گه‌ڕان

Shadow Shadow
سیاسه‌تی

’’زۆر داوامان کرد’’

لێدوانی تەندروستی سلێمانی لەبارەى سنوربەزاندنی دەروێشەکان

2020.07.10 - 11:50
لێدوانی تەندروستی سلێمانی لەبارەى سنوربەزاندنی دەروێشەکان

ناس كورد-

تەندروستی سلێمانی نیگەرانە لە هاتن و سنوربەزاندنی دەروێشەکان و لەئێستا هیچ پلانێکیان نییە بۆ ڕوبەڕبوونەوەى دۆخەکە کە ئەوان بە "مەترسیدار" لەقەڵەمی دەدەن. 

 

هێرش سەلیم، جێگری تەندروستی سلێمانی بە ناس کوردی ڕاگەیاند، دوێنێ "زۆر داوامان کرد ڕێگە بە دەروێشەکان نەدرێت دەربازی سنور بن بەهۆی مەترسی بڵاوبوونەوەى زیاتری کۆرۆنا، بەڵام هەوڵەکان شکتیان هێناوە، دیارە ئەوان ئیعازیان وەرگرتووە کە هەر دەبێت داغڵ بن."

 

هێرش سەلیم وتیشی، "دەسەڵات و ئاسایش نەتوانێت شتێک بکات ئێمە چیبکەین، سوپای پاسدارن هیچی پێ نەکراوە، ئێمەش هەروا سەیری دۆخەکە دەکەین چونکە هیچ لە دەسەڵات ئێمەدا نییە."

 

ئاماژەى بەوەشکرد، "ئەو بابەتە مەترسییەکی جدی تەندروستی دروستدەکات چونکە هەندێکیان چوونەتە ناو خەڵکی و خەڵکیش تێکەڵاویان بووە."

 

ڕاشیگەیاند، "تاکە ڕێگەچارە ئەوەیە ڕێگە نەدەین بچنە ناو خەڵکی و لە یەک شوێندا دابنرێن تاوەکو کاری خۆیان تەواو دەکەن."

 

هاوکات کۆمەڵەى ڕێکخراوە مەدەنییەکانی سلێمانی ئیدانەى "هاتنی بەلێشاوی گروپێکی ئاینی و سنوربەزاندنیان" دەکەن کە "جگە لە مەترسیی تەندروستی، لەژێر ناوی ئایندا یاسا کارپێکراوەکان پێشێل دەکەن."  

  

ئەمڕۆ هەینی، 10ی تەموزی 2020، نوێنەری ئەو ڕێکخراوانە گردبوونەوەیەکیان ئەنجام دا و ڕایانگەیاند، دەروێشەکان "بانگەشە بۆ ڕەتکردنەوەى زانستە پزیشکی و دونیاییەکان دەکەن و دەڵێن ڤایرۆسی کۆرۆنا مەترسی نییە کە پێشتر ئەو جۆرە لێدوانە لەلایەن حکومەتی هەرێمەوە قەدەغە کراوە."  


ئاماژەیان بەوەش کردووە، "دانانی پرسە و ئەنجامدانی هەر کۆبوونەوەیەک بۆ هەر کەسایەتی و لەژێر هەر ناوێکدا بێت کە ڕێکارە تەندروستییەکان بشکێنێت ئیدانە دەکەین.."  

me_ga.php?id=546  

لەدوای بەزاندنی سنوری ئێران و هەرێمی کوردستان بە زۆر و فشار لەلایەن چەند هەزار دەروێشێکەوە، جێگری سیاسیی و ئەمنی پارێزگاری کوردستان (سنە) دەڵێت، بەهۆی پەرەسەندنی کۆرۆنا و جێبەجێنەکردنی ڕێنماییە تەندروستییەکان، "ئێستا دۆخەکە بۆ بەشداریی خەڵک لە پرسەی پیری تەریقەتی قادری مسۆگەر نییە."    

 

  

حسێن خوەش ئێقال لە کاردانەوەی ئەو ڕووداوەکەی دوێنی سنوری باشماخ لە نێوان مەریوان و سلێمانی ڕایگەیاند، لە ئێستادا دۆخەکە گونجاو نییە بۆ بەشداریی لە پرسە.    

  

وتیشی، "بەهۆی پەرەسەندنی کۆرۆناوە سنورەوانانی عێراقی ڕێگرییان لە دەروێشەکان کردووە و کێشە دروست بووە و دەروێشەکان گوشاریان هێناوە کە دەربازی ئەو دیوی سنور بن، و بەم بۆنەوە تەقەی ئاسمانی کراوە و کەسیش نەکوژراوە."    

  

هاوکات دوێنێ بەڕێوەبەری دەروازەی سنوری باشماخ ڕایگەیاند، زانیارییان هەیە نزیکەی سێ هەزار دەروێشی دیکە بەرەو هەرێمی کوردستان بەڕێکەوتوون، دەشڵێت، هەربەوبۆنەوە هێزی ئەمنییان لە دەروازەکە زیاد کردووە و لەسەر فەرمانی جێگری سەرۆکی حکومەتیش بۆماوەی 24 کاتژمێر دەروازەکەیان داخست.      

  

لیوا مەریوان کەمال، بەرپرسی دەروازەی سنوری باشماخ بە ناس کوردی ڕاگەیاند: "لەسەر فەرمانی، قوباد تاڵەبانی، جێگری سەرۆکی حکومەت بۆ ئاساییکردنەوەی ئەو دۆخەی دوێنێ ڕوویدا، دەروازەکە بۆماوەی 24 کاتژمێر داخرا."      

  

وتیشی: "لەئێستادا زیاتر لە 200 دەروێشی دیکە لە دەروازەکەن و دەیانەوێت بێنە هەرێم، بەڵام ڕێگەمان لێگرتوون، هەروەها زانیاریمان هەیە کە نزیکەی سێ هەزار دەروێشی دیکە بەڕێکەوتوون بۆئەوەی لەدەروازەکەوە بێنە هەرێمی کوردستان."      

  

بەڕێوەبەری دەروازەی باشماخ ئاماژەی بەوەشکرد: "هەروەها ژمارەی هێزەکانمان لە دەروازەکە زیاد کردووە هێزی ئاسایش و بەرگریمان هێناوە بۆ ئەوەی ڕێگە نەدەین هیچ کەسێکی دیکە بێتە ناوەوە."      

  

ئەمە لەکاتێکدایە، پاشنیوەڕۆی دوێنێ پێنجشەممە، 9ی تەموزی 2020، زیاتر لە دوو هەزار دەروێش لە ئێرانەوە دەروازەی سنوری باشماخیان شکاند و هاتنە هەرێمی کوردستان و لەئێستادا بەرەو سلێمانی بەڕێکەوتوون، بۆ بەشداریکردن لە پرسەی شێخ محەمەد کەسنەزانی، ڕێبەری پێشووی تەریقەتی کەسنەزانی لە جیهاندا کە لە ئەمریکا کۆچی دوایی کرد و بڕیارە سبەینێ تەرمەکەی بگاتەوە شاری سلێمانی.