گه‌ڕان

Shadow Shadow
سیاسه‌تی

کوژراوەکە کێیە؟

ناس کورد هۆکارى شەڕە تەقەکەى دوێنێی سلێمانى بڵاودەکاتەوە

2020.06.23 - 15:04
ناس کورد هۆکارى شەڕە تەقەکەى دوێنێی سلێمانى بڵاودەکاتەوە

ناس کورد - رۆژیار سیروان 

 

هۆکارى شەڕە تەقەکەى دوێنیی سلێمانى کە تێیدا کەسێک کوژرا و سیانى دیکەش برینداربوون، دەگەڕێتەوە بۆ کێشە لەسەر پارە و قەرز، ئەوەش بەوتەى سەرچاوەیەکى ئاگادار لە رووداوەکە. لە ئێستاشدا پۆلیس شەشى کەسى دەستگیرکردووە.

 

دوێنێ دووشەمە 22ی حوزەیرانى 2020 لەسەر شەقامى بازنەیی مەلیک مەحموود نزیک یاریگاى چیا لە سلێمانى رووداوێکى تەقەکردن روویدا و کەسێک کوژرا و سێ کەسى دیکەش برینداربوون.

 

بەپێی ڕاگەیەنراوێکى پۆلیسى سلێمانى، ئەو کەسەى کوژراوە هاوڵاتییەکە بەناوى ( ق.ج.ع )  تەمەن 39 ساڵ کە لەئەنجامى رووبەرووبوونەوەیەک لەگەڵ چەند کەسێک کوژراوە و شەش تۆمەتباریش لەسەر رووداوەکە دەستگیرکران، هەروەها هێزەکانى پۆلیس دەستیان گرتووە بەسەر سێ ئۆتۆمبێل و چەکێکى جۆرى کڵانشینکۆف کە لە رووداوەکەدا بەکارهێنراون.

 

کەسێکی نزیک لە کوژراوەکە نەیویست ناوى ئاشکرا بکرێت بە ناس کوردى راگەیاند،  کوڕێکى خزمیان 15 دەفتەر دۆلار قەرزارى کەسێک بووە بەهۆى ئەوەى  ئیفلاسی کردووە  تواناى دانەوەى نەبووە، خاوەن قەرزەکە هەڕەشەیان لە براکەى کردووە ئەگەر ئەو پارەیەی بۆ نەگێرێتەوە دەیکوژن.

 

وتیشى "براى قەرزارەکە بەڵێنى دانەوەى 10 دەفتەر دۆلارى پێداوە، بەشێوەیەک سەرەتا حەوت دەفتەریان بداتێ و دواتر 3 دەفتەرى تریان بۆ حازربکات، بەڵام خاوەن قەرزەکە پێى وتوە هەشت دەفتەر دۆلارى تر نەهێنیت دەیکوژن، لەئەنجامى دروستبوونى گرژى و ئاڵۆزى لە نێوانیان ئەو کارەساتەى دوێنێ ئێوارەی لێکەوتەوە".  

 

ئەو سەرچاوەیە باسی لەوەشکرد، ئەو کەسەى کوژراوە براى قەرزارەکەیە و خاوەنى چەند کێڵگەیەکى پەلەوەرییە و خێزاندارە و خاوەنی چوار کوڕى بچووکە.

 

بەپێی ڕاگەیەنراوەکەى پۆلیس، ئەو تۆمەتبارانەى دەستگیرکراون پێکهاتوون لە (أ .س.ف )  لەدایکبووى ساڵى 1997، ( م.ج.ع ) لە دایکبووى 1990، ( س.ج.ع ) لە دایکبووى 1988، (أ.م.ع ) لە دایکبووى 1988، (پ.ج.ع ) لە دایک بووى 1988، ( م.س.ف ) لە دایکبووى ساڵى 1996 بووە و لە ئێستادا بەبریارى دادوەر و بەپێى ماددەى 406 لە یاسای سزادانى عێراقی راگیراون.

 

 ئاماژە بەوەشکراوە، جۆرى ئەو ئۆتۆمبێلانەى لەلایەن هێزەکانى پۆلیسی سلێمانیەوە دەستیان بەسەردا گیراوە لەدواى رووداوەکە لە جۆرى ( تۆیۆتا هایلوکس - نیسان پاترۆڵ - تانکەرى ئاو) بوون.