گه‌ڕان

Shadow Shadow
سیاسه‌تی

هۆکار چییە؟

کۆچی عێراقییەکان بۆ ئەوروپا بەڕێژەیەکی بەرچاو کەمی کردووە

2020.07.14 - 17:00
کۆچی عێراقییەکان بۆ ئەوروپا بەڕێژەیەکی بەرچاو کەمی کردووە

ناس کورد-

بەپێی دواین ئامارەکان کە پڕۆژەى کۆچبەر لە کوردستان لە دەزگای پەنابەرانی نەتەوە یەکگرتووەکانەوە وەریگرتووە، لە شەش مانگی ئەمساڵدا تەنها 28 هەزار و 729 کۆچبەر و پەناخواز لە ڕێگای دەریای ناوەڕاستەوە گەیشتوونەتە وڵاتانی ئەوروپا کە ئەفغانی و سوری و جەزائیرییەکان زۆرترینیان پێکهێناوە، هاوکات 339 کۆچبەریش لە ڕێگادا گیانیان لەدەستداوە.

 

ژمارەى گشتیی کۆچبەرانی گەیشتوو بۆ ئەوروپا لە ڕێگای دەریای ناوەڕاستەوە بەمشێوەیەی خوارەوەیە:

یۆنان: 10 هەزار و 408

ئیسپانیا: هەشت هەزار و 693

ئیتاڵیا: حەوت هەزار و 330

ماڵتا: هەزار و 776

قوبروس: 468

 

لەبارەى کۆچبەرانی عێراقی، لە مانگی کانونی دووەمی ئەمساڵ تاوەکو کۆتایی حوزەیران، نزیکەى 500 کۆچبەری عێراق خۆیان گەیاندووەتە وڵاتانی ئەوروپا کە 340 کۆچبەریان دەربازی یۆنان بوون و 99 کۆچبەری تریان گەیشتوونەتە ئیتاڵیا.

 

ئامارەکە بەراورد بە ساڵی ڕابردوو زۆر کەمترە کە ئەوەش چەند هۆکارێکی هەیە، سۆران ڕەشید، بەرپرسی میدیایی پڕۆژەى کۆچبەر لە کوردستان ڕایگەیاند، شەپۆلی کۆچبەرانی عێراقی و هەرێمی کوردستان بەرەو ئەوروپا ڕووی لە کەمی کردووە، بەڵام هۆکارەکە ناوخۆیی نیە و پەیوەندی بە سەختبوونی ڕێگای کۆچی نائاسایی هەیە.

 

سۆران ڕەشید وتیشی، هۆکاری یەکەم بڵاوبوونەوەى نەخۆشی کۆرۆنایە لە سەرانسەری جیهان، لە سەرەتای شوباتەوە تورکیا و وڵاتانی ئەوروپی بە تەواوی سنورەکانیان داخست و سەرجەم گەشتە ئاسمانییەکانیان ڕاگرت، ئەوەش بەربەستێکی سەرەکی بوو لە بەردەم کۆچبەراندا.

 

هۆکاری دووەم، بەپێی قسەکانی سۆران ڕەشید، توندکردنی سنورەکان و گۆڕانکارییە لە سیاسەتی وڵاتانی یەکێتی ئەوروپا کە بە هەموو شێوەیەک هەوڵی وەستاندنی شەپۆلی کۆچبەرانی نائاسایی دەدەن.

 

ئاماژەى بەوەشکرد، ئەمساڵ یۆنان وەزارەتێکی بە تایبەت پێکهێناوە بە ناوی وەزارەتی کۆچ کە پێشتر لە کابینەی حکومەتدا نەبووە، داوای هێزی زیاتری سنوریی یەکێتی ئەوروپای کرد بۆ پاراستنی سنور و حکومەتی یۆنان هەموو هەوڵێکی خستەگەر بۆ دیپۆرتکردنەوە و گەڕاندنەوەى ئەو کۆچبەرانەشی کە دەربازیان بووە.

 

بەپێی داتاکانی بەردەست پڕۆژەى کۆچبەر لە کوردستان، لە سەرەتای مانگی تەموزەوە شەپۆلی کۆچی عێراقی و وڵاتانی ڕۆژهەڵاتی ناوەڕاست بە چڕی دەستیپێکردووەتەوە، بە جۆرێک تەنها لە 10 ڕۆژی یەکەمی مانگی تەموزدا، 500 کۆچبەر لەلایەن هێزەی پاسەوانی دەریایی تورکیاوە دەستبەسەرکراون.