەى ئەوەشى كرد كە سزاى زياتر بەسەر چيندا دەسەپێنن و وتى، سزا بەسەر ژمارەيەك كارمەندى كۆمپانياى هواوى چينى سەپێنراوە و هەروەها زەبرێكى گەورەى بەركەوت كاتێك بەريتانياش ڕەتيكردەوە مامەڵە لەگەڵ ئەو كۆمپانيا چينيەدا بكات.

 

ڕژێمى چينيشى بەشەڕەنگێز وەسفكرد و باسى لەوەكرد، دەسەڵاتدارانى ئەو وڵاتە مافەكانى مرۆڤ پێشێلدەكەن و حزبى دەسەڵاتدار ئازاديەكان كۆت و بەند دەكات، پێشتريش ڕێگەى لە ژمارەيەك پزيشك و چالاكوان گرت كە هيچ زانياريەك بدەن لەسەر چۆنێتى مامەڵكردنى دەسەڵاتى چين لەسەر چەندين بابەت بۆ نمونە ڤايرۆسى كۆرۆنا.

 

پۆمپیۆ ئەوەشى نەشاردەوە كە لە هەمان كاتدا لە گفتوگۆدان لەگەڵ لايەنى چينى سەبارەت بە ناكۆكيەكانى نێوان هەردولا.

 

پەكين هەڕەشەى وەڵامدانەوە دەكات "لە سزاكان ناترسين"

دواى قسەكانى وەزيرى دەرەوەى ئەمريكا "هوا شون" وتەبێژى وەزارەتى دەرەوەى چين وەڵامى دايەوە و لەكۆنگرەيەكى ڕۆژنامەوانيدا وتى، وڵاتەكەى لە هيچ سزايەك ناترسێت كە ئەمريكا بيسەپێنێت، واشنتۆنيشى بە هەوڵدان بۆ تێكدانى سەقامگيرى ناوچەكە تۆمەتبار كرد و وتيشى "پەكين هيواخوازە ئەمريكا بە ڕێگەيەكى هەڵدا نەڕوات".

 

هوا شون هەڕەشى وەڵامدانەوەشى لە واشنتۆن كرد بەهۆى سوربونى دۆناڵد ترامپ سەرۆكى ئەو وڵات بۆ سەپاندنى سزا بەسەر چيندا (كە بەهۆى سەركوتكاريەكانى چين دژى هۆنگ كۆنگ سەپاندويەتى).

 

واشنتۆن پەستانەكان زياد دەكات

دواى چەند مانگێك لە كێشمەكێش و گرژيەكانى نێوان ئەمريكا و چين، لە چەند ڕۆژى ڕابردودا واشنتۆن سزاكانى سەر پەكينى زياتر كرد.

 

تا ئێستا ولايەتە يەكگرتوەكانى ئەمريكا خۆى لەوە بەدور دەگرت كە چەند هەڵوێستێك بگرێتە بەر بۆ نمونە لەسەر ناكۆكيەكان دەربارەى دەرياى چينى باشور، بەڵام ڕۆژى دوو شەممە پۆمپەيۆ وتى، داواكارى چين بۆ ئاوە ناكۆكى لەسەرەكان لەو ناوچەيە بە هەموو شێوەيەك ناشەرعييە و ئيدانەى ئەو هەڵمەتە ترساندنەشى كرد كە ئەنجامى دەدات بۆ دەستگرتن بەسەريدا.

 

هەروەها ئەمريكا شەڕى دژى گروپى هواوى چينى بردەوە كە كۆمپانيايەكى زەبەلاحى پەيوەنديەكانە و ئەمريكا بە سيخوڕيكردن لەبەرژوەندى پەكين تۆمەتبارى دەكات، هەروەها لەو چوارچێوەيەشدا بەريتانيا ئاشكرايكرد، كە قۆناغ بە قۆناغ كۆتايى بە ئامێرەكانى هواوى دەهێنن لە تۆڕەكانى نەوەى پێنجەم "G5".

 

هەر ڕۆژى سێ شەممەش ولايەتە يەكگرتوەكانى ئەمريكا ڕايگەياند كە ڕێگە نادرێت سێ بەرپرسى چينى بچنە خاكى ئەمريكاوە چونكە كەمە موسوڵمانەكانى ئيگۆر لە ولايەتى شينجيانگ لە باشورى خۆرئاواى وڵاتەكەيان سەركوت دەكەن.