گه‌ڕان

Shadow Shadow
سیاسه‌تی

نەوەی نوێ وەک یەکەم لایەن بەفەرمی هەڵوێستی خۆی لەبارەی بڕینی موچەوە ڕاگەیاند

2020.06.22 - 11:36
نەوەی نوێ وەک یەکەم لایەن بەفەرمی هەڵوێستی خۆی لەبارەی بڕینی موچەوە ڕاگەیاند

ناس کورد-

فراکسیۆنی نەوەی نوێ لە پەرلەمانی کوردستان وەک یەکەم فراکسیۆن بەفەرمی دژایەتی خۆی بۆ بڕینی موچەی فەرمانبەران دەربڕی و ڕایگەیاند، بڕیارە نایاساییەکەی حکومەتی ھەرێمی کوردستان ڕەتدەکەنەوە، ئاماژەی بەوەشکردووە، داوا لە هاووڵاتیان دەکەن ئەوە قبوڵ نەکەن و ڕوبەڕوی بوەستنەوە و ئەوانیش پشتگیریان دەکەن.

 

لە ڕاگەیەندراوێکدا فراکسیۆنی نەوەی نوێ لە پەرلەمانی کوردستان ڕایگەیاند: "ئێمە وەک فڕاکسیۆنی نەوەی نوێ لەپەرلەمانی کوردستان بڕیارە نایاساییەکەی حکومەتی ھەرێمی کوردستان ڕەتدەکەینەوە سەبارەت بە بڕینی موچەی موچەخۆران بەھەر بیانویەک بێت".

 

ئاماژەی بەوەشکردووە: "بەداخەوە حکومەتی ھەرێمی کوردستان لەجیاتی چاکسازی لەداھاتی نەوت و گاز و گەڕاندنەوەی دەیان ملیار دۆلاری دزراوی ئەم وڵاتە و بڕینی داهاتی مانگانەی کۆمپانیاکانی، کەچی لەبڕیارێکی تەواو نایاسایی و بەبێ گەڕانەوە بۆ پەرلەمانی کوردستان ھاتووە دەست بۆ قوت و بژێوی فەرمانبەران دەبات کەبەھیچ شێوەیەک جێگای قبولکردن نیە".

 

نەوەی نوێ جەختیکردووەتەوە: "داوا لە موچەخۆرانی سەربەرز دەکەین ھەڵوێست وەرگرن و ئەم بێ ڕێزی ونادادی و زوڵمەی دەسەڵات ڕەت بکەنەوە، پێویستە ھەموو چین و توێژەکان پشتگیری یەکتر بکەن لەبەرامبەر ستەمی دەسەڵات بوەستنەوە، بێگومان ئێمەش بەھەموو شێوەیەک پاڵپشتیانین و لەگەڵ خواست و داوا ڕەواکانیان دەبین ، لەداھاتوشدا ھەنگاوی تر دەنێین".

 

لە راگەیەندراوەکەدا ئەوەش هاتووە: "ئێمە دەمێکە ڕامانگەیاندوە کە ئەم حکومەتە شکستی ھێناوەو ناتوانێت بەردەوام بێت لەحوکمڕانی و ئیدارەدانی ئەم ھەرێمەو بەھیچ شێوەک ناتوانێ چاکسازی بکات ، بۆیە پێویستە پێداچونەوە بە تەواوی دامەزراوەکاندا بکرێت و حکومەت بکەوێتە دەست خەڵکانێک کە دەتوانن کێشەی هاوڵاتییان چارەسەر بکەن و هەنگاوی جدی بنێن بۆ باشکردنی دۆخی خەڵک".

 

فراکسیۆنی نەوەی نوێ ئەوەشی خستووەتەڕوو: "ئەم بڕیارە نایاساییەی حکومەتی ھەرێم بۆ بڕینی بەشێک لەموچەی فەرمانبەران ھەرسێ لایەنی سەرەکی پێکھێنەری حکومەت لێی بەرپرسیارن ودەبێت ڕاستگۆیانە بەھاوڵاتیانی ھەرێم ودەنگدەران وئەندامانی خۆیان بڵێن کەئەوان ئەو بڕیارەیان داوەو بەرپرسارێتیەکەشی لەئەستۆ بگرن، نەک بە رۆژ لە حکومەتدا بڕیار بدەن و  قوتی خەڵک ببڕن، کەچی بە شەو وەک ئۆپۆزسیۆن خۆیان دەربخەن.

 

ناکرێت لەمە زیاتر خەڵکی ھەرێمی کوردستان باجی دەسەڵاتێکی گەندەڵ وستەمکارو بێ باک بدات ،کە چارەنوسی میللەتاکەمان بەرەو داھاتویەکی تاریک ونادیار دەبات".

 

دوێنێ یەکشەممە 21ی حوزەیرانی 2020، حکومەتی هەرێمی کوردستان کۆبووەوە و بڕیاریدا بە کەمکردنەوەی موچەی فەرمانبەرانی هەرێم بەشێوەی ڕێژەیی.