گه‌ڕان

Shadow Shadow
سیاسه‌تی

وتەبێژى حکومەتى هەرێم: لەمانگى داهاتوەوە بەپێى داهاتى حکومەت مووچە دابەش دەکەین

2020.07.01 - 18:07
وتەبێژى حکومەتى هەرێم: لەمانگى داهاتوەوە بەپێى داهاتى حکومەت مووچە دابەش دەکەین

ناس کورد-

وتەبێژى حکومەتى هەرێمى کوردستان رایگەیاند، لێبڕینى مووچەى فەرمانبەران هەر بۆ ئەم مانگە دەبێت و بۆ مانگەکانى تر بەگوێرەى داهاتى حکومەت مووچە دابەش دەکرێت.

 

جوتیار عادل، وتەبێژى حکومەتى هەرێمى کوردستان لە میانەى ئەنجامدانى کۆنگرەیەکى رۆژنامەوانیدا ئاماژەى بە چوونە بوارى جێبەجێکردنى یاساى چاکسازى کرد و ئاماژەى بەوە کرد کە حکومەتى هەرێم بە ئامانجى بەدیهێنانى دادپەروەرى بەردەوام دەبێت لەچاکسازى.

 

لەبەشێکى ترى کۆنگرە رۆژنامەوانییەکەدا جوتیار عادل باسى لە کۆبوونەوەکەى ئەمڕۆى ئەنجومەنى وەزیران کرد و وتى "لەکۆبوونەوەکەدا بڕیاردراوە شاندی دانوستاندنکاری هەرێمی کوردستان سەردانی بەغدا بکەنەوە".

 

لەتەوەرێکى ترى کۆنگرە رۆژنامەوانییەکەدا وتەبێژى حکومەتى هەرێمى کوردستان باسى لە دابەشکردنى مووچەى فەرمانبەران کرد و وتى "لەسەرەتاوە کەمکردنەوەی مووچە 34% بووە، بەڵام سەرۆکى حکومەت بڕیاریدا پارە قەرز بکات بۆ ئەوەی 21% بێت. ئەم رێژەیەی ئێستاش بەتەنها بۆ ئەم مانگەیە".

 

سەبارەت بە مووچەى مانگەکانى تریش، جوتیار عادل وتى "بۆ مانگەکانى تر بەگوێرەى ئەو داهاتەى کە لەبەردەست حکومەتە مووچە دابەش دەکرێت".