گه‌ڕان

Shadow Shadow
سیاسه‌تی

پارێزگاری هەولێر: بە 50 هەزار دینار پشکنین بۆ ئەو کەسانە دەکەین کە دێنە هەولێر

2020.07.13 - 13:00
پارێزگاری هەولێر: بە 50 هەزار دینار پشکنین بۆ ئەو کەسانە دەکەین کە دێنە هەولێر

ناس کورد-

پارێزگاری هەولێر ڕایگەیاند، دۆخی هەولێر باش نییە و تاکە چارەسەر ئەوەیە هاووڵاتیان خۆیان خۆیان بپارێزن، وتیشت، پلانیان داناوە لەمەودوا لە بازگەکانی بەبڕی 50 هەزار دینار پشکنینی کۆرۆنا بۆ ئەو کەسانە بکەن کە لەپارێزگاکانی دیکەوە دەچنە ناو شاری هەولێر.

 

ئەمڕۆ دووشەممە 13ی تەموزی 2020، لە کۆنفرانسێکی ڕۆژنامەوانیدا فرسەت سۆفی، پارێزگاری هەولێر ڕایگەیاند: "بەهەماهەنگی لەگەڵ بەڕێوەبەرایەتیی گشتیی تەندروستیی هەولێر پڕۆژە و پلانێکیان داناوە کە لەمەودوا تیمی تایبەت بە پشکنینی کۆرۆنا لە سەرجەم بازگەکانی چوونە ناو شاری هەولێر دابنێن."

 

وتیشی: "لەڕێگەی ئەو تیمانەوە پشکنین  بۆ ئەو کەسانە دەکرێت کە لەپارێزگاکانی دیکەوە دەچنە ناوشاری هەولێر و لە بەرامبەردا پارەیەکی ڕەمزی وەردەگیرێت کە لە 50 هەزار زیاتر نەبێت."

 

پارێزگاری هەولێر ئاماژەی بەوەشکرد: "گرتنەبەری ئەو ڕێکارە بۆ ئەوەیە هاتوچۆی نیوان پارێزگاکانی دیکەی هەریم و عێراق لەگەڵ هەولێر بکەنەوە بۆ ئەوەی کاری بازرگانی پەکی نەکەوێت و ئەگەر کێشەیان بۆ دروست نەبێ لە هەفتەی داهاتووەوە دەستپێدەکەن."

 

هاوکات دەربارەی دۆخی تەندروستیی شارەکە، پارێزگاری هەولێر باسی لەوەکرد: "بەداخەوە لەئێستادا دۆخی تەندروستیی هەولێر باش نییە، ژمارەی توشبووان لە هەڵکشاندایە و لەگەڵ ئەوەشدا خۆپارێزی هاووڵاتیان کەمە."

 

فرسەت سۆفی جەختیشیکردەوە: "ئەوەی لەسەر ئێمە و حکومەت بوو کردمان، ئێستا تاکە چارەسەر ئەوەیە کە هاووڵاتی خۆی خۆی بپارێزێت و لەشوێنی قەرەباڵغ دوربکەوێتەوە."