گه‌ڕان

Shadow Shadow
سیاسه‌تی

هۆکارەکە چییە؟

وەزیری کشتوکاڵ بە ڤیدیۆیەک وەڵامی ئەوە دەداتەوە بۆچی تەماتەی هەرێم بۆ دۆشاو نابێت (ڤیدیۆ)

2020.07.07 - 17:29
وەزیری کشتوکاڵ بە ڤیدیۆیەک وەڵامی ئەوە دەداتەوە بۆچی تەماتەی هەرێم بۆ دۆشاو نابێت (ڤیدیۆ)

ناس کورد-

دروستبوونی کێشەی ساغنەبوونەوەی تەماتەی جوتیارانی هەرێم بەتایبەت لە هەولێر کاردانەوەی زۆری بەدوای خۆیدا هێنا، بەتایبەت دوای ئەوەی، وەزیری کشتوکاڵی هەرێم، ڕایگەیاند، ئەو تەماتەیەی هەرێمی کوردستان بۆ بەرهەمهێنانی دۆشاو گونجاو نییە.

 

دوای دروستبوونی هەڵایەکی زۆر لە تۆڕە کۆمەڵایەتییەکان لەسەر قسەکانی بێگەرد تاڵەبانی، ناوبراو بە دانانی ڤیدیۆیەک لە پەیجی خۆی لە فەیسبوک جەخت لە قسەکانی دەکاتەوە.

 

بێگەرد تاڵەبانی ڤیدیۆی وتەبێژی کارگەی دۆشاوی تەماتەی هەریری داناوە کە هەمان ئەو قسانە دەکات کە پێشتر وەزیری کردوویەتی.

 

لە ڤیدیۆکەدا وتەبێژەکەی کارگەى تەماتەى هەریر دەڵێت، ئەو تەماتەیەی کە جوتیارانی هەرێم بەرهەمیدەهێنن بۆ دۆشاوی تەماتە گونجاو نییە، دەشڵێت، بۆ یەک قوتو دۆشاو هەشت کیلۆ لەو تەماتەیەی جوتیارانی هەرێمی پێویستە.

 

ئەمڕۆ سێشەممە، 7ی تەموزی 2020، وتەبێژی کارگەی دۆشاوی تەماتەی هەریر لە کۆنگرەیەکی رۆژنامەوانیدا ڕایگەیاند: "ئەو تەماتەیەی بۆ دۆشاوی تەماتە بەکاردێت، پێویستە تۆوەکەی جیاواز بێت لە تۆوی ئەو تەماتەیەی ئێستا جوتیارانی هەرێم بەکاریدەهێنن بۆ تەماتەی خواردن."

وتیشی: "پێویستە تەماتەی بەرهەمهێنانی دۆشاو، گۆشتن بێت و ئاوی کەم بێت بۆ ئەوەی هەم ڕەنگ و کوالێتی دۆشاوەکە جوان بێت و تێچوویەکی کەمتریشی هەبێت لەسەر کارگەکە."

 

وتەبێژی کارگەی دۆشاوی تەماتەی هەریر ڕوونیشیکردەوە: "ئەو تەماتەیەی ئێستا لە هەرێم هەیە، لە هەشت کیلۆی یەک قتوو دۆشاوی لێ دەردەچێت."