گه‌ڕان

Shadow Shadow
سیاسه‌تی

چواریەكی توشبون و گیانلەدەستدان بە كۆرۆنا لە ئەمریکایە 

2020.07.02 - 09:34
چواریەكی توشبون و گیانلەدەستدان بە كۆرۆنا لە ئەمریکایە 

ناس کورد- 

ویلایەتە یەكگرتووەكانی ئەمریكا ریكۆردی لەتۆماركردنی حاڵەتەكانی توشبون و گیانلەدەستدانى بەڤایرۆسی كۆرۆنا بەراورد بە وڵاتانی جیهان شکاندووە، ئەوەش دوای ئەوەی دوێنێ (چوارشەممە) نزیكەی 50 هەزار حاڵەتی توشبون لەو وڵاتە تۆماركرا.

 

بەگوێرەی ئامارە فەرمییەكانی ئەمریكا ژمارەی تۆماركردنی  توشبوونی ڕۆژانە بەڤایرۆسی كۆرۆنا دوێنێ (چوارشەممە) گەیشتووەتە 49 هەزار و 286 حاڵەت ئەوەش بە بەرزترین ژمارەی توشبونی ڕۆژانە دادەنرێت لەسەرەتای بڵاوبونەوەی پەتاكە لەو وڵاتە.

 

ئەو دۆخەش دوای هۆشدارییەكەی ئەنتۆنی فاوچی پسپۆڕی دیاری نەخۆشییە گوازراوەكانی ئەمریكا دێت كە ڕایگەیاند، ژمارەی توشبوونی ڕۆژانە بۆ 100 هەزار حاڵەت زیاد دەكات بەهۆی ئەوەی خەڵكی پابەند نابێت بە ڕێنماییەکانەوەلە بەستنی دەمامک و دەستکێش و لێكدووری كۆمەڵایەتی.

 

هاوكات لەبەرازیل، هەزار و 16 حاڵەتی گیانلەدەستدان لەماوەی 24 كاتژمێری ڕابردودا تۆمار كرا ئەمەش ژمارەی تێكڕای گیانلەدەستدانى لەو وڵاتە گەیاندە 60 هەزار و 610 حاڵەت، ژمارەی توشبونیش بۆ 45 هەزار و 482 حاڵەت زیادی كرد و بەوەش توشبون لەوڵاتی ئەمازۆندا گەیشتووەتە نزیكەی ملیۆنێك و 500 هەزار و بەرازیلی كردووەتە دووەم وڵات كەزۆرترین زیانی بەركەوتووە بەهۆی ڤایرۆسەكەوە لەسەر ئاستی جیهان.



بەپێی ئامارە فەرمییەكانی وڵاتی مەكسیك 5 هەزار و 681 حاڵەتی نوێى توشبون و 741 حاڵەتی نوێى گیانلەدەستدان تۆمار كراوە و بەوەش تێكڕای ژمارەی گیانلەدەستدان گەیشتووەتە 232 هەزار و 28 هەزار و 510 حاڵەتی گیانلەدەستدان، بەراورد بە وڵاتانی دیكە ئەمریكا جیاوازییەكی زۆری لەگەڵ وڵاتاندا لەڕووی توشبون و گیانلەدەستدانەوە هەیە.



بەگوێرەى نوێترین ئامار كە ڕۆیتەرز بڵاوی كردووەتەوە لەئێستادا لەسەرتاسەری جیهاندا زیاتر لە 10 ملیۆن توشبو لە 196 وڵاتی جیهاندا هەیە و 516 هەزار حاڵەتی گیانلەدەستدانیش تۆمار كراوە.



ژمارەى دانیشتیوانی ئەمریكا 4%ى ژمارەی دانیشتوانی جیهان پێكدەهێنێت و بەوەش ژمارەی قوربانیانی ڤایرۆسەكە کە دەكاتە 25% لەسەر ئاستی جیهان دەكەوێتە ئەو وڵاتەوە.