گه‌ڕان

Shadow Shadow
سیاسه‌تی

فڕۆکە جەنگییەکانى تورکیا ناحیەیەکى سنورى قەزاى زاخۆ بۆردومان دەکەن

2020.06.19 - 21:04
فڕۆکە جەنگییەکانى تورکیا ناحیەیەکى سنورى قەزاى زاخۆ بۆردومان دەکەن

ناس کورد- محەمەد عومەر

بەڕێوەبەرى ناحیەى دەرکار سەر بە قەزاى زاخۆ رایگەیاند، فڕۆکە جەنگییەکانى تورکیا ناحیەکەیانى بۆردومان کردووە و بۆردومانە بەردەوامەکانى تورکیا بۆتە هۆى مەترسى بۆ سەر گیانى هاووڵاتیانى ئەو ناحیەیە.

 

زێرەڤان سندی بەرێوبەری ناحیەی دەرکار  لە لێدوانێکى تایبەت بە ناس کوردى وت "لە کاتژمێر ٨ ئێوارەی ئەمڕۆوە فڕۆکە جەنگیەکانی تورکیا گوندی بەرەخێیان لە ناحیەی دەرکار سەر بە قەزای زاخۆ بۆردومان کرد".

 

وتیشى ، دوری بۆردومانی فڕۆکە جەنگیەکانی تورکیا لە سەنتەری گوندەکە كەمتر بووە لە (٢٠٠) مەتر.

 

زێرەڤان سندى رونیکردەوە، ئەو گوندە لە گوندە ئاوەدانەکانی سنوری ناحیەکەیانە و خەڵک تێیدا دەژین و مەڕ و ماڵات بەخێو دەکەن و کار لەسەر زەوی و زارەکانیان دەکەن.

 

جەختیشى کردەوە،نزیکبوونى بۆردومانەکان لە گوندەکانی سنوری ناحیەی دەرکار جێگای مەترسیە لەسەر سەرو ماڵی ھاووڵاتیان.

 

بۆردومانەکە لە کاتێکدایە کە هەر ئەمڕۆ (هەینى) فڕۆکە جەنگییەکانى تورکیا بۆردومانی ناوچەی نێروەو رێکانیان کرد لە ناحیەی شێلادزێ سەر بە قەزای ئامێدی و چەند هاووڵاتییەک بەهۆى بۆردومانەکەوە شەهید بوون.

 

پەیامنێرى ناس کورد ئاماژەی بەوەکرد، لە ئەنجامی بۆردومانکردنى گوندی سیدان لە سنوری ئەو ناحیەیە سێ هاووڵاتى سڤیلی ئەو ناوچەیە بونە قوربانی و شەھیدکران.

 

ئەوە لەکاتێکدایە، دوێنێ پێنجشەممەش بەهەمانشێوە و بەهۆی بۆردومانەکانی سوپای تورکیاوە، هاووڵاتییەک لە سنوری ناحیەی سیدەکان شەهید بوو. 

 

ماوەی چەند ڕۆژێکە، سوپای تورکیا هێرش و لەشکرکێشێ بۆسەر خاکی هەرێمی کوردستان دەستپێکردووە و جگە لە بۆردومان هێزی کۆماندۆی زەمینیشی ناردووەتەوە ناو خاکی هەرێم، بەڵام هەرسێ سەرۆکایەتییەکەی هەرێم تاوەکو ئێستا بێدەنگن لەو بارەیەوە.