گه‌ڕان

Shadow Shadow
سیاسه‌تی

سەرۆکى روسیا هۆشداریدا ’سزاکانى ئەمریکا لەسەر سوریا کێشەکان گەورەتر دەکات’ 

2020.07.01 - 17:43
سەرۆکى روسیا هۆشداریدا ’سزاکانى ئەمریکا لەسەر سوریا کێشەکان گەورەتر دەکات’ 

ناس کورد- 

سەرۆکی ڕوسیا ڕایگەیاند، سزاکانی ئەمریکا لەسەر سوریا نایاسایین، کێشەکان گەورەتر دەکەن و ئابوریی ئەو وڵاتەش زیاتر بچوکتر دەکاتەوە وڕەوشی بڵاوبوونەوەی کۆرۆناش مەترسیدارتر دەکات.

 

ئەمڕۆ (چوارشەممە،1ى تەموزی 2020) لوتکەی سێقۆڵیی نێوان ڤلادیمێر پوتین، سەرۆکی ڕوسیا، حەسەن ڕۆحانی، سەرۆککۆماری ئێران و ڕەجەب تەیب ئەردۆغان سەرۆککۆماری تورکیا، لەڕێی ڤیدیۆ کۆنفرانسەوە ئەنجامدرا.

 

بەگوێرەی میدیا جیهانییەکان کۆبوونەوەی ئەو سێ وڵاتە لەسەر تاوتوێکردنی دۆسییەی سوریا بووە لە چوارچێوەی دانوستانەکانی ئەستانە.

 

 ئاماژە بەوەکراوە پوتین لەمیانی کۆبوونەوەکەدا بە ئەردۆگان و ڕۆحانی وتووە، "سزاکانی واشنتۆن لەسەر دیمەشق، کێشەکان زیاتر دەکەن و هیچ سودێکیشی نییە جگە لە زیادکردنی فشارەکان لەسەر گەلی ئەو وڵاتە".

 

 پۆتین، جەختیلەوەشکردوەتەوە، "پێویستە هەوڵەکان چڕبکرێنەوە و ڕێکار بگیرێنەبەر بۆ یارمەتیدانی وڵاتەکە نەک سزادانی".

 

سەرۆکی ڕوسیا، ئەوەشی خستوەتەڕوو، "پایەندبوون بە ڕێککەوتنی ئەستانە ڕێگە خۆش دەکات بۆ بنیادنانەوەی کایەکانی ئاسایش، ئابوری و سیاسی لە سوریا، دەبێت بەردەوام بین لە بەرەنگاربوونەوەی تیرۆر".

 

هاوکات حەسەن ڕۆحانی، سەرۆککۆماری ئێران، لەمیانەی کۆبوونەوە سێقۆڵییەکەدا داوایکرد، "حکومەتی سوریا دەسەڵاتی خۆی بەسەر تەواوی وڵاتەکەیدا بسەپێنێت ئەمریکا و ئەو هێزانەی کە پاڵپشتیان لێدەکات ناوچەکە بەجێبهێڵن".

 

ڕۆحانی جەختیلەوەشکردووەتە، "تاکە چارەسەر بۆ قەیرانی سوریا تەنها گفتۆگۆ و دانوستانی لایەنە ناکۆکەکانە، ئێران لەپێناو سەپاندنی سەقامیگری و ئاشتی لەو وڵاتە هەموو هەوڵەکانی دەخاتە گەڕ".

 

 پڕۆسەی دیبلۆماتی و هەڵکشانی ئاڵۆزییەکان

 

لەئێستادا ڕوسیا و ئێران لە پێشەنگی ئەو وڵاتانەدان کە ماوەی نۆ ساڵە پاڵپشتی ڕژێمی ئەسەد دەکەن لە سوریا، تورکیاش پاڵپشتی ئەو هێزانە دەکات کە دژ بەو ڕژێمە دەجەنگن.

 

 لەساڵی 2017 ڕوسیا و تورکیا ڕێککەوتن لەسەر کەمکردنەوەی گرژییىەکان لە سوریا  ئەوەش وایکرد لە مانگی ئاداری ڕابردوودا کردەوە سەربازییەکان لە ناوچەی ئیدلب ڕابگیرێت، هەر لەو مانگەشدا گوندەکانی ناوچەکە چەندین جار دوچاری بۆردومان بوونەتەوە بە تایبەتی ئەو ناوچانەی کە لەژێر کۆنتڕۆڵی ئۆپۆزسیۆنی سوریادا بوون.

 

دانوستانەکانی ئەستانە بۆ یەکەمین جار لەساڵی 2018 لە وڵاتی کازاخستان لەنێوان هەرسێ وڵاتی روسیا، تورکیا و ئێران بەڕێوەچوو، بۆ چارەسەری قەیرانی سوریا و تا ئێستاش بەردەوامی هەیە.

 

ئیدارەی ئەمریکا بە سەرۆکایەتیی دۆناڵد ترەمپ، ڕۆژی 17ی حوزەیران، لەچوارچێوەى یاساى قەیسەردا سزای بەسەر 39 کەس و قەوارەی حکومەتی سوریادا سەپاند، کە لەنێویاندا سەرۆکی ئەو وڵاتە بەشار ئەسەد و ئەسما ئەسەد-ی هاوسەری هەن، یاسای قەیسەر بڕیارێکی کۆنگرێسی ئەمریکایە بۆ سەپاندنی سزا بەسەر حکومەتی سوریا وئەوانەی هاوکاری دەکەن.