گه‌ڕان

Shadow Shadow
سیاسه‌تی

شرۆڤەکارێکى ئەمریکى: ئێران و تورکیا کازمى تاقیدەکەنەوە

2020.07.14 - 10:54
شرۆڤەکارێکى ئەمریکى: ئێران و تورکیا کازمى تاقیدەکەنەوە

ناس کورد-

شرۆڤەکارێکى سەنتەرى سیاسەتى ئەمنى لە واشنتن ڕایگەیاند، ئێران و تورکیا چاودێرى هەنگاوەکانى مستەفا کازمى، سەرۆکوەزیرانى عێراق دەکەن لەبارەى مامەڵەکردنى لەگەڵ هێزە بیانییەکان و تاقیدەکەنەوە.

 

مايا كارلين، شرۆڤەکارى سەنتەرى سیاسەتى ئەمنى لە واشنتن لە راپۆرتێکدا کە رۆژنامەى "ئیسرائیل الیوم" بڵاویکردووەتەوە ئاماژەى بەوەکردووە، تورکیا و ئێران کازمى تاقیدەکەنەوە لەبارەى ئەوەى تاچەند تواناى ئەوەى هەیە مامەڵە لەگەڵ هێزە بیانییەکان بکات، لەرێگەى ئەنجامدانى هێرشى سەربازیی رێکخراوەوە کە بێپێشینەیە لەو وڵاتە.

 

ئاماژەى بەوەشکردووە، بەدرێژایی چەند هەفتەى ڕابردوو، تورکیا و ئێران هێرشى ئاسمانى و وشکانى رێکخراویان کردووە، هێرشەکانى تورکیا بۆ سەر 150 پێگەى پەکەکە بوون لە چیاکانى شەنگال و قەندیل، هەروەها ئێران بۆردومانى سنورى حاجى ئۆمەرانى کردووە.

 

کارلین دەڵێت، محەمەد جەواد زەریف وەزیرى دەرەوەى ئیران لە ناوەڕاستى مانگى ڕابردوودا سەردانێکى رانەگەیەنراوى کردووە بۆ ئەنقەرە، کە بەپێی میدیاکانى ئێران وتویەتى سەردانەکە پێویست بووە بۆ تاوتوێکردنى پرسە دوو قۆڵییەکان و گفتوگۆکردن لەبارەى دەستپێکردنەوەى پەیوەندییە ئابورییەکان و هاریکارى لە بوارى وزە و پرسە هەرێمایەتییەکان.

 

ئەوەشى خستوەتەڕوو، هێرشە ئاسمانییەکانى تورکیا لەسنورى هەرێمى کوردستان، لەو رۆژەدا دەستیپێکردووە کە زەریف ئەنقەرەى جێهێشتووە، ئەوەش پرسیارى ئەوە دەهێنێتە ئارا کە ئایا ئەو هێرشانە لەکۆبوونەوەکانى زەریف و بەرپرسانى تورکیا پلانى بۆ دانراوە یاخود نا؟.

 

رۆژى 18ى حوزەیران، عێراق باڵیۆزانى تورکیا و ئێرانى بانگهێشتکرد لەسەر هێرشەکان، داواى لە ئەنقەرە کرد پڕۆسە سەبازییەکەى بوەستێنێت، هەروەها نیگەرانى توندى گەیاندە تاران لەبارەى هێرشەکانییەوە بۆ سەر سنور. 

 

لاى خۆیەوە، وەزارەتى دەرەوەى عێراق سەرکۆنەى هەریەکە لە تورکیا و ئێرانى کرد، بەهۆى پرۆسە سەربازییەکانیان لەسەر خاکى عێراق.

 

بەوتەى کارلین، کاردانەوەى بەغدا بۆ پڕۆسە سەربازییەکان رۆڵێکى یەکلاکەرەوە دەگێڕێت بۆ داهاتووى پەیوەندییەکانى بەغدا لەگەڵ دراوسێکانى، بەتایبەت دواى بەڵێنەکەى کازمى بۆ پاراستنى خاکى عێراق لەو لایەنانەى کە سەروەرى وڵات دەخەنە مەترسییەوە.