گه‌ڕان

Shadow Shadow
چیرۆكه‌كانمان

نابێت سیستمی 32٪ بۆ هەر پێکهاتەیەک لە ئیدارەدانی شارەکە پەیڕەو بکرێت

کورد داوای کاری هاوبەشی پێشمەرگە و سوپای عێراق دەکات لە کەرکوک

2019.04.18 - 08:45
App store icon Play store icon Play store icon
کورد داوای کاری هاوبەشی پێشمەرگە و سوپای عێراق دەکات لە کەرکوک

کەناڵی ناس کورد لە تێلیگرام جۆین بکە   

 

ناس كورد- هەڤاڵ فەتاح

.

پاش ئەوەی شاندێکی حکومەتی عێراق سەردانی شاری کەرکوکی کرد، ناس کورد ناوەڕۆکی داواکارییەکانی کورد لەو شاندە ئاشکرا دەکات، کە گرنگترینیان، ئیدارەدانی پارێزگاکەیە بە دەرئەنجامی هەڵبژاردنەکان و دروستكردنی پاڵاوەگەیەك بوو.

.

كاكە ڕەش سدیق ئەندامی ئەنجومەنی پارێزگای كەركوك كە هاوكات یاوەری شاندەکەی حکومەتی عێراق بوو، تایبەت بە ناس كورد-ی راگەیاند: "شاندەكەی حكومەتی عێراق لەسەر داواكاری كورد سەردانی كەركوكیان كردووە، دوای كۆبوونەوە لەگەڵ شاندەكە، یاداشتێكمان داوەتە ئەوان و چاوەڕێ‌ دەكەین بەزوترین كات وەڵاممان بدرێتەوە".

.

ئەو ئەندامەی یەکێتی لە ئەنجومەنی پاریزگای کەرکوک، باسی لەوەکرد، شاندەكە هەموو داواكارییەكانی كوردی بەهەند وەرگرتووە، بۆ ئەوەی پێشكەش بە سەرۆكوەزیرانی عێراق بكرێت.

.

بە وتەی کاکە ڕەش داواكارییەكانی کورد بریتین لە "دروستكردنی ژورێكی ئۆپراسیۆنی هاوبەش لە نێوان هێزەكانی پێشمەرگە و هێزەعێراقییەكان، دروستكردنی پاڵاوگەیەك بۆ شارەكە كە توانای دابینکردنی زیاتر لە 150 هەزار بەرمیل نەوتی ڕۆژانەی هەبێت، نۆژەنكردنەوەی ڕێگای سەرەكی كەركوك-بەغداد، دابینكردنی بەرهەمە نەوتییەكان بۆ هاوڵاتیانی شارەكە و پێشخستنی كەرتی تەندروستی شارەكە لە هەموو ڕویەكەوە".

.

"بە شاندەكەی حکومەتی عێراقمان ڕاگەیاندووە، كورد بەهیچ  شێوەیەك ڕازی نییە میكانیزمی 32% بۆ هەر پێکهاتەیەک بۆ ئیدارەدانی شارەكە پەیڕەو بکرێت"، ئەندامەکەی ئەنجومەنی پارێزگای کەرکوک وای وت.

.

وتیشی، شاندەكە ئاگاداركراوەنەتەوە كە دەبێت ئیدارەدانی  شارەكە، بەپێی لێكەوتەی دوایین هەڵبژاردن و هەردوو سەرژمێری 1947 و 1957 بێت.

.

لە 14ی ئەم مانگە شاندێكی حكومەتی عێراقی بە سەرۆكایەتی وەزیری نەوتی عێراق، بە یاوەری وەزیری سەرچاوە ئاوییەكان و جێگری وەزیری ناوخۆی عێراق و چەند پەرپرسێكی حكومی، سەردانی شاری كەركوكیان كرد، بۆ ئاگاداربوون لە گرفتەکانی شارەکە.

.

.