گه‌ڕان

Shadow Shadow
سیاسه‌تی

كتێبەكە برازايەكى ترامپ نوسيويەتى 

ئەو كتێبەى كۆشكى سپى توڕە كردوە ’ترامپ كاريگەرى باوكى لەسەر بوو کە نەخۆشى دەرونى هەبوو’

2020.07.08 - 23:46
ئەو كتێبەى كۆشكى سپى توڕە كردوە ’ترامپ كاريگەرى باوكى لەسەر بوو کە نەخۆشى دەرونى هەبوو’

ناس کورد- 

كۆشى سپى وەڵامى كتێبەكەى "مارى ترامپ" برازاى دۆناڵد ترامپ سەرۆكى ئەمريكاى دايەوە و كتێبەكەى بە "كتێبى درۆكان" وەسف کرد.

 

سارە ماسيوز، جێگرى وتەبێژى كۆشكى سپى ڕايگەياند، مارى ترامپ و كۆمپانياى بڵاوكردنەوەى كتێبەكە دەڵێن كە بۆ بەرژەوەندى گشتى كار دەكەن، بەڵام ئامانجى كتێبەكە بە ئاشكرا بەدەستهێنانى بەرژەوەندى داراييە لەلايەن نوسەرەكەيەوە.

 

كتێبەكەى "مارى ترامپ" كە ناوى "زۆر لەوەى كە پێويستە و هەرگيز بەس نييە: چۆن خێزانەكەم مەترسيدارترين پياوى جيهانى دروستكرد؟" هەڵگرتوە لەئێستادا لە ماڵپەڕى ئەمازۆن بەردەستە، ئەوەش لەكاتێكدايە كە تەنها كەمتر لە چوار مانگى ماوە بۆ هەڵبژاردنى سەرۆكايەتى ئەمريكا كە بڕيارە لەمانگى 11ى ئەمساڵدا ئەنجام بدرێت.

 

لە كتێبەكەدا كە 240 لاپەڕەيە هاتوە، "دۆناڵد ترامپ زۆر كاريگەى باوكى "فرێد ترامپ"ى لەسەر بووە كە  نەخۆشى دەرونى هەبووە و ڕقى لە هەموو كەس بووە و ژينگەيەكى ئازاردەر و شۆكهێنەرى لە ماڵەكەيدا دروست كردوە"، سەبارەت بەو قسانە ماسيوز وتويەتى "بە قسەى سەرۆك باوكى خۆشەويست بووە و هەرگيز توند نەبوە لە مامەڵەكردن لەگەڵ منداڵەكانى".

 

مارى لە كتێبەكەيدا باسى لەوەشكردوە، "ترامپ پارەى بە كەسێكى تر داوە كە لە تاقيكردنەوەى "سات"دا لەبرى ئەو بەشدارى بكات كە ئەوەش هاوكار بووە بۆى تا بچێتە كۆلێژى كارگێڕى لە زانكۆى بنسلڤانيا"، جێگرى وتەبێژەكەى كۆشكى سپى لە وەڵامى ئەوەدا دەڵێت "ئەو تۆمەتانەى تايبەتن بە تاقيكردنەوەى "سات" بێمانان و بە تەواوەتى درۆن".

 

مارى تەمەن 55 ساڵ شارەزاى زانستى دەرونييە و كچى "فرێد ترامپ جۆنيۆر" برا گەورەى ترامپە كە لەساڵى 1981 دا كۆچى دوايى كردوە ئەوەش بەهۆى ئالودەبونى بە خواردنەوە كحوليەكانەوە.

 

مارى خاوەنى چەندين كتێبە و ئەمەى كۆتايى چەندين زانيارى ئازەردەرى بۆ دۆناڵد ترامپ تێدايە، پێشتريش "جۆن بۆڵتۆن" ڕاوێژكارى پێشووى ئاسايشى نيشتمانى ئەمريكا ترامپى بە گەندەڵ و بێتوانا وەسف كردبوو ئەوەش لە كێبەكەيدا كە مانگى پێشوو بڵاويكردەوە، ترامپ ئەو كتێبەكەشى بە "هەڵبەستراوى خەياڵ" وەسفكرد.