گه‌ڕان

Shadow Shadow
سیاسه‌تی

’’بە ڕاوێژ بووە لەگەڵ ئەنجومەنی سیاسی’’

فراکسیۆنى کۆمەڵ: کەیسی سۆران عومەر زیاد لە قەبارەى خۆی گەورە کراوە و بۆ مەرامی سیاسیی بەکارهێنراوە

2020.07.15 - 12:11
فراکسیۆنى کۆمەڵ: کەیسی سۆران عومەر زیاد لە قەبارەى خۆی گەورە کراوە و بۆ مەرامی سیاسیی بەکارهێنراوە

ناس كورد-

فراکسیۆنى کۆمەڵی ئیسلامی ڕایگەیاند، دەستلەکارکێشانەوەى سۆران عومەر بە ڕاوێژبووە لەگەڵ ئەنجومەنی سیاسیی کۆمەڵ و دەڵێت، "بەڵام بابەتەکە هەم بەلاڕێدا برا و هەمیش زیاد لە قەبارەی خۆی گەورەکرا".

 

ئەمڕۆ چوارشەممە، 15ی تەموزی 2020، فراکسیۆنی کۆمەڵی ئیسلامی لە ڕاگەیەنراوێکدا دەڵێت، ئەمڕۆ سۆران عومەر نامەی دەستلەکارکێشانەوەی ئاڕاستەی سەرۆکایەتي پەرلەمانی کوردستان کرد.

 

ئاماژەى بەوەشکردووە، "دەستلەکارکێشانەوەی هەر پەرلەمانتارێک مافێکی سەرەتایی و ئاسایی خۆیەتی و بڕیارەکەی کاک سۆران عومەریش (ئەگەرچی دڵخوازی ئێمە نەبوو) ڕێزلێگیراوە، بەڵام دەبێ ئەوەش بڵێین بەڕێزیان دوای ڕاوێژ لەگەڵ ئه‌نجومەنی سیاسی بەو بڕیارە گەیشتووە."

 

زیاتر بخوێنەوە: سۆران عومەر لە نامەى دەستلەکارکێشانەوەیدا باسی چەند هۆکارێک دەکات

 

دەشڵێت، سۆران عومەر "پەرلەمانتارێکی چالاک بووەو لە ڕابردووشدا و لە پێناو دڵسۆزی بۆ کارەکەی و خەمخۆری بۆ خەڵک، کاری زۆری کردو ئێمە سوپاسی دەکەین و پێزانینی تەواومان بۆ کارو ماندوبوونی بەڕێزیان هەیەو بۆ داهاتووش سەرکەوتنی بۆ دەخوازین."

 

ڕونیشیکردەوە، "بەداخەوە لەسەرەتاوە ئەم کەیسەی کاک سۆران بۆ مەرامی حزبیی و شەخسیی هەم بەلاڕێدا برا هەم زیاد لە قەبارەی خۆی گەورەکرا، کە ئەمە سەرەتایەکی ترسناک و خراپە لەکاری پەرلەمانیی و پرۆسەی سیاسیی و دەرەنجامی خراپی دەبێت."

 

"ئێمە و خەڵکی کوردستان تەمەننامان دەکرد لەبری سەرکوتکاری و بێدەنگکردنی خەڵک و نوێنەرەکانیان، لێپرسینەوە لەو لەشکرو تۆڕە ڕێکخراوانەی گەندەڵیی بکرایە کە 29 ساڵە سامانی گشتیی هەرێم و ماڵی خەڵک تاڵان دەکەن و لە پاڵ دەسەڵاتدا هەریەک لەوانە بوونه‌ته‌ کارەسات بۆ ژیان و گوزەرانی خەڵک."

 

لە ڕاگەیەنراوەکەدا فراکسیۆنى کۆمەڵ جەخت دەکاتەوە کە "پەرلەمان پێویستە شوێنی داکۆکیکردن بێت لە مافی خەڵک و چاودێر بەسەر حکوومەتەوەو، لێناگەڕێین ئەم دەزگا نیشتمانییە وەک بارەگای حزب مامەڵەی لەگەڵ بکرێت و دڵنیاشبن به‌رده‌وام ده‌بین له‌ به‌رگری كردن له‌مافی خه‌ڵك و به‌گژداچوونه‌وه‌ی سته‌م و گه‌نده‌ڵیی تا ئه‌م سه‌رده‌مه‌ تاریكه‌ كۆتایی پێدێت."

 

"لە کۆتاییدا ئەو ڕاستییه‌ دووپاتدەکەینەوە، نابێ به‌گرێی دەرونیی و ڕقی شەخسیی و حزبیی مامه‌ڵه‌ و حوکمڕانیی بکرێ، ئه‌گه‌رنا دەرەنجام زیانی گەورەی بۆ خه‌ڵك و كۆمه‌ڵگاو حوكمڕانان لێده‌كه‌وێته‌وه‌،" فراکسیۆنەکە دەڵێت.