گه‌ڕان

Shadow Shadow
سیاسه‌تی

هونەرمەند عەتا چاوشین لەدواى توشبوونى بە کۆرۆنا گیانى لەدەستدا

2020.06.22 - 08:50
هونەرمەند عەتا چاوشین لەدواى توشبوونى بە کۆرۆنا گیانى لەدەستدا

ناس کورد-

هونەرمەندى گۆرانى بێژ عەتا چاوشین لەدواى توشبوونى بە ڤایرۆسى کۆرۆنا و مانەوەى لە نەخۆشخانە بۆ وەرگرتنى چارەسەر، سەرلەبەیانى ئەمڕۆ (دووشەممە) کۆچى دوایى کرد.

 

جەزاکەریم، ناسراو بە جەزای ساز سەرۆکی کۆمەڵەی هونەری میلـلی لە هەژمارى خۆى لە فەیسبوک لەبارەى گیانلەدەستدانى عەتا چاوشین نوسیوویەتى " بە دڵێکێ پڕ حوزنەوە  بە قوڕگێکی پڕ گریانەوە هەواڵی کۆچی ئەبەدی هاوڕێی دێرین و برای گەورەو خۆشەویستم هونەرمەندی ناودار عەتا چاوشینتان پێ ڕادەگەیەنم".

 

ئاماژەى بەوەش کردووە "زۆر بەداخەوە دوای ململانێیەکی سەخت و دژوار لە گەڵ پەتای شوومی کۆرونا دواجار بۆ هەتا هەتایە ماڵئاوایی لێ کردین .ڕۆحت شاد بێت هاوڕێ سەنگینەکەم".  

 

عەتا چاوشین لەدایکبووی شاری سلێمانییە، ماوەیەک لە رۆژهەڵاتی کوردستان ژیاوە و ماڵی لە سەقز بووە. جگە لە بەستە و مەقام، بەندبێژێکی باشیشە و لەگەڵ گۆرانیبێژ و بەندبێژ (میدیا حسێن) هاوڕێیەتییەکی نزیکیان هەیە. لەگەڵ ژەنیاری شمشاڵ (قالە مەڕە)، دانیشتنیان هەیە و بۆ یادگاری تۆماریان کردووە.

 

رۆژی (17ى حوزەیرانى 2020) هونەرمەند عەتا چاوشین توشى ڤایرۆسى کۆرۆنا بوو و بۆ چارەسەرکردن لە نەخۆشخانە کەوت  هاوڕێ نزیکەکانى چەند جارێک ئاماژەیان بە خراپى تەندروستى ئەو و ناجێگیرى تەندروستى ئەویان کرد لەگەڵ پێویستبوونى بە پلازماى خوێنى چاکبووى ڤایرۆسەکە.