گه‌ڕان

Shadow Shadow
سیاسه‌تی

میترۆ: لەدانانی بەردی بناغەی شەقامی 100 مەتری سوکایەتی بە ئازادی ڕۆژنامەنوسی کرا

2020.07.11 - 17:02
میترۆ: لەدانانی بەردی بناغەی شەقامی 100 مەتری سوکایەتی بە ئازادی ڕۆژنامەنوسی کرا

ناس کورد-

لەدوای ڕێگریکردن لەمیدیا و پەیامنێرانی شاری سلێمانی لە ڕووماڵکردنی مەراسیمی دانانی بەردی بناغەی شەقامی 100 مەتری، سەنتەری میترۆ ڕایگەیاند، ئەوە سوکایەتیکردنە بە ئازادی ڕۆژنامەنوسی و هەموو بەرپرسانی بەشدار لە مەراسیمەکەدا بەشدارن لەو سوکایەتییەدا.

 

لە ڕاگەیەندراوێکدا سەنتەری میترۆ بۆ داکۆکیکردن لەمافی ڕۆژنامەنوسان ڕایگەیاند: " زۆرینەی رەهای پەیامنێرەكانی سلێمانی رێگرییان لێكراوە روماڵی مەراسیمی دانانی بەردی بناغەی پرۆژەی شەقامی 100 مەتریی سلێمانی بكەن كە بە ئامادەبوونی سەرۆك و جێگری سەرۆكی حكومەتی هەرێمی كوردستان بەرێوەچوو."

 

ئاماژەی بەوەشکردووە: "پرۆژەیەك كە بۆ سلێمانی بێت و رۆژنامەنوسانی ئەو شارە بێبەشبكرێن لە روماڵكردنی ئەو پەڕی سوكایەتی بە ئازادی رۆژنامەنوسی."

 

لەڕاگەیەندراوەکەی میترۆدا ئەوەش هاتووە: "سەرۆك و جێگری سەرۆكی حكومەت و پارێزگاری سلێمانی  و وەزیرەكان هەموو دەزانن ئەو پەیامنێرانە مافی ئامادەبوونیان هەیە لە چالاكییەكی وەك دانانی بەردی بناغەی پرۆژەیەكی بۆ خزمەتی گشتی، بۆیە هەموو بەشداربووان بەرپرسن لەم پێشێلكارییە، نەك تەنها بخرێتە ئەستۆی پرۆتۆكۆلی ئەنجومەنی وەزیران."

 

ئەوەشخراوەتەڕوو: "سەنتەری میترۆ پشتیوانی ئەو پەیامنێرانە دەكات و هەموو رێگری و جیاكاریەكیش بەرامبەر بە میدیاكاران رەتدەكاتەوەو پێیی وایە رێگری لە رۆژنامەنوسان لە ئامادەبوون لە بۆنەیەكی گشتی كە سەرۆك و جێگری سەرۆكی حكومەت تیایدا ئامادەن، هەڵكردنی هیمای سەوزە بۆ هەموو دامەزراوەكانی لە پێشێلكردنی یاسای رۆژنامەگەری."

 

ئەمە لەکاتێکدایە، ئەمڕۆ شەممە 11ی تەموزی 2020، سەرۆکی حکومەتی هەرێم هاتە سلێمانی و بەئامادەبوونی جێگری سەرۆکی حکومەت و پارێزگاری سلێمانی، بەردی بناغەی شەقامی 100 مەتریی سلێمانیان دانا، بەڵام تەنها ڕێگە بەیەک کەناڵی تەلەفزیۆنی درا کە ڕووماڵی مەراسیمەکە بکات.