گه‌ڕان

Shadow Shadow
سیاسه‌تی

هێرشی ئەلیکترۆنی یان ڕووداوی سروشتی؟

تەقینەوە گوماناوییەکان لە ئێران بەردەوامن.. ئەمڕۆش وێستگەیەکی گەورەى بەرهەمهێنانی وزە تەقییەوە

2020.07.04 - 17:35
تەقینەوە گوماناوییەکان لە ئێران بەردەوامن.. ئەمڕۆش وێستگەیەکی گەورەى بەرهەمهێنانی وزە تەقییەوە

ناس کورد- 

تەقينەوە و ئاگركەوتنەوە لەناکاو و گوماناوییەکانی كۆمارى ئيسلامى ئێران بەردەوامن و ئەمڕۆش تەقينەوەيەكى گەورە لە وێستگەى بەرهەمهێنانی وزە و كارەبا لە پارێزگای ئەهواز ڕوويدا و لێدوانى بەرپرسانى ئەو وڵاتەش لەسەر هۆكارى تەقينەوەكە جياوازە.

 

میدیاکانی ئێران بڵاويانكردوەتەوە، وێستگەى كارەباى "زەرقان" كە گەورەترين وێستگەى شارى ئەهوازە گڕيگرتوە، ئەوەش لەكاتێكدايە لەماوەى چەند ڕۆژى رابردوشدا ئاگرێكى گەورە لە نزيكە بنكەيەگى سەربازى و تەقيەوەيەكى تر لە پێگەيەكى ئەتۆمى ئەو وڵاتە ڕوياندا.

 

باس لەوەشكراوە، ئاگرەكە بەهۆى تەقينەوەيەكى گەورە بوو لە وێستگەكە، ئاژانسى "تەسنيم" ڤيديۆى ئاگرەكەى داناوە و لەزارى سەرۆكى بەشى ئاگركوژێنەوەى ئەهوازەوە بڵاويكردوەتەوە، تيمى ئاگركوژێنەوە ئاگرەوەكەيان كۆنترۆڵ كردوە و سەرقاڵى فێنككردنەوەى ناوچەكەن.

 

بەڵام لاى خۆيەوە بەرپرسێكى ترى ئێرانى بە هەمان ئاژانسى وتوە، هيچ تەقينەوەيەك ڕوينەداوە و تەنها ئاگر بووە كە بەهۆى گڕگرتنى يەكێك لە محاويلەكانەوە بووە و ئاگرەكە بە 20 خولەك كۆنترۆڵ كراوە.

 

بەپێى زانياريەكانی چەند میدیایەکی جیهانی، ئەو وێستگە كارەباييە پەيوەستكراوە بە وێستگە ئەتۆميەكانى ترى ئێرانەوە لە بوشەهر و دارخوين.

 

ڕۆژى پێنجشەممەش، دەسەڵاتدارانى ئێران ئاشكرايانكرد، ڕوداوێكى تری نادیارلە وێستگەى ئەتۆمى "نتنز" لە ناوەڕاستى ئێران ڕويداوە، بەڵام حكومەتى ئەو وڵاتە ڕەتيكردوەتەوە كە هۆكار و چۆنێتى ڕوداوەكە ئاشكرا بكات و جەختیکردەوە كە لە كاتى گونجاودا زانيارى بڵاودەكەنەوە ئەوەش بەهۆكارى ئەمنى.

 

لەلايەكى ترەوە ئاژانسى ڕۆيتەرز لەزارى سێ بەرپرسى ئێرانيەوە ئاشكرايكردوە، پێيان وايە كە هێرشەكەى "نتنز" هێرشی ئەلكترۆنى (سایپەر ئەتاک) بووە، هەروەها گۆڤارى "فۆربس"ى ئەمريكى ئەوەى بڵاوكردوەتەوە، ئاگرەكەى ئەو وێستگە ئەتۆميە بەهۆى هێرشى ئەلیكترۆنى ئيسرائيليەوە بووە، ئەوەش وەك وەڵامدانەوەى ئەوەى كە لەماوەى ڕابردودا ئێران هەوڵى دا هێرشى ئەلیكترۆنى بكاتە سەر ژێرخانى ئاوى ئيسرائيلى.

 

ئەوەش وەك هەمان ئەو هێرشەيە كە لەساڵى 2010 ئەمريكا و ئيسرائيل كرديانە سەر دامەزراوە ئەتۆميەكانى ئێران و نزيكەى 1000 ئامێرى ئەتۆمييان تێكدا و بەرنامە ئەتۆميەكەى تاران پاشەكشەيەكى گەورەى بەخۆيەوە بينى.

 

تەقينەوەى ناديار

لەماوەى چەند هەفتەى ڕابردودا ئێران چەندين تەقينەوە و ئاگركەوتنەوەى ناديارى بەخۆيەوە بينى، لە ديارترينيشيان ئەو تەقينەوە بوو كە لە ڕۆژهەڵاتى تارانى پايتەخت لە كۆتاييەكانى مانگى شەش ڕويدا.

 

لاى خۆشيەوە غوڵام ڕەزا جەلالى، سەركردە لە سوپاى پاسدارانى ئێرانى باسى لەوەكردبوو، ئەگەرى هەيە تەقينەوەكە هێرشى ئەلیكترۆنى بێت.

 

بەپێى ئەو وێنانەى كە مانگى دەستگرى "سنتينال 2"ى ئەوروپى بڵاويكردبوەوە، تەقينەوە گەورەكە لە ناوچە شاخاويەكانى ڕۆژهەڵاتى تاران ڕويداوە كە شارەزايان پێيان وايە ئەو ناوچە زنجيرەيەك تونێلى تێدايە كە تێياندا چەك هەڵدەگيردرێت هەروەها موشەكيان تێدا دروست دەكرێت و لەوانەيە پەيوەندى بە چالاكى ئەتۆميەوە نەبێت.

 

ئاگرەكان دەستيان لە پشتەوەيە

هەر لەماوەى ڕابردودا زنجيرەيەك ئاگر لە ئێران كەوتنەوە كە دەسەڵاتداران و چاودێرانى تووشى تێڕامان كردوە، بەتايبەتى كە ئەو ئاگرانە هەندێك شوێنى مێژوييى و پيشەسازى و كشتوكاڵى لە تارانى پايتەخت گرتوەتەوە.

 

بەرپرسانى ئێڕانى پێيان وايە كە ئاگرەكان بەهۆى وەرزى گەرما و كێشمەكێشى نێوان جوتياران ڕوویانداوە، بەڵام هەندێكى تر بۆچونيان جياوازە و پێيان وايە دەستيان لە پشتەوەيە.