گه‌ڕان

Shadow Shadow
سیاسه‌تی

ئێران هێرشدەکاتە سەر کازمى و جموجۆڵەکانى بە گوماناویی ناودەبات

2020.07.06 - 22:06
ئێران هێرشدەکاتە سەر کازمى و جموجۆڵەکانى بە گوماناویی ناودەبات

ناس کورد-

 

دەزگا فەرمییەکانى ڕاگەیاندنی کۆماری ئیسلامی ئێران هێرشیانکردە سەر مستەفا کازمی سەرۆکوەزیرانی عێراق و ئاماژەیان بەوەکردووە، جموجۆڵەکانی ئەم دواییانەی کازمی مایەی گومانە و تۆمەتباریانکرد بە دانانی بەربەست بەرانبەر دەستەی حەشدی شەعبی.

 

 

ئەمڕۆ دووشەممە 6ی تەموزی2020، ئاژانسی هەواڵی "میهر"ی فەرمی ئێران، لە ڕاپۆرتێکیدا هێرشی کردە سەر مستەفاکازمی و ئاماژەى بەوەکردووە، "سەرباری ئەوەی لایەنە شیعەکان متمانەی خۆیان بەخشییە کازمی بۆ ئەوەی پۆستی سەرۆکایەتی حکومەت وەربگرێت ئەوەش بەمەبەستی چارەسەرکردنی کێشە کەڵەکەبووەکانی عێراق بە ویژدان، بەڵام ناوبراو لەو ئەرکەی پێ ڕاسپێدراوە لایداوە و خەریکی جموجۆڵی گوماناوییە".

 

بەپێی راپۆرتەکە، "کازمی کارە گرنگەکان و لە پێشینەکانی وەک ئەنجامدانی هەڵبژاردنێکی پێشوەختەی پاکو بێگەردی پشتگوێ خستووە ودەستیکردووە بە گوڕانکاری گوماناوی لە پەیکەری ئەمنیی عێراقدا".

 

 ئاژانسە ئێرانییەکە، لابردنی فالح فەیاز، ڕاوێژکاری پێشووی ئاسایشی نیشتیمانی عێراق لە پۆستەکەی بە بەشێک لە "کارە پڕگوماناوییە و نادروستەکانی کازمی" وەسفکردوە. 

 

لای خۆیەوە سەلام ڕوبەیعی، ڕۆژنامەنوسی عێراقی لە باری هێرشی دەزگاکانی ڕاگەیاندنی ئێران بۆ سەر سەرۆکوەزیرانی عێراق، دەڵێت "کازمی ئەو باڵەی کە لەناو حکومەتی ئێراندا پاڵپشتی میلیشیاکانی عێراق دەکەن توڕەکردووە، بۆیە ئێستا بەفەرمی  بە ئاشکرا هێرشی تووند دەکەنە سەری".

 

هاوکات عەلی رەزا، شارەزا لە کاروباری گروپە چەکدارەکان بە ماڵپەرەی حوڕەی ئەمریکی وتووە "لابردنی فالح فەیاز گورزێکی کەمەر شکێن بوو بۆ ئێران، چونکە فەیاز ئاسانکاری بێ سنوری دەکرد بۆ جموجۆڵەکانی ئەندامانی ئەو میلیشیایانە".

 

ئاماژەی بەوەشکردووە "دەزگای ئاسایشی نیشتمانی لە سەردەمی فەیازدا کاری کردووە لەسەر چاودێرکردنی ئەو چالاکوانانەی کە دژ بە ئێران چالاکیان کردووە، لە هەمانکاتیشدا درێغی کردووە لە فەراهەمکردنی زانیارییەکان دەربارەی ئەو میلیشیانەی کە ڕۆڵیان هەبووە لە هاویشتنی موشک بۆ سەر فرۆکەخانەکان و بنکە سەربازییەکانی عێراق و زانیاری لەسەر جموجۆڵەکانی داعش پێش کەوتنی موسڵ ئاشکرا نەکردووە".