گه‌ڕان

Shadow Shadow
سیاسه‌تی

جەبار یاوەر: گفتوگۆمان لەگەڵ حزبەکانی باکور و ڕۆژهەڵات کردووە خاکی هەرێم بەکارنەهێنن دژی وڵاتانیتر

2020.07.02 - 22:59
جەبار یاوەر: گفتوگۆمان لەگەڵ حزبەکانی باکور و ڕۆژهەڵات کردووە خاکی هەرێم بەکارنەهێنن دژی وڵاتانیتر

ناس کورد-

ئەمینداری وەزارەتی پێشمەرگەی هەرێم دەربارەی هێرش و لەشکرکێشییەکانی تورکیا بۆسەر خاکی هەرێم ڕایگەیاند، کێشەکانی تورکیا و پەکەکە و ئەو هێرشانە ماوەی 37 ساڵە بەردەوامە و هیچ کامیشیان نەگەیشتوونەتە ئامانجی خۆیان، دەشڵێت، حکومەتی هەرێم چەندین جار لە گەڵ ئەو لایەنانە گفتوگۆی کردووە کە نابێت خاکی هەرێم بەکاربهێندرێت بۆ پەلاماردانی خاکی وڵاتانی دراوسێ.

 

لە چاوپێکەوتنێکیدا لەگەڵ ئاژانسی میهرنیوزی ئێرانی، جەبار یاوەر، ئەمینداری وەزارەتی پێشمەرگەی حکومەتی هەرێمی کوردستان دەربارەی بۆردومان و لەشکرکێشییەکانی تورکیا بۆسەر خاکی هەرێم ڕایگەیاند: "مەسەلەی شەڕ و بوردومان و هاتنەناوەی تورکیا بۆ خاکی عێراق دەیان ساڵە کە ڕوو دەدات، لە زەمانی پێش ساڵی 1991 یشەوە".

 

ئاماژەی بەوەشكردووە: "هەمووان دەزانین کە پارتی کرێکارانی کوردستان لە دوای ساڵی 1984ەوە بنکە و بارەگای لە ناوچە شاخاوییەکانی سنووری هەرێم و عێراق و تورکیا دانا، لەو ساڵانەدا ڕێککەوتنێک هەبووە لە نێوان تورکیا  و دەوڵەتی ئەو سەردەمەی عێراق، کە تورکیا  دەیتوانی بێتە ناو قووڵایی 15  کیلۆمەتری خاکی عێراق بۆ ڕاوەدوونانی چەکدارانی پارتی کرێکارانی کوردستان".

 

جەبار باسی لەوەشکردووە: " لەو کاتەوە هەتاکو ئێستاش ئەم کێشەیە چارەسەر نەکراوە، ئەگەر ئێمە سەیر کەین نزیکەی 37 ساڵە ئەم کێشە بەردەوامە، پەلاماردان، هێرش کردن، هاتنەناوە، بوردومان، بەڵام بەم هەمووەشەوە نە پەکەکە و نە تورکیا هیچ کام نەگەیشتوونەتە ئامانجی خۆیان".

 

ئەمینداری وەزارەتی پێشمەرگەی هەرێم ئەوەشی خستووەتەڕوو: "دیارە تورکیا و ئێرانیش بە بیانووی مەترسی و هەڕەشەی ئەمنی حزبە دژبەرەکانیان بۆ سەر خاکی وڵاتەکەیان کە جار جار کردەی چەکداری ئەنجام دەدەن، دەست بۆ ئەو بوردومان و تۆپ بارانە دەبەن، حکوومەتی هەرێمی کوردستان چەندین جار لە گەڵ ئەو لایەنانە گفتوگۆی کردووە کە نابێت خاکی هەرێمی کوردستان بەکاربهێندرێت بۆ پەلاماردانی خاکی وڵاتانی دراوسێ، چونکە ئەوە لەگەڵ یاسا نێودەوڵەتییەکانی پاراستنی سنووری وڵاتان ناگونجێت".

 

" هەروەها هۆکارێکە بۆ تێکدانی ئارامی سنوورەکان بە تایبەت ئەوەی کە ئێمە ل گەڵ تورکیا و ئێران چەندەها دەروازەی فەرمی و نافەرمیمان هەیە کە دەتوانین بۆ ئاڵوگۆری بازرگانی و ئەو مامەڵە و کارە ئابووریانەی کە هەرێمی کوردستان دەبووژێنێتەوە و داهاتی زۆری هەیە، بەکاریان بێنین"، جەبار یاوەر وای وتووە.

 

ئەمینداری وەزارەتی پێشمەرگە ئاماژەی بەوەشکردووە: "بە ڕای ئێمە پێویستە حکومەتی فیدڕالی عێراق بە هاوکاری هەرێمی کوردستان گفتگۆیەکی جدی لە گەڵ دەوڵەتی تورکیا  و کۆماری ئیسلامی بکەن بۆ چۆنیەتی چارەسەرکردنی گرفتی ئاسایشی سنوورلە نێوان وڵاتی عێراق و تورکیا و ئێران".

 

جەختیشیکردووەتەوە: " دەبێت ئەم سنوورانە لە رووی ئەمنیەوە پارێزراو بێت، هەڕەشە نەبێت بۆ سەر یەکتری، واتا نە لە لایەن تورکیا و ئێرانەوە هەڕەشە بێت بۆ سەر عێراق و هەرێم و نە لە لایەن عێراقەوە هەڕەشە بێت بۆ سەر وڵاتانی دراوسێ".