گه‌ڕان

Shadow Shadow
سیاسه‌تی

قەیرانی كۆرۆنا هۆكارە 

سێیەكی دانیشتوانی ئەمریكا نەیانتوانیوە كرێ و قیستەکانیان بدەنەوە

2020.07.09 - 11:19
سێیەكی دانیشتوانی ئەمریكا نەیانتوانیوە كرێ و قیستەکانیان بدەنەوە

ناس کورد- 

ڕاپرسیەكی ماڵپەڕێكی تایبەتمەندی ئەمریكی ئاشکراى کرد، نزیكەی سێیەكی دانیشتوانی ئەمریكا لەمانگی تەمموزدا نەیانتوانیوە كرێ و قیستی تەواوی شوێنی نیشتەجێ بوونیان بدەنەوە و بۆ مانگەكانی ڕابردووش گرفتیان هەبووە لەنەدانەوە یاخود دواكەوتن و بەشێكیش نەیانتوانیوە كرێ و قیستی تەواوی مانگەكە بدەنەوە، هەموو ئەوانەش بەهۆی قەیرانی كۆرۆناوە.

 

بەگوێرەى ڕاپرسییەكی ماڵپەڕی( ئەپارتمانت لیست) كە تایبەتە بەپرسی نیشتەجێكردن لە ئەمریكا، دەركەوتووە مانگی حوزەیران چوارەم مانگە لەسەر یەك كە لەمێژووی ئەو وڵاتە دانیشتوانی ئەمریكا ڕوبەڕووی ئاستەنگ بونەتەوە لەدانەوەی كرێ و قیستی نیشتەجێ بوون.

 

لەسەرەتای ئەم مانگەوە، ماڵپەڕەكە دەستى بە راپرسییەکەى کردووە و لە هاووڵاتیانى پرسیوە: ئایا كریێ نیشتەجێ بوون یاخود قیستەكانت داوەتەوە...؟

 

بەپێی ئاكامەكانی ڕاپرسیەكە دەركەوتووە، لە 19%ی ئەو هاووڵاتیانەى کە قیست و کرێیان لەسەرە لەسەری ئەم مانگە نەیانتوانیوە هیچ جۆرە كرێیەكی نیشتەجێبوون یاخود قیستەكانیان بدەنەوە و لە 13%یان توانیویانە بەشێك لەو كرێ و قیستەی لەسەریانە بدەنەوە.

 

هەر بەگوێرەى ئاكامی ڕاپرسیەكە، بەڕێژەی 30%ی نمونەی ڕاپرسییەكە توانیویانە كرێى نیشتەجێ بوون و قیستی مانگی حوزەیرانی ڕابردوو بدەنەوە و لە 19% نەیانتوانیوە هیچ جۆرە قەرزێكی ئەو بوارە بدەنەوە.

 

لەمانگی ئایاریشدا بەڕێژەی 31% دواكەوتن هەبووە لەدانەوەی كرێ و قیستەكان و لە22% هیچ جۆرە كرێ و قەرزێك نەدراوەتەوە.

 

لەمانگی نیسانیشدا بەڕێژەی 24% خەڵكی دواكەوتووە لەدانەوەی كرێ و قیست و 12% هیچ جۆرە كرێ و قیستێك نەدراونەتەوە.

 

هەر بەگوێرەى ئاكامی ڕاپرسییەكە، لە90%ی سامپڵی ڕاپرسییەكە كرێ و قیستی لەوادەی خۆیدا بەشیك یاخود تەواوی قەرزەكەی مانگانە نەداوەتەوە.

 

ئاماژە بۆ ئەوەش كراوە، لە 70% ئەو خێزانانەی كە لەدانەوەی قەرزی مانگی حوزەیراندا دواكەوتوون بەهەمان شێوە لەدانەوەی قەرزی مانگی تەمموزیشدا دواكەوتوون.

 

ڕاپرسییەكە دەریخستووە، لە36%ى كرێ نشینان نەیانتوانیوە كرێكەیان بدەن و لە 30%ى خاوەن قیستەكان نەیانتوانیوە قەرزەكەیان بدەنەوە.

 

هۆكاری بەشێكی زۆری قەیرانە ئابوورییەكان لەزۆربەی وڵاتاندا بۆ بڵاوبونەوەی پەتای كۆرۆنا دەگەڕێتەوە كە زۆر كەرتی پەكخستوە یاخود لاوازی كردووە لەوانە كەرتی ئابووری.