گه‌ڕان

Shadow Shadow
سیاسه‌تی

’’درۆیەکی شاخدارە’’

بەشیر حەداد: داواکاری بۆ کۆبوونەوەى نائاسایی پەرلەمان پێشکەش نەکراوە لەبارەى بۆردومانەکانی تورکیا

2020.06.20 - 14:25
بەشیر حەداد: داواکاری بۆ کۆبوونەوەى نائاسایی پەرلەمان پێشکەش نەکراوە لەبارەى بۆردومانەکانی تورکیا

ناس کورد-

جێگری دووەمی سەرۆكی پەرلەمانی عێراق ڕەتی دەكاتەوە هیچ پەرلەمانتارێكی كورد داواكاری پێشكەشی سەرۆكایەتی پەرلەمان كردبێت بەمەبەستی ئەنجامدانی كۆبوونەوەی نائاسایی و لێدوانی ئەو پەرلەمانتارەش لەو بارەوە كە گوایە ڕێگری لەو كارە كردبێت بە "درۆی شاخدار" ناو دەبات.

 

 

ئەمڕۆ شەممە، 20ی حوزەیرانی 2020، ل ەڕاگەیەنراوێكدا نوسینگەی ڕاگەیاندنی بەشیر حەداد، جێگری دووەمی سەرۆكی پەرلەمانی عێراق ڕایگەیاند، "ئەندامێكی ئەنجومەنی عێراق وەكو پیشەی هەمیشەی خۆی درۆیەكی شاخداری هەڵبەستووە گوایە ئەوان وەكو ژمارەیەك پەرلەمانتاری كورد نوسراوێكیان ئاراستەی سەرۆكایەتی ئەنجومەن كردووە بۆ ئەوەی كۆبونەوەیەكی نائاسایی لەسەر هێرشەكانی سوپای توركیا لەچەند ڕۆژی ڕابردودا ئەنجامبدرێت و دكتۆر بەشیر حەدادیش ڕێگری كردووە ئەو كۆبونەوەیە ئەنجامبدرێت."

 

دوێنێ غالب محەمەد، پەرلەمانتاری گۆڕان لە بەغدا وتی، داوایەکی کۆبوونەوەى بەپەلەیان پێشکەشکردووە، بەڵام بەشیر حەداد ڕێگرە لە بەرەوپێشچوونی داواکە.

 

ڕاگەیەنراوەکەی بەشیر حەداد دەڵێت، قسەكانی ئەو پەرلەمانتارە "سەر لەبەری درۆیە و لەلایەن هیچ پەرلەمانتارێكەوە داوای كۆبونەوەی نائاسایی نەكراوە".

 

باس لەوەش كراوە، جێگری سەرۆكی پەرلەمان ڕاگەیەنراوی لەسەرپەلامار و هێرشەكانی سوپای توركیا بۆ سەر خاكی هەرێم هەبووە و بەپێشێل كردنی سەروەری خاكی عێراق زانراوە و داواشی كردووە حكومەتی فیدراڵ داوا لەتوركیا بكات هێرشەكانی ڕابگرێت.

 

لەخاڵی سێیەم و چوارەمی ڕاگەیەنراوەكەشدا هاتووە" لە ئێستادا ئەنجومەنی نوێنەرانی عێراق بەهۆی تووشبوونی چەند پەرلەمانتارێکەوە بە ڤایرۆسی کۆرۆنا کۆبوونەوەکانی خۆی راگرتووە و کۆبوونەوە ئەنجام نادات و تا ئێستاش ئەو كەسەیان نەبییوە لەناو هۆڵی پەرلەمان یان میدیاكان داكۆكی لەخەڵكی كوردستان بكات و تەنها پاڵەوانی ناو تۆڕە كۆمەڵایەتیەكانە"

 

ڕاگەیەنراوەكەی نوسینگەی دكتۆر بەشیر حەداد باسی لەوەش كردووە، وەزارەتی دەرەوە كەپشكی پارتییە دوو جار باڵیۆزی توركیای بانگهێشتكردووە و ناڕەزایەتینامەی پێداوە.

 

جەختیش لەسەر ئەوە كراوەتەوە ڕێكاری یاسایی بەرامبەر ئەو پەرلەمانتارە دەگرنە بەر كە چەندینجارە بەوتەی نوسینگەی جێگری سەرۆكی پەرلەمان درۆ و قسەی ناڕاست دەكات.