گه‌ڕان

Shadow Shadow
سیاسه‌تی

کەسە نزیکەکانى چى دەڵێن؟

نیویۆرک تایمز: گروپە چەکدارەکان هەڕەشەیان لە هاشمى کردوە بەڵام ئەو بەرەو هەولێر هەڵنەهاتوە

2020.07.07 - 10:10
نیویۆرک تایمز: گروپە چەکدارەکان هەڕەشەیان لە هاشمى کردوە بەڵام ئەو بەرەو هەولێر هەڵنەهاتوە

ناس کورد-

هیشام هاشمى، توێژەرى دیارى ئەمنى عێراقى پێش تیرۆرکردنى لەلایەن ئەو گروپە چەکدارانەوە کە ئێران پشتیوانیان دەکات هەڕەشەى کوشتنى لێکراوە و کەسە نزیکەکانى ئامۆژگاریان کردووە بەرەو هەولێر هەڵبێت، ئەوەش بەپێی راپۆرتێکى رۆژنامەى نیویۆرک تایمزى ئەمریکى.

 

رۆژنامەکە لە راپۆتەکەدا باسى لە دوایین کاتژمێرەکانى هاشمى کردووە، پێش ئەوەى ئێوارەى دوێنێ (دووشەممە) لەبەردەم ماڵەکەیدا لە رۆژهەڵاتى بەغدا تیرۆر بکرێت. 

 

ئاماژە بەوەشکراوە، هاشمى رۆژى (دووشەممە) تیرۆر کراوە دواى ئەوەى هەڕەشەى پێگەیشتووە لەو گروپە چەکدارانەى کە لەلایەن تارانەوە پشتیوانى دەکرێن.

 

یەکێک لە ئەندامانى خانەوادەکەى کە نەیویستووە ناوى بهێنرێت دەڵێت، دوو چەکدار کە لەسەر ماتۆڕێک بوون تەقەیان لە هاشمى کردووە، لەدەرەوەى ماڵەکەى لەناوچەى زیونەى بەغدا و گوێیان لە دەنگى پێنج فیشەک بووە.

 

ئاماژەى بەوەشکردووە، چەند هەفتەیەک لەمەوبەر، هاشمى کەسە نزیکەکانى ئاگادارکردووەتەوە کە ترسی هەیە میلیشیاکانى سەر بە ئێران هەوڵى کوشتنى بدەن، بۆیە هاوڕێ و کەسە نزیکەکانى ئامۆژگاریان کردووە بەرەو هەولێر هەڵبێت.

 

بەپێی راپۆرتەکە، هاشمى وەک شارەزایەکى کاروبارى داعش و گروپە توندڕەوەکان، هاوکارى هاوپەیمانانى کردووە بەسەرۆکایەتى ئەمریکا لەکاتى شەڕى دژى داعش و گروپە توندڕەوەکاندا.

 

دواى ڕاگەیاندنى سەرکەوتن بەسەر داعش لەکۆتایی ساڵى 2017، هاشمى هەوڵیداوە بەشێوەیەکى زیاتر گرنگى بدات بە لێکۆڵینەوە لەو گروپانەى ئێران پشتیوانیان دەکات و هاوکار بوون بۆ تێکشکانى داعش و ئێستا خاوەنى هێزێکى زۆرن لە عێراق.

 

هاشمى بەراشکاوى رەخنەى لەهەندێک لەو گروپانە دەگرت کە خاوەنى هەزاران چەکدارن.

  

ئیحسان شەمەرى، شیکەرەوەى سیاسی هاوڕێی هاشمى دەڵێت، ئەوانەى هاشمیان تیرۆر کرد دەیانەوێت ئەو کەسانە بێدەنگ بکەن کە هاوبۆچونیان نین.  

  

لەهەندێک لە تویتەکانى ئەمدواییەیدا پێش تیرۆرکردنى، هاشمى رەخنەى لە دابەشبوونەکان و گەندەڵى گرتووە کە سیستەمى سیاسی عێراق پێوەى دەناڵێنێت.

 

رۆژى (یەکشەممە) هاشمى نوسیبووى "ماف و خوێن و رێزى عێراقییەکان لەدەستدەچێت، داهاتەکەیان دەڕوات بۆ گیرفانى سیاسییە گەندەڵەکان".