گه‌ڕان

Shadow Shadow
سیاسه‌تی

یەکێکیان لەپێش چاوی کەسوکاری گولەباران کراوە

لەشەش مانگی ئەمساڵدا 30 هاووڵاتی کورد لە ڕۆژهەڵاتی کوردستان لەسێدارەدراون

2020.07.09 - 22:37
لەشەش مانگی ئەمساڵدا 30 هاووڵاتی کورد لە ڕۆژهەڵاتی کوردستان لەسێدارەدراون

ناس کورد-

ڕێکخراوی هەنگاو بۆ مافەکانی مرۆڤ ئاشکرایکرد، لەماوەی شەش مانگی سەرەتای ئەمساڵدا 30 هاووڵاتی کورد لە ڕۆژهەڵاتی کوردستان لە سێدارەدراون، ئاماژەی بەوەشکردووە، دوو کەسیان لەکاتی ئەنجامدانی تاوان تەمەنیان خوار 18 ساڵ بووە و یەکێکیشیان لەپێش چاوی بنەماڵەکەی گولەباران کراوە.

 

ئەمڕۆ پێنجشەممە 9ی تەموزی 2020، ڕێکخراوی هەنگاو بۆ مافەکانی مرۆڤ ڕایگەیاند: "لە شەش مانگی یەکەمی ئەمساڵدا %24ی ئەو کەسانەی لە ئێران لەسێدارەدراون کورد بوون و لانیکەم 30 هاووڵاتی کورد لە سێدارەدراون."

 

ئاماژەی بەوەشكردوەە: " لە کۆی ئەو 30 هاووڵاتییە کوردە، دوو کەسیان بە تۆمەتی چالاکی سیاسی، دوو کەسیان بە تۆمەتی بازرگانی کردن بە ماددە سڕکەرەکان و 26 کەسیشیان بە تۆمەتی کوشتنی ئەنقەست لەسێدارە دراون."

 

ڕێکخراوەکە ئەوەشی خستووەتەڕوو: " هەروەها، دوو کەسیان لە کاتی ئەنجامدانی تاوان تەمەنیان خوار 18 ساڵ بووە و لە بەندیخانەکانی ئورمیە و سەقز لەسێدارە دراون."

 

هەنگاو ئاماژەی بەوەشكردووە: " هیدایەت عەبدوڵڵاپوور، بەندکراوی سیاسی خەڵکی شنۆ لە پیش چاوی کەسوکاری لەلایەن ئەندامانی سوپای پاسداران گولەباران کراوە کە لە ماوەی ساڵانی ڕابردوودا کەس بەمشێوەیە سزا نەدراوە و دەکرێت دەستپێکێک بێت بۆ سەرلەنوێ گولەباران کردنی چالاکانی سیاسی".