گه‌ڕان

Shadow Shadow
سیاسه‌تی

کارمەندێکى کونسوڵخانەى سعودیە زانیارى نەبیستراو لەبارەى کوشتنى خاشقچییەوە ئاشکرادەکات..فڕنەکە گەرم بکەن

2020.07.04 - 11:32
App store icon Play store icon Play store icon
کارمەندێکى کونسوڵخانەى سعودیە زانیارى نەبیستراو لەبارەى کوشتنى خاشقچییەوە ئاشکرادەکات..فڕنەکە گەرم بکەن

ناس کورد-

 

كارمەندێكی كونسوڵگەری سعودیە لەئەستەنبوڵ كە لەكاتی كوشتنی ڕۆژنامەنووس خاشقچیدا ئامادە بووە بەدادگای توركیا وتووە، دوای گەیشتنی ڕۆژنامەنووسەكە بۆناو بینای كونسوڵگەرییەكە داوای لێكراوە فڕنی تەنوور گەرم بكات و دواتریش دیوارەكەی بەخوێنەوە بینیوە، ئەوەش بەپێی ئاژانسى رۆیتەرز.

کەناڵی ناس کورد لە تێلیگرام جۆین بکە   

 

زەكی دەمیر كە كارمەندی هونەری كۆنسوڵخانەی سعودیەیە لەتوركیا، لەڕۆژی دادگاییكردنی 20 بەرپرسی سعودی  بەشێوەی ئامادە نەبوون بەتۆمەتی تێوەگلان لەكوشتنی ڕۆژنامەنووس خاشقچی، لەبەردەم دادگادا وتەی لێوەرگیرا.

 

دەمیر دەڵێت، دوای ئەوەی خاشقچی چووەتە ناو كونسوڵخانەكەوە بۆ بەڕێكردنی مامەڵەكەی بانگكراوە و ئەویش لەوێ ئامادەبووە.

 

شایەتحاڵەكە ئەوەشی گێڕاوەتەوە، دواتر 5 بۆ 6 كەس لەكونسوڵخانەكە بووە داوایان لێكردووە فڕنی تەنورێك دابخات و گڕەكەی گەرم بكات، وتووشییەتی كەشوهەوایەكی پڕ ترس و دڵەڕاوكێ باڵی بەسەر شوێنەكەدا كێشاوە.

 

مانگی تشرینی یەكەمی ساڵی 2018 خاشقچی چووە كونسڵگەری سعودیە لەئەستەنبۆڵ بۆ تەواو كردنی مامەڵەیەكی بەڵام دواتر دیارنەما و پاش چەند ڕۆژێك بەهۆی فشارەكانی توركیا و کۆمەڵگەى نێو دەوڵەتیەوە سعودیە دانینا بە کوشتنیدا.

 

بەپێی لیستی ناوی ئەوانەی كە لەو ڕوداوە تێوەگلاون دوو گەورە بەرپرسی سعودیەی تێدایە كە ئەوانیش ئەحمەد عوسێری جێگری پێشووی سەرۆكی هەواڵگری و سعود قەحتانی ڕاوێژكاری پێشووی دیوانی شانشینی ئەو وڵاتە كە هانی كوشتنی بەئەنقەستیانداوە.



لەئێستاشدا تۆمەتبارەكان بەشێوەیەكی ئامادە نەبوو دادگای دەكرێن و پێناچێت سعودیە ڕادەستی توركیایان بكات بەهۆی ئەوەی توركیا بەو هاریكارینەكردنی لە پڕۆسەی دادگای كردنییان بەشێوەیەكی نهێنی تۆمەتبار دەكات كە ساڵی ڕابردوو لەڕیاز بەڕێوەچووە.



مانگی كانوونی یەكەمی ساڵی ڕابردوو دادگای سعودیە فەرمانی لەسێدارەدانی بۆ 5 كەس دەكرد كە لەكوشتنی خاشقچیدا تۆمەتباركرابون بەڵام دواتر كەسوكاری ڕۆژنامەنوسەكە لە تۆمەتبارەكان خۆشبوون و ئەوەش دەرفەتێكە بۆ ئازادبوونیان بەپێی یاساكانی ئەو وڵاتە.

 

بنەمایەك بۆ لێكۆڵینەوەكانی دیكە…!

بەپێی وتەكانی دەمیر كە لەپەڕاوی لێكۆڵینەوەكەدا تۆمار كراوە، چەند شیشێكی گوشتی بینیوە و كاشییەكانی دەورووبەری فڕنەكەش لەخوێندا پیس بووە و دواتر بەمادەی كیمیایی پاككراوەتەوە.

 

شۆفێری سەركونسڵگەرییەكەش كە لەكاتێكی دیكەدا وتەی لێوەرگیراوە وتوویەتی، سەركونسڵگەرییەكە لەوكاتەدا فەرمانی بەكڕینی كەباب كردووە لەیەكێك لەچێشتخانەكاندا.

 

دەمیر باسی لەوەشكردووە، لەكاتی گەیشتنی ئۆتۆمبیلێكی جام رەشدا خێرا دەرگای بیناكەی كردووەتەوە و دواتر داوای لێكراوە باخچەی شوینە بەجێبهێڵێت.

 

چالاكانی مافەكانی مرۆڤ هیواخوازن دادگای ئەستەنبۆڵ تیشكێكی نوێ بخاتە سەر پرسەكە و ئەوەش ببێتە سەپاندنی سزا بەسەر ڕیازدا و تۆمەتباران دەستگیر بكرێن لەكاتی گەشتكردنیان بۆ دەرەوەی سعودیە.

 

ئەنیس كالامار بڕیاردەر لەنەتەوە یەكگرتووەكان تایبەت بەكاروباری لەسێدارەدان دەڵێت، ئەگەر ئەو پرۆسەیە سەركەوتوو بێت ئەوا ئەو دادگایە دەتوانێت دەسەڵاتێكی دادوەری جیهانی پێبدرێت و فەرمانەكانیشی جێبەجێ بكرێت.

 

ئاماژەی بۆ ئەوەشكردووە، دادپەروەری لەو پرسەدا ئاڵۆزە و ڕەنگە بەدیهاتنی ئاسان نەبێت بەڵام پرۆسەیەكی باشە و دەتوانێت بەڵگەكان كۆبكاتەوە.



خەدیجە جەنكیز دەستگیرانەكەی خاشقچی دەڵێت، بەدوای دادپەروەی بۆ ئەو پرسە دەگەڕێت نەك تەنها لەتوركیا بەڵكو لەهەر شوێنێك كە هەبێت.